Ana wo dɔfo bi ewu pɛn? Sɛ hɛn dɔfo bi wu a, ɔyɛ yaw papaapa. Ntsi ɔyɛ a yebisa hɛnho dɛ: ‘Sɛ yewu a, ebɛn tsebea na yɛkɔ mu? Hɛn adɔfo a woewuwu no, ana yebohu hɔn bio dabi?’ Wɔ adzesua yi nye dza odzi hɔ no mu no, yebohu mbuae a Bible no dze ma wɔ dɛm nsɛmbisa yi ho, na iyi bɛkyekye wo werɛ paa.

1. Sɛ yewu a, ebɛn tsebea na yɛkɔ mu?

Jesus kaa dɛ, sɛ obi wu a, ɔtse dɛ dza ɔada hatsee. Sɛ obi da hatsee a, onnyim dza ɔrokɔ do. Ebɛnadze ntsi na yebotum dze owu atoto nda ho? Sɛ obi wu a, ɔnntse yaw biara na onnhu amandze so. Bible no ka dɛ: “Ewufo dze, wonnyim biribiara.”​—Kenkan Ɔsɛnkafo 9:5.

2. Sɛ yehu nokwasɛm a ɔfa owu ho a, ɔbɔboa hɛn dɛn?

Nyimpa pii suro owu, na binom mpo dze wosuro ewufo! Naaso dza Bible no ka fa owu ho no botum ama eenya awerɛkyekyer. Jesus kaa dɛ: “Nokwar no bɛyɛ hom adehye,” kyerɛ dɛ, nokwar no beyi hom efi nkowaasom mu. (John 8:​32) Ɔsom ahorow bi kyerɛkyerɛ dɛ, ɔkra bi hyɛ hɛn mu, na sɛ yewu a, ɔnodze onnwu da. Naaso ɔnnyɛ dɛm na Bible no kyerɛkyerɛ. Dɛm ntsi sɛ obi wu a, onnhu amandze biara. Afei, osiandɛ ewufo nnyim biribiara ntsi, sɛ obi wu a orunntum mmpira hɛn anaa ɔnnyɛ hɛn bɔn biara. Ntsi no ho nnhia dɛ yɛsom ewufo, yɛbɔ mpaa ma hɔn, anaadɛ yɛyɛ amandze bi dze pata hɔn mbrɛ ɔbɛyɛ a hɔn bo rummfuw hɛn.

Nyimpa binom ka dɛ wobotum nye ewufo edzi nkitaho. Naaso, dɛm asɛm no nnyɛ nokwar. Dɛ mbrɛ yeehu no, ewufo ‘nnyim biribiara.’ Binom bɔ mbɔdzen dɛ wɔnye ewufo bɛkasa. Naaso nokwasɛm nye dɛ, ɔnnyɛ ewufo no ankasa na wɔnye hɔn kasa no, na mbom ɔyɛ mbɔnsam anaa esunsum fi na wɔnye hɔn dzi nkitaho no. Asɛm no nye dɛ, dɛm mbɔnsam yi botum ayɛ hɔnho dɛ obi a oewu no. Sɛ yehu nokwasɛm a ɔfa owu ho a, ɔbɔbɔ hɛnho ban efi mbɔnsam ho. Jehovah nyim dɛ sɛ yɛnye mbɔnsam dzi nkitaho a, wobotum ahaw hɛn. Dɛm ntsi na ɔbɔ hɛn kɔkɔ dɛ mma yɛnye ewufo nndzi nkitaho no.​—Kenkan Deuteronomy 18:​10-​12.

3. Ebɛn tsebea paa na ewufo wɔ mu?

Ekɔ wiadze yi mu beebiara a, ɔsor adwen a obiara wɔ wɔ tsebea a ewufo wɔ mu no ho. Naaso dza nkorɔfo gye dzi fa owu ho no, ɔnnyɛ ne nyina na ɔyɛ nokwar.

• Wɔ wo mpotamu hɔ no, ebɛn adwen na nkorɔfo wɔ wɔ tsebea a ewufo wɔ mu no ho?

 4. Sɛ yehu nokwasɛm a ɔfa owu ho a, ɔbɔboa hɛn

Sɛ yehu nokwasɛm a ɔfa owu ho a, ɔremma yennsuro ewufo. Ma yɛnkenkan Ɔsɛnkafo 9:​5, na yensusu asɛmbisa yi ho:

• Aso ewufo botum epira hɛn anaa wɔaayɛ hɛn bɔn bi anaa?

Binom gye dzi dɛ ewufo botum ayɛ hɔn biribi, ntsi ɔyɛ a wɔpata hɔn anaa wɔsom hɔn mpo. Naaso, dɛm nkyerɛkyerɛ no nnyɛ nokwar. Sɛ yehu nokwasɛm a Bible no ka fa owu ho a, yɛrenngye nkyerɛkyerɛ a ɔtse dɛm no nndzi. Ma yɛnkenkan Isaiah 8:​19 na Nyikyerɛ 4:​11, na yensusu asɛmbisa yi ho:

• Sɛ Jehovah hu dɛ obi rosom ewufo anaadɛ ɔrohwehwɛ mboa efi hɔn hɔ a, ehwɛ a, ɔtse nka dɛn?

5. Sɛ yehu nokwasɛm a ɔfa owu ho a, yebenya awerɛkyekyer

Wɔakyerɛkyerɛ nyimpa pii ma wɔagye edzi dɛ sɛ wɔyɛ bɔn na wowu a, wɔbɔtwe hɔn asowa. Naaso nyimpa biara nnyi hɔ a sɛ owu a wɔtwe n’asowa. Hɔn a wɔyɛ bɔn akɛse no mpo, sɛ wowu a wɔronntwe hɔn asowa. Dɛm nokwasɛm yi a yeebohu no ka hɛn akoma to hɛn yamu paa. Ma yɛnkenkan Romefo 6:​7, na yensusu dɛm asɛmbisa yi ho:

• Bible no ka dɛ sɛ obi wu a, Nyankopɔn bu no bem wɔ no bɔn ho. Sɛ ehwɛ a, ana obi a oewu no ruhu amandze osian bɔn bi a ɔayɛ etwa mu no ntsi?

Sɛ yehu Jehovah yie paa a, yebohu dɛ ɔrennyɛ ewufo ayakayakadze da. Ma yɛnkenkan Deuteronomy 32:4 na 1 John 4:​8, na yensusu dɛm nsɛmbisa yi ho:

• Sɛ ehwɛ suban fɛɛfɛw a wɔaka dɛ Nyankopɔn wɔ yi a, ana isusu dɛ ɔbɛma wɔayɛ nyimpa a woewuwu no ayakayakadze?

• Aso nokwasɛm a ehu afa owu ho no akyekye wo werɛ? Ebɛnadze ntsi na ereka dɛm?

 DZA ESUA

Sɛ obi wu a, nna oewu. Ewufo nnhu amandze, na worunntum nnyɛ hɛn hwee.

Mbobɔdo

• Sɛ yewu a, ebɛn tsebea na yɛkɔ mu?

• Sɛ yehu nokwasɛm a ɔfa owu ho a, ɔbɔboa hɛn dɛn?

• Ebɛn kwan do na nokwasɛm a ɔfa owu ho no kyekye hɛn werɛ?