Ye é môt wa bira dzing a wu-hang ? Éyong abuiñ be tele aval étéñ té, be wôla sili naa : ‘Za dzam da lôran éyong bia wu ? Ye bi ne bera yen é bôt bia dzimle môs ézing ?’ Ayeghle di été, ya édi da zu, bia ye yen biyalane Bible a ve, bia fôlô n’nem.

1. Za dzam da lôran éyong bia wu ?

Yésu a nga vaghan awu ya ôyô nen. É môt a ne ôyô nen aa yem ki é dzam da bobane ñe minfeng. Aval avé be ne vaghan awu ya ôyô ? Niène môt a wu, aa wôrane ki fe mintèñ. Aa wôrane ki naa a ne étam, amben a nga bira dzing mengom mèñ ya é nda-bôt dzèñ. Bible a dzô naa : « Bewu baa yem ki dzam ézing. »—A lang Ecclésiaste 9:5.

2. Aval avé a yem é bebela a daghe bewu a ne bia vole ?

Abuiñ bôt ba ko awu wong—éba bevoo, ba ko fe bewu wong ! Ve, ô ne bele afôlô ya é dzam Bible a dzô nfa awu. Yésu a nga dzô naa : « Bebela da ye mina kôre. » (Jean 8:32) Abuiñ min’yebe mia yeghle naa, éyong môt a wu, nsisim wèñ wa tsini naa wa ning, ve, Bible ñe aa yeghle ki do. Éde, môt ézing aa dzukh ki niène a wu-hang. Ya fe naa, akal bewu baa yem ki fe dzam ézing, béé se ki fe bia bo mbia dzam, nge ki a bame bia éyong mbia dzam a zu. Akal té, déé se ki éban naa bia sili bo min’nem ôsi, a wume bo, nge ki faa a yaghlan akal deba.

Bôt b’ézing ba dzô naa be ne kobe ya bewu. Ve, dzam té déé se ki boban. Ane bi ndaghe de yeghe, bewu « baa yem ki dzam ézing. » É bôt ba tem naa ba kobe ya é bôt ba dzing be wu-hang, ba kobe ya bedémon nge ki demonios ba ñong meking ya meñuu é bôt be wu-hang. A yem bebela té a kame bia nfa bedémon nge ki demonios. Jehôva a bame bia naa bi taa dzeng naa bia kobe ya bewu, amu a yem naa a bo élat ya bedémon nge ki demonios da ye so bia minzukh.—A lang Deutéronome 18:10-12.

3. Yeghe bebela nfa étéñ bewu

Mevôm mese me ya si, bôt ba bunu abuiñ mam nfa é dzam da lôran éyong bia wu. Bebela a ne naa, minbunane mise mité mii se ki bebela.

• Za minbunane bôt be bele nfa étéñ bewu é vôm mi too ?

 4. É bebela a daghe awu a so bia abuan

A yem é bebela a daghe awu, da vole bia naa bi taa bera ko bewu wong. A lang Ecclésiaste 9:10, éyong té mia lèè minlang mia daghe nsili wa zu wi :

• Ye bewu be ne bia bame ?

Be bebela be ya Bible be ne fe kame bia nfa nbunane wa dzô naa bia yiène sili bewu min’nem ôsi nge ki a lughu bo. A lang Esaïe 8:19 ya Melere 4:11, éyong té mia lèè minlang mia daghe nsili wi :

• Ébe wa, za dzam Jehôva a wôran éyong a yen môt a kang nge ki a dzaa bewu avol ?

5. É bebela a daghe awu a fôlô bia

Abuiñ bôt be nga yeghe naa éyong ba ye wu, ba ye dzukh akal mbia be-mam be nga bo kaa naa be wu. Ve, a yem naa bôt baa dzukh ki éyong be wu-hang da fôlô bia, amben é môt a nga bo é mam me ne édedèè abé. A lang Beromain 6:7, éyong té mia lèè minlang mia daghe nsili wa zu wi :

• Nge aval bia lang de a Bible été, awu da kôre bia nfa minsem miè, ye wa tem naa é môt a wu-hang a ne dzukh akal bikop a nga bo a tèè ?

Nté bia tugha yem Jehôva, nté té bia ye wokh naa, Jehôva aa ve ki naa bôt be dzukh éyong be wu-hang. A lang Deutéronome 32:4 ya 1 Jean 4:8, éyong té mia lèè minlang mia daghe minsili mia zu mi :

• Ye é Nzame a bele aval mefulu ba tu bifus bi été, a ne yebe naa be tsibele é bôt be wu-hang ?

• Ye wa tem naa é bebela a daghe bewu da fôlô bia ? Amu dzé wa tem do ?

 AKIGHE BES

Éyong môt a wu, éning dèñ da sim. Bewu baa dzukh ki, béé se ki dzô é bôt be tèè é mam ma zu.

Ôbaghle

• Za dzam da lôran éyong bia wu ?

• Aval avé é bebela a daghe bewu da vole bia ?

• Aval avé é bebela a daghe bewu da fôlô bia ?