Hali omuzigirwa wawe wafire si? Amango echintu chibabeze chili nk’echola chamakuhikira, hali oku wakachibaza: ‘Gurhe binababa enyuma y’okufa? Hali amango nji rhwashuba kubona abazigirwa berhu bafire si? Mw’elila somo n’elikulikireho, wabona ebishubizo bihirire omurhima Ebiblia ehaanire.

1. Gurhe binaba enyuma y’okufa?

Yesu alihuzenye olufu n’okuhondoberera omu ro. Omuntu wahonoberere arhaba amenyere ebili byagera eburhambi bwage. Nka gurhe olufu luli kuguma n’ero? Ey’omuntu afa, arhayunva amalumwa, arhayunva enkumbu, chiro akaba alisimire bera-bage n’abantu b’omulala gwage bwenene. “Ofire arhenji chintu n’echiguma chiro,” kwe Biblia ederhere.​—Osome Muhubiri 9:5.

2. Inyungu nchi rhwakapata nka rhwamamenya obukweri oku bilolere olufu?

Bantu banene banayubaha olufu—banayubaha chiro n’owafiire. Aliko ebye Bibilia ederhere oku bilolere owafire byakakurhuliriza. Yesu aliderhere: “Obukweri bwabashwekula.” (Yohana 8:32) Tofauti n’eby’amadini maderha, Ebiblia erhayigirize ok’omuntu ajira eroho kadafa linagenderera kulama ey’omuntu amala kufa. K’okuderha nta muntu onalibuka enyuma y’okufa. Echindi, bulala abafire barhenji chintu, intako bakarhujira. Che chirhumire birharhuhemere mpu rhubabembereze yi barharhubikira omujinya, changwa mpu rhubaharamye, birhanahemere mpu rhubajirire amahuno.

Bantu baguma banaderha mpu bakaganira n’abafire. Aliko, birhakashobokana. Nk’okurhwamamala kubona, abafire “barhenji chintu n’echiguma chiro.” Abanayinja bachibwira mpu bali baganira n’abazigirwa babo bafire, byakashobokana babe eyi bali baganira n’abazimu bali bachihala mpu b’abola bantu bafire. Bobuno okumenya obukweri oku bafire kunarhulanga oku bazimu. Yehova arhuhere omukonge oku rhurhapimaga chiro kuganira n’abafire bulala amenyere ok’okujira echintu choshi-choshi n’abazimu kwakarhubabaza.​—Osome Kumbukumbu 18:10-12.

3. Lola obukweri oku bilolere ehali y’omuntu wafire

Omu gulu lyoshi, abantu baherhe obuyemere burhali kuguma oku bilolere ebinaba enyuma y’okufa. Kweri, mu byoshi bayemerere, nta na bukweri chiro bulimo.

• Emunda olamire, buyemere buchi abantu bagwerhe oku bilolere ehali y’abantu bafire?

 4. Obukweri oku bilolere olufu bunarhulerhera enyungu

Okumenya obukweri oku bilolere abafire kunarhuma rhurhabayubaha. Osome Muhubiri 9:10, muje mwaganira kw’echila chibazo:

• Abafire bakarhujira kubi si?

Obukweri bwe Biblia bunashuba kurhulanga yi rhurhagwarha obuyemere mpu bihemere okubembereza abafire changwa rhubaharamye. Osome Isaya 8:19 na Ufunuo 4:11, muje mwaganira kw’echila chibazo:

• Owazize oku gurhe Yehova anachiyunva oku bilolere omuntu onaharamya, changwa onaja kumuhema owafire amurhabale?

5. Obukweri oku bilolere olufu bunarhurhuliriza

Bantu banene banayigirizwa oku amango bamafa bakwanene bahanwe eju y’ebijiro byabo bya mira. Aliko bihebere omurhima okumenya oku ntaye onahanwa enyuma y’okufa—chiro n’olala wakolere amaligo. Osome Waroma 6:7, muje mwaganira kw’echila chibazo:

• Obola rhwamasoma omu Biblia oku omuntu akafa ey’amajuha, na Mungu arhakachimuganjira echaha chage, owazize oku hali omuntu wafire oli walibuka eju y’amagosa mage ma mira si?

Okurhuli rhwagenderera kumenya Yehova, kurhunarhegera kanene oku nta mango akalibuza owafire. Osome Kumbukumbu 32:4 na 1 Yohana 4:8, muje mwaganira kw’ebila bibazo:

• Ka Mungu oherhe engeso zinja ntya ziyerekenwe mw’amala mandiko akayemera abafire balibuzwe?

• Obwene nk’obukweri oku bilolere abafire burhulirize si? Bulagurhe?

 OKU BUGEKE

Ey’omuntu afa, akalamo kage kanahwa. Owafire arhalibuka, na ntako akajira abazene.

Rhuchiyibusye

• Gurhe binaba enyuma y’okufa?

• Bichi rhuyungukire omu kumenya obukweri oku bilolere olufu?

• Bulagurhe obukweri oku bilolere olufu burhurhulirize?