Tsawra ai marai langai si mat ai hpe hkrum ga ai kun? Dai zawn yakhkak nga ai aten hta, ‘anhte si mat ai shaloi hpa byin mat ai kun? Anhte tsawra ai ni hte kalang bai hkrum lu na kun?’ ngu nna myit chye ai. Ndai daw hte hpang na daw hta, shalan shabran lam lu shangun ai Chyum Laika mahtai ni hpe hkaja lu na re.

1. Anhte si ai shaloi hpa byin mat ai kun?

Yesu gaw si ai hpe grai yup pyaw nga ai hte shingdaw da ai. Grai yup pyaw nga ai masha langai gaw, shi a makau grup-yin hta hpa byin nga ai hpe n chye ai. Si ai hte yup ai gaw gara hku bung ai kun? Marai langai si mat wa ai hpang, shi hpa mung n hkamsha sai. Manang ni hte nta masha ni hpe shi kade tsawra tim, garen gari ai ngu n hkamsha sai. “Si mat ai ni chyawm gaw hpa n chye ma ai” ngu Chyum Laika hta tsun da ai.​—Hpaji 9:5 hpe hti u.

2. Si mat ai ni hte seng nna tengman ai lam hpe chye da ai gaw gara hku akyu lu ai kun?

Masha law law gaw, si na hpe hkrit ai sha n-ga, si ai ni hpe mung hkrit ai. Raitim, si ai hte seng nna Chyum Laika hta tsun da ai lam gaw, nang hpe shalan shabran ya lu ai. “Teng man ai gaw, nanhte hpe shalawt dat na ra ai” ngu Yesu tsun ai. (Yawhan 8:32) Masha langai si mat ai hpang, lama ma gaw naw asak hkrung nga ai ngu nawku htung nkau mi sharin ya ai. Raitim, Chyum Laika hta dai hku n tsun da ai. Dai majaw, si mat wa ai ni gaw hpa mung n hkamsha sai, hpa mung n chye sai majaw, anhte hpe shoihpa n lu jaw sai. Dai majaw, si mat ai ni hpe myit pyaw hkra galaw na matu, shanhte hpe nawku na matu, akyu hpyi ya na matu mung n ra sai.

Masha nkau mi gaw, si mat ai ni hte shanhte matut mahkai lu ai ngu tsun ma ai. Raitim, dai gaw n mai byin ai. Anhte chye wa sai hte maren, si mat ai ni gaw ‘hpa n chye sai.’ Si mat ai ni hte matut mahkai lu ai ngu tsun nga ai ni gaw, kaja nga yang, si mat ai ni zawn hpyi hpun da ai nat ni hte matut mahkai nga ai re. Dai majaw, si ai hte seng ai tengman lam hpe chye da ai gaw, nat ni a shoihpa kaw na anhte hpe makawp maga ya ai. Nat ni hte matut mahkai ai gaw, shoihpa jaw lu ai hpe Yehowa chye ai majaw, si ai ni hte n matut mahkai na matu anhte hpe sadi jaw da ai re.​—Tara Jahprang 18:​10-12 hpe hti u.

3. Si mat ai ni hte seng ai tengman lam hpe hkaja yu u

Si mat ai shaloi hpa byin mat ai hte seng nna, mungkan ting hta, kamsham ai lam amyu myu nga ma ai. Raitim, dai kamsham