¿Ni tare mäkwe krütanina mäkän? Kukwe tare ye ngwane, nita nemen ngwentari jai. “¿Nita krüte ye bitikäre nüna täbe? ¿Nikwe ni mräkä tare nikwe ye tuaita?”. Biblia tä kukwe niere ni dimikakäre yebätä ja tötikai kukwe ja tötikara ne känti aune ja känenkäre yete.

1. ¿Nita krüte ye bitikäre dreta nemen bare?

Gata ye Jesukwe bämikani nita niken ja düke nguseta ye kwrere. ¿Drebätä gata ye ja erebe nita niken ja düke yebe? Ni iti tä niken ja düke nguseta ngwane, dreta nakainkä bäre ye ñaka gare ie. Ye erere, ni iti tä krüte ngwane ñaka nemena ja tare nike jire. Biblia tä niere “nitre krütanina yei kukwe ñaka niena gare jire” (mäkwe ñäkä Eclesiastés 9:5 yebätä).

2. ¿Kukwe metre nemen gare nie gata yebätä ye tä ni dimike ño?

Gata aune ni ngwaka ye jürä ni kwatibätä. Ye erere nemen bare mäbätä ngwane Biblia tä kukwe niere gata yebätä ye raba mä töi mike jäme. Jesukwe niebare: “Kukwe erametre yebiti mun rabadi tikaninte” (Juan 8:32). Nita krüte ye bitikäre alma tä nibätä abokän ñaka krüte jire drieta iglesia madakwe, akwa ye ñan ai drieta Bibliakwe aisete nita krüte ngwane ja tare nika ñaka. Nitre krütanina yei kukwe ñaka gare jire, aisete ñan raba kukwe blo nuainne nibätä. Yebätä mikadre ütiäte jai o kukwe ruäre nuaindre töi mikakäre jäme ribe ñaka.

Nitre ruäre raba blite nitre krütanina yebe tätre niere akwa ye ñan raba nemen bare jire, ñobätä ñan aune nibi gare nie erere nitre krütanina yei “kukwe ñaka niena gare jire”. Nitre ruäre tätre blite mrü ngwaka kwebe nütüta kwetre akwa metrere tätre blite chokalikrö ben. Kukwe metre gare nie nitre krütanina yebätä ye tä ni krie mike chokalitre yebätä. Nikwe ñaka ja töi mikadre blite mrü ngwakabe nieta Jehovakwe nie, ñobätä ñan aune ye tä ni mike blite chokalibe aune ye raba kukwe tare mike nemen bare nibätä (mäkwe ñäkä Deuteronomio 18:10-12 yebätä).

3. Nita krüte ngwane dreta nemen bare ye mike gare jai

Nita krüte yebätä kukwe keta kabre mikata täte kä jökräbiti tibien, akwa kukwe mikata täte ye jökrä ñan metre.

• ¿Nita krüte yebätä kukwe meden mikata täte mä käite?

 4. Kukwe metre gata yebätä tä ni mike kwäre

Kukwe metre gata yebätä tä nemen gare nie ngwane, ni ngwakare ye jürä ñan tä nemena nibätä. Ñäkädre Eclesiastés 9:10 yebätä aune kukwe ne kädriedre jabe:

• ¿Ni krütanina ye raba kukwe tare nuainne nibätä?

Ni krütani ñan ni nikadre yekäre kukwe nuaindre töi mikakäre jäme o mikadre ütiäte jai kukwe ye ngwarbe mikata täte, akwa kukwe metre Bibliabätä tä ni mike kware kukwe yebätä. Ñäkädre Isaías 8:19 aune Apocalipsis 4:11 yebätä aune kukwe ne kädriedre jabe:

• ¿Ni iti tä ni krütanina mike ütiäte jai o ja di kärere ie ngwane jata nemen ruin ño Jehovai?

5. Gata yebätä kukwe mikata gare metre ta ye tä ni töi mike jäme

Nitre kwati ie drieta, niaratre krütai ngwane, kukwe blo nuainbare kwetre yebätä ja tare nikai kwetre. Akwa nita krüte ye bitikäre ja tare nika ñaka aune nitre kukwe bärira blo nuainkä ñaka ja tare nike gare nie ye tä ni töi mike jäme. Ñäkädre Romanos 6:7 yebätä aune kukwe ne kädriedre jabe:

• Biblia tä niere gata yebiti ja mikani ngite ye ütiä bianta. Aisete, ¿nitre krütanina ye tätre ja tare nike ja mikani ngite kwetre ye ütiä biankäre raba ruin mäi?

Jehovata nemen gare bäri nie ngwane, bäri tä nemen gare nie niara ñaka tä nitre ngwakare ye mike ja tare nike. Ñäkädre Deuteronomio 32:4 aune 1 Juan 4:8, yebätä aune kukwe ne kädriedre jabe:

• ¿Ngöbö bämikata bersikulo nekänti ne raba nitre ngwakare ngwen ja tare nike raba ruin mäi?

• ¿Kukwe metre mikata gare gata yebätä ye tä ni töi mike jäme raba ruin mäi? ¿Ñobätä?

 DRE NIBI GARE MÄI

Ni iti tä krüte ngwane yete tä nüke mrä, ni krütani ye ñan ja tare nike aune ñan kukwe blo nuainne ni madabätä.

Ngwankäreta törö

• ¿Nita krüte ye bitikäre nüna täbe?

• ¿Kukwe metre gata yebätä gare nie ye ñobätä tä ni mike kwäre?

• ¿Kukwe metre gata yebätä gare nie ye ñobätä tä ni töi mike jäme?