Is xon yemant kextorep woos tuu liipst? Wën ma soo was xlimes mit macht, froot ma sich im xtant: ‘Was pasiirt wën een mënx xtërpt? Meecht mer tee wiiter tsu siin kriin?’ In tiise lisyoon un in ti neekst, wëre mer siin tas ti antwort fon te Piipel uns troost kept.

1. Was pasiirt wën een mënx xtërpt?

Yeesus ferklaych te toot mit een tiife xloof. Weer tiif xlooft wees net was um iim rom pasiirt. Uf was fer aat ferklaycht sich te toot mit te xloof? Noo tëm toot, xpiirt te mënx kaar niks. Tee xpiirt khee phayn un tuut net mee layte. Ti Piipel saat tas “ti toote wise kaar niks mee”. — Lees Eklesyastes 9:5.

2. Warom is es kuut se wise was noo tëm toot pasiirt?

Fiil layt hon angst fom toot — un hon soo kaar angst fon te toote! Awer wise was ti Piipel in lërnt iwich te toot peruycht uns. Yeesus saat: “Ti woerheet tuut aych fray mache.” (Yoohan 8:32) Etliche relichyoone lërne tas yeete eene een unxtërplich seel hot, awer ti Piipel lërnt tas net. Tii lërnt tas nimant phayn xpiirt noo tëm toot, un noch, ti toote khene uns khee xaate mache, wayl se niks mee wise was am pasiire is. Tan, prayche mer niks mache fer ti toote kefale orer aan peete un aach net peete fer tëne.

Etliche saan tas se khene mit te toote xpreche. Awer tas is net meechlich. Wii mer kraat kesiin hon, “ti toote wise kaar niks mee”. Weer tenkt tas se mit een fraaynt orer ferwanter woo kextorep is xprecht, khan soo kaar mit een temoon xpreche woo sich aan xtelt als wën tee te ferxtorpene weyer. Tes weeche, wise ti woerheet iwich te toot xitst uns fon te temoone. Yeehoowa saat mer sole net fersuuche mit te toote xpreche, wayl tee wees tas ti temoone kefeerlich sin. — Lees Teuteronoomyum 18:10-12.

3. Ti woerheet iwich was mit te toote pasiirt

Mënxe uf te kans welt hon unerxiitliche klaape iwich was im toot pasiirt. Awer natiirlich, khene net ale klaape richtich sin.

• Un woos tuu woonst, was klaape ti layt iwich tëm toot?

 4. Tas is nutslich fer uns ti woerheet iwich tëm toot wise

Lërne ti woerheet iwich tëm toot, heleft uns ti angst fon te toote ferliire. Leest Eklesyastes 9:10. Noochte xprecht iwich tiise frooch:

• Meechte ti toote uns xaate mache?

Wën mer ti woerheete fon te Piipel wise, tan klaape mer net tas mer mise ti toote kefale orer aan peete. Leest Isayas 8:19 un Apokalipsis 4:11. Noochte xprecht iwich tiise frooch:

• Wii mënst tuu tas Yeehoowa sich xpiirt wën yemant ti toote aan peet orer ferlangt hilef fon yemant woo xon kextorep is?

5. Ti woerheet wise iwich tëm toot treest uns

Fiil layt klaape tas noo iire toot wëre se kextrooft weeche ferkheerte tinge woo se kemacht hon. Awer tas treest uns wise tas mer noo tëm toot net layte, ale tëm woo mer xlechte tinge kemacht hon. Leest Romaaner 6:7. Noochte xprecht iwich tiise frooch:

• Ti Piipel saat tas wën een mënx xtërpt, petsaalt tee sayn sinte. Soo, mënst tuu tas wën yemant kextorep is, mus tee noch layte fer ti sinte petsaale woo tee kemacht hot?

Weer Yeehoowa khënt, wees tas tee teet nii lose tas ti toote ferkweelt teete wëre. Leest Teuteronoomyum 32:4 un 1 Yoohan 4:8. Noochte xprecht iwich tiise frooche:

• Meecht soo een Kot, mit te kwaliteete woo mer in tiise wërse keleest hon, ti toote ferkweele?

• Treest tich tas ti woerheet wise iwich was im toot pasiirt? Warom?

 IN KHORTSE WËRTER

Wën yemant xtërpt, wees tee kaar niks mee. Ti toote tuun net layte un khene aach net ti lepeentiche xaate mache.

Was hon mer kelërnt?

• Was pasiirt wën een mënx xtërpt?

• Warom is tas nutslich fer uns ti woerheet wise iwich tëm toot?

• Warom treest uns tas ti woerheet wise iwich tëm toot?