Be gwenad burgwisale, yeer dule wioged. Deyob beg neg gusar sun be binsadaged, “¿Dule burgwisar nue igi gusdaye? ¿Gannar un an gwenagan burgwismalad dagbalodibeye?”. We lecciongine, geb baid leccion daniggidgi we igargi sunmaglegoed.

1. ¿Dule burgwisar igi gusdae?

Jesus sogsad, dule burgwisar bela beladse gabmaiyobye. ¿Ibigala Jesus sogsa, burgwed gabedyobye? Ar dule ise gabarmaile e nagaba ibmar gunaid iddomasurdaed. Dule burgwisale, bar ibmar nunmagged iddomasurdamogad, bar wile iddomasurdabalid. Aagala, Bibliagi soglenaid, “burgwismaladdina bar ibmar iddomaisurmalad” (Eclesiastés 9:5 absogo).

2. ¿Ibigala nueggwa wisgued abelege, dule burgwisar nue igi gusdae?

Abar dulemar dobe burgwedamalad, abar dule burgwisar dobdamarbalid. Be deyob iddodamogale, Bibliagi ibmar soglenaid be bendaggoed, mer be doggus dobgudi guega. Jesus ebbenne sogsad: ‘Igar nabbiragwad bemar ollor sanoniggoed’ (Juan 8:​32). Abar Bab igargi emar odurdagye sogmaladi, sogdamalad, dule burgwisar sorba nabbi e burbabi gudi gusdaye. Auggi Bibliagindi deyob soglenasulid. Bibliagindi soglenaid, dule, burba saddeye, dule burgwisale bar sorba ibmar dula gudi gussurdaye. Degsoggu, dule burgwisale bar wiledi gussurdaed. Ar burgwarmalad neg wissurmamasoggua, be ogwayosurmalad, aggar be imaggosurmarbalid. Aagala, dule burgwismaladga ibmar imagged nuedsulid.

Abar dulemar sogdamarbar inigwale, gabgin an dule burgwismaladbo sunmasye, auggi, burgwismaladbo sunmassurdamalad. Ar bad Bibliagi anmar dagsad, burgwismalad ‘bar bibbisaar ibmar iddomamasurye’. Niamar yamo dule burgwismaladyob na imagdididamalad, aamala inbaggwa dulemarbo sunmasdamalad. Mer anmar niamarse yardagledi guegala, nue abeleged anmar nueggwa wisgued, nue igi dulemar burgwisar gusdaye Bibliagi soglenai. Aagala, Jehova anmarga sogmaid, mer bibbisaar dule burgwismaladbo sunmagbiye binsamaloye. Ar Jehovadi wisid, niamarbo sunmagged boni bibbisuli (Deuteronomio 18:​10-12 absogo).

3. Dule burgwisar nue igi gusdae

We ibmargi sunmaglealir dulemar na emarbi ibmar sogsurdamalad. Anmar wisbalid, dulemar ibmar soged bela nabirbisurdabalid.

• ¿Dule burgwisar nue igi gusdaye be neggweburgindi sogdamarmoga?

 4. Be durdasale dule burgwisar nue igi gusdae, bar be dobguosulid

Be wisgusale dule burgwisar nue igi gusdaye Bibliagi soglenai, dule burgwisar bar be dobe iddogosulid. Eclesiastés 9:​10 absomalo, we ibmargi sunmagmarbalo:

• ¿Burgwismalad nabir anmar oaggalosmalardibe?

Be durdasale dule burgwisar nue igi gusdaye Bibliagi soglenai, bar be burgwismaladga ibmar imagdi guosulid. Isaías 8:19 geb Apocalipsis 4:​11 absomalo, we ibmargi sunmagmarbalo:

• ¿Igi Jehova iddodae, dule, burgwismaladga ibmar imagger?

5. Be durdasale dule burgwisar nue igi gusdae, be yeer iddogoed

Abar dulemar sogdamalad, be dule isganale, burgwisar be wilesi guoye. Auggi Bibliagindi soglenaid, dulemar burgwisale bibbisaar wilegosurmarye, isganaganbela wilegosurmarye. Romanos 6:7 absomalo, we ibmargi sunmagmarbalo:

• Bibliagi soglenaid, dule burgwisale na e isgued bennusayob gusdaye. Degsoggu, ¿nabir soglesardibe, dule isganamar burgwisar wilemaloye?

Be nueggwa wisgunoniggile Jehova dule igi daedi, mag be iddononiggoed, ibigala anmar soge Jehova bibbisaar dule burgwisar wiossurdaye. Deuteronomio 32:4 geb 1 Juan 4:8 absomalo, we ibmargi sunmagmarbalo:

• Jehova dule nued dasoggua, ¿nabir burgwismalad wiosardibe?

• Emidi be durdassoggu dule burgwisar wilesi gussurdaye, ¿igi be iddomosunna? ¿Ibigala deyob be soge?

 WE IGARGI SUNMAGLESAD

Dule burgwisar agnesig nassurdaed, wilesi gussurdabalid, geg dulemar oaggalobalid.

Ibu be durdasa

• ¿Dule burgwisar nue igi gusdae?

• ¿Ibig nueggwa wisgued abelege, dule burgwisar nue igi gusdae?

• Be durdassoggua dule burgwisar nue igi gusdae, ¿ibigala we ibmar yeer iddo be imagge?