Neɛ kaŋa ho naŋ nɔŋ yaga zaa kpieŋ bee? Ka neɛ kaŋa te naŋ nɔŋ yaga zaaŋ wa kpi, a maŋ beɛrɛ teŋ yaga, a maŋ lɛ vɛmeŋ teŋ teɛrɛ ka: ‘Ka neɛŋ wa kpi, boŋ maŋ pɔgoo? Tamaa bebeŋ ka te na lɛ nyɛɛ te nɔŋneba naŋ kpi na bee?’ Te na nyɛɛ lɛ a Baabole naŋ iri a soorebie ŋa nɔɛ ko te a yi a zannoo ŋa ane a zannoo naŋ tɔnne na poɔŋ.

1. Ka neɛŋ wa kpi, boŋ maŋ pɔgoo?

Yezu da yeleeŋ ka ka neɛŋ wa kpi a waa ŋa o soba naŋ gbiri gaa tɔɔre. Ka neɛŋ wa gbiri gaa tɔɔre, o ba maŋ lɛ baŋ yelzaa naŋ erɛ. Sobuo ka kũũ waa ŋa neɛ naŋ gbiri gaa tɔɔre? Ka neɛ kaŋaŋ wa kpi, o eŋɛ ba maŋ lɛ beɛroo. Lɛ zaa o naŋ nɔŋ o zɔmenne ane o booree deme a seŋ, kyɛ o ba maŋ lɛ baŋ yelzaa. A Baabole yeleeŋ ka, “kũũni ba baŋ yelzaa.”​—Kanne Ikilisiasitiz 9:5.

2. Ka teneeŋ baŋ boŋ naŋ maŋ pɔge neɛ saŋa na oŋ kpi na, sobuo aŋ na toɔ̃ soŋ te?

Noba yaga zoree kũũ. Ka neɛ kaŋaŋ wa kpi ba maŋ zoree o soba! Kyɛ, yɛlɛ na a Baabole naŋ yel a kyaare kũũ na na toɔ̃ dii la ho sukyiri. Yezu yeleeŋ ka: “Yɛ na baŋ la a yelmeŋɛ, ka a yelmeŋɛ e ka yɛ so yɛmenne.” (Gyɔɔn 8:32) Puoruu yaga maŋ wuloŋ ka ka neɛŋ wa kpi o seɛ naŋ koŋ baŋ kpi maŋ yi la o soba eŋɛŋ a te be zie kaŋaŋ, kyɛ lɛ naane ka a Baabole wuli. A Baabole wuleeŋ ka ka neɛŋ wa kpi, o ba maŋ te be zie kaŋaŋ a dire dɔgɛɛ. Ane meŋ, kũũni ba baŋ yelzaa naŋ erɛ, ba koŋ toɔ̃ e noba naŋ voorɔ yelfaa zaa. Azuŋ, a ba seŋ ka te puoro kũũni bee, a erɛ yɛlɛ mine naŋ wuli ka te boɔrɔŋ ka te pɛlɛ te noba naŋ kpi na poɔ. A ba seŋ ka te maŋ puoro korɔ noba naŋ kpi meŋ.

Noba mine maŋ yeleŋ ka ba neŋ kũũni na baŋ di la dama. Kyɛ, a yɛlɛ ŋa ba e yelmeŋɛ. Bonso a Baabole yeleeŋ ka kũũni “ba baŋ yelzaa.” Noba naŋ teɛre ka ba neŋ kũũni la dire dama na neŋ malekefaare la maŋ dire dama. A malekefaare ŋa maŋ tu la nyaammo sori a erɛ ba yɛlɛ aŋa te nɔŋneba naŋ kpi na. Azuŋ, ka teneeŋ baŋ yɛlɛ naŋ maŋ pɔge neɛ saŋa na oŋ kpi, a na soŋ teŋ ka te tage te menne yi a malekefaare ŋa eŋɛŋ. Jehoova kpãã teŋ nimizeɛ̃ ka te ta vɛŋ ka te neŋ kũũni dire dama. Jehoova yelee lɛ bonso o ba boɔrɔ ka a malekefaare ŋa e te yelfaa zaa.​—Kanne Duturoonomi 18:10-12.

