Ye o dzèèya ndinding woé? Éyòng be tele akia étié té, abui da kare sili na: ‘Dzé ben ya loren amvus awu? Ye ma yi fò bare yen é bot bama be nga man wu?’ A ayègè di ai é di da zu, wò yi bi biyalen bia ve awono bi sò a Bibel.

1. Dzé ya loren éyòng mot a he wu?

Yésus a nga veg awu ai oyò. Ai zen fé oyò ai awu bia fulen? Éyòng mot a ne a mfang oyò, a yem ki é mam mese ma loren a mbgaa dzié. Dzam deda fe éyòng mot a he wu, a woren ki fe mintié mizing. Bibel a dzo na: “Bewu ba yem ki dzom zing” (Lang’a Ékklésiast 9:5).

2. Nfi mbé bia nòng éyòng bia yem é bebela a tii ai awu?

Abui bot da mbara awu; bevòk be mbarega bewu! Veda é dzam Bibel a dzo a tii ai awu da ve bia awono. Yésus a nga dzo na: “Bebela a yi mina bò fili” (Yohannes 8:32). Abui minyebe mia yegele na éyòng mot a wu, dzom zing a nyòl dzié ya ke osu na ya nying, dzam da seki éye Bibel a yegele nala. Mbol bewu ba yem ki tò dzom zing, ba wog ki mintié ai be seki bi dzam bò abé zing. É seki ai nfi na bi lugu bewu, nge a bò dzom zing éfe asu yi na te ba wog olun ai bia, ngeki a kogelen asu daba.

Abui bot ba dzo na ba lèè ai bewu. Ve nala o seki dzam bòben. Ane bi ndem yen, “bewu ba yem ki dzom.” É ba ba tsog na ba lèè ai bewu baba, bebé minsisim mbò ba dug bò na be ne é bot baba be nga man wu. A yem é bebela a bebe bewu a vòli bia na bi saala bebé minsisim. Yéhova a béndé bia na te bia bare dzeng na bi lèè ai bewu baan amu a yem na a ne mesis asu daan nge bi bi nkalena ai bebé minsisim (Lang’a Deutérònòm 18:10-​12).

3. Étié bewu é ne éfé?

A si ése, minyegelen mi ne mekia mekia mi bebege dzé ya bòben éyòng mot a wu. Ve minyegelen mité mise mi seki dzam bò bebela.

• Dzé bot ya ngòra dzoé ba yebe é bebege awu?

 4. É bebela a tii ai awu a ve fili

A yem é bebela a bebe awu a vaa bia wòng bewu. Lang’a Ékklésiast 9:10 ai yalen a nsili hi:

• Ye bewu be ne bia dzam bò abé?

É dzam Bibel a yegele a bebege bewu da vòli bia na bi saala é metum mese metii ai bewu. Lang’a Yésaya 8:19 ai Akuli Mam 4:11, ai yalen a nsili hi:

• Mfaa woé, akia afé Yéhova a yen é bot ba kang bewu nge a sili bò nvòlen?

5. A yem é bebela a tii ai awu a wono bia

Be nga yegele abui bot na amvus awu daba ba yi bi éndegele amu bebé mimbòen miaba. A yem na éyòng mot a wuya a wog ki mintié, nge a bi éndengele, tò ényò a nga sem abui nala wa ve bia awono. Lang’a Romani 6:7 ai yalen a nsili hi:

• Mbol Bibel a lere na ényò a wuya a yaaneya ékola ya minsem mié, ye wò tsog na bewu ba dzugi amu minsem be nga bò osusua ngaa?

Ane bia yi ke osu na bia yem Yéhova, éye fe ndi dzaan na a tibili ki bewu ya yi ke osu na ya nang nala. Lang’a Deutérònòm 32:4 ai 1 Yohannes 4:8, ai yalen minsili mi tsaa mi:

• Éyòng bia tuene bindi é mefulu me Yéhova me ne é bifus bi, ye bi ne dzam tsog na Yéhova a ne dzam tibili bewu ngaa?

• Ye wò yen na é bebela a tii ai awu a ve awono? Asu dzé?

 OBALBAS

Éyòng mot a wu énying dzié ya tebe hala. Bewu ba wog ki mintié mizing ai be seki dzam bò é ba be vee abé.

Dzé bia baala

• Dzé ya loren amvus awu?

• A yem é bebela a tii ai awu a vòli bia ai dzé?

• Asu dzé a yem é bebela a tii ai awu a ve bia awono?