Hapo wa rora okuzepaisa omundu ngwa suverere tjinene? Moruveze oruzeu ndwo, ove mape ya o ripura omuini kutja: ‘Hapo pe tjitwa tjike indu tji twa koka? Hapo matu yenene okukamuna ovasuverwa vetu mba ṱa rukwao?’ Mehongwa ndi na ndi mari kongorere ko, tara komaziriro wOmbeibela omahuhumiṋe.

1. Hapo pe tjitwa tjike ku eṱe indu tji twa koka?

Jesus wa sasaneka onḓiro ku nokurara ozomboṱu ozonḓeu. Omundu tja rara ozomboṱu ozonḓeu, eye ka tjiwa imbi mbi mavi tjitwa ongondoroka na ye. Omomuano uṋe onḓiro mu i ri tjimuna okurara ozomboṱu? Omundu tja zu nokuṱa, eye ka fula omihihamo. Nandarire kutja wa suverere omapanga we neṱunḓu re tjinene, eye ke rimunu ourike. Ombeibela i tja: “Ovakoke kave tjiwa otjiṋa.”—Lesa Omuzuvarise 9:5.

2. Okutjiwa ouatjiri ohunga nonḓiro ku tu vatera vi?

Ovandu ovengi ve tira okukoka nu nandarire ve tira ovandu mba ṱa. Posi ya imbi Ombeibela mbi honga ohunga nonḓiro mavi yenene okukuhuhumiṋa. Jesus wa tja: ‘Ouatjiri mau mu kutura.’ (Johanes 8:32) Ozongamburiro tjiva ze honga kutja pe notjiṋa tji tji hupa komurungu indu omundu tja ṱu. Posi yokutja Ombeibela kai hongo nao. Ku nao, kape nomundu ngu kara momihihamo tja ṱu. Nu wina mena rokutja ovakoke kave tjiwa otjiṋa, owo kamaave yenene okutuhihamisa. Mena ranao eṱe katu nokuhepa okurikotamena kovaṱi, poo okuvetjitira oviṋa kokutja ave he tu pindikire.

Ovandu tjiva ve tja mave yenene okuhungira ku novandu mba ṱa. Posi yokutja iho kamaatji yenene okutjitwa. Orondu otja tji twe rihongo, “ovakoke kave tjiwa otjiṋa.” Imba mbe muna kutja ve hungira ku novasuverwa vawo mba ṱa, owo ve hungira ku nozondemone nḓe tjita aayo ovandu mba ṱa. Ku nao, okutjiwa ouatjiri ohunga nonḓiro ku tu tjevera kozondemone. Jehova u tu rakiza kutja atu ha kondjo okuhungira ku novandu mba ṱa, mena rokutja eye u tjiwa kutja okutjita nao maku tu hakaenisa ku nozondemone nḓe kondja okutuhihamisa.—Lesa Deuteronomium 18:10-12.

3. Rihonga ouatjiri ohunga nongaro yovaṱi

Ovandu ovengi mouye ve kambura moviṋa pekepeke ohunga nokutja pe tjitwa tjike ku eṱe indu tji twa koka. Otjiperi kutja oviṋa avihe mbi ve kambura mo kamaavi rire ouatjiri.

• Ovikwaye ovandu mu ve kambura mo tjinene ohunga nongaro yovaṱi momaturiro woye?

 4. Okutjiwa ouatjiri ohunga nonḓiro ku tu vatera

Okutjiwa ouatjiri ohunga nonḓiro ku tu vatera kutja atu ha tira ovaṱi. Lesa Omuzuvarise 9:10, nu okuzambo hungirira kepuriro ndi:

• Hapo ovaṱi mave yenene okutuhihamisa?

Ouatjiri wOmbeibela wina u tu tjevera komahongero wokutja ovaṱi mave sokurikotamenwa. Lesa Jesaja 8:19 nOmavandururiro 4:11, nu okuzambo hungirira kepuriro ndi:

• Hapo mo munu kutja Jehova u fula vi indu omundu tji me rikotamene kovaṱi poo okupaha ombatero yawo?

5. Okutjiwa ouatjiri ohunga nonḓiro ku tu huhumiṋa

Ovandu ovengi ve raerwa kutja, omundu tja ṱu u katatumisiwa mena roviṋa ovivi mbya tjita. Posi ya ku tu huhumiṋa okutjiwa kutja kape nomundu ngu tatumisiwa kombunda yonḓiro, nandarire omundu ngwa tjita oviṋa ovivi tjinene. Lesa Ovaroma 6:7, nu okuzambo hungirira kepuriro ndi:

• Ombeibela i tja omundu tja ṱu, Mukuru ke mu vara omunandjo rukwao mena rouvi mbwa tjita. Ku nao, hapo mo munu kutja omundu ngwa ṱu u tatumisiwa mena roviṋa ovivi mbya tjita morukapitaveze?

Otja tji matu utu okutjiwa Jehova nawa, opu matu utu okumuna kutja eye kamaa yandjere ovaṱi okutatumisiwa. Lesa Deuteronomium 32:4 na 1 Johanes 4:8, nu okuzambo hungirira komapuriro nga:

• Hapo Mukuru wovikaṋena mbya tamunwa momazeva ngu twa lese kombanda mba ma yandjere kutja ovaṱi ve tatumisiwe?

• Hapo okutjiwa ouatjiri ohunga nonḓiro maku ku huhumiṋa? Omena raye?

 OKUYARUKIRA PO OUSUPI

Omundu tja ṱu, ehupo re ri yandera mbo. Ovaṱi kave tatumisiwa, nowo kamaave yenene okuhihamisa ovanamuinyo.

Okurizemburukisa

• Pe tjitwa tjike ku eṱe indu tji twa koka?

• Hapo okutjiwa ouatjiri ohunga nonḓiro ku tu vatera vi?

• Hapo okutjiwa ouatjiri ohunga nonḓiro ku tu huhumiṋa vi?