3. Ka neɛŋ wa kpi, bo yɛlɛŋ maŋ pɔgoo?

Ka hooŋ gaa a donɛɛ lombori zaa, noba yaga taaɛ sagediibu tɛɛtɛɛ a kyaare yɛlɛ naŋ maŋ pɔge neɛ saŋa na o soba naŋ kpi. Kyɛ, a yɛlɛ na zaa noba naŋ sagedi na zaa naaneŋ e yelmeŋɛ.

• Ka hooŋ soore noba naŋ be ho gbandige na poɔŋ ka ka neɛŋ wa kpi boŋ maŋ pɔgoo, wala baŋ na yel ko bo?

 4. Ka teneeŋ baŋ yɛlɛ naŋ maŋ pɔge neɛ saŋa na oŋ kpi, a na soŋ teŋ yaga

Ka teneeŋ baŋ yɛlɛ na meŋɛ naŋ maŋ pɔge neɛ saŋa na oŋ kpi, te koŋ zoro kũũni dabeɛ̃. Kanne Ikilisiasitiz 9:10, a kyɛ gyieli a soorebiri ŋa yɛlɛ:

• Kũũni na baŋ e teŋ yelfaa kaŋa bee?

Ka teneeŋ sage yɛlɛ na a Baabole naŋ yel kyaare kũũ na di, lɛ na vɛmeŋ ka te tage te menne yi te sããkommine yeltuurii na noba naŋ maŋ erɛ ka ba pɛle kũũni poɔ na eŋɛŋ. Lɛ na vɛmeŋ te koŋ de puoruu korɔ kũũni meŋ. Kanne Aizeeya 8:19 ane Yel-iriwulaa 4:11, a kyɛ gyieli a soorebiri naŋ tu na yɛlɛ:

• Noba mine maŋ puoree kũũni, a kyɛ maŋ lɛ gaa kũũni zie a te bɔ sommo. Ho teɛre ka bo teɛroŋ ka Jehoova taa kyaare a yɛlɛ ŋa?

5. Ka teneeŋ baŋ yɛlɛ naŋ maŋ pɔge neɛ saŋa na oŋ kpi, a na dii la te sukyie

Ba wulee noba yaga ka, ka ba naŋ e yelfaare kyɛ kpi, ba na nyɛ la dɔgroŋ yaga. Kyɛ te baŋɛɛŋ ka neɛzaa, haali noba naŋ toŋ toŋfaare naŋ e nimizeɛ gba, ba ba maŋ lɛ baŋ yelzaa, ba eŋɛ meŋ ba maŋ lɛ beɛrɛ. Kanne Urom 6:7, a kyɛ gyieli a soorebiri ŋa yɛlɛ:

• A Baabole yelka, ka neɛŋ wa kpi, o soba nyɛ la faabo yi o yelfaare poɔŋ. Ho teɛre ka ka neɛŋ e yelfaare kyɛ kpi, o kũũ puoreŋ Naaŋmen na dɔgrɛɛ o soba bee?

Ka teneeŋ zanne baŋ Jehoova yɛlɛ soŋ, te na wa nyɛŋ ka o koŋ sage dɔgre noba naŋ kpi na. Kanne Duturoonomi 32:4 ane 1 Gyɔɔn 4:8, a kyɛ gyieli a soorebie naŋ tu na yɛlɛ:

• A sɛgre ŋa teŋ kanne na wulee Naaŋmen gyog-sonne mine, ho teɛre ka Naaŋmen na taa la a gyog-sonne ŋa a kyɛ tere sori ka ba dɔgre noba naŋ kpi na bee?

• A Baabole yeleeŋ ka ka neɛŋ wa kpi o soba ba maŋ dire dɔgɛɛ. A yɛlɛ ŋa dii la ho sukyiri bee? Bonso hoŋ yel lɛ?

 A ZANNOO YELNIMIZEERE

Ka neɛŋ wa kpi, o nyɔvore maŋ baareŋ, o ba maŋ lɛ be zie zaaŋ. Kũũni ba dire dɔgɛɛ zaa, ba koŋ baŋ e noba naŋ voorɔ yelfaa zaa.

Bo Hoŋ Zanne

• Ka neɛŋ wa kpi, boŋ maŋ pɔgoo?

• Ka teneeŋ baŋ yɛlɛ naŋ maŋ pɔge neɛ saŋa na oŋ wa kpi na, bo tɔnɔ teŋ na nyɛ?

• Ka teneeŋ baŋ yɛlɛ naŋ maŋ pɔge neɛ saŋa na oŋ wa kpi na, sobuo ka lɛ na toɔ̃ dii te sukyie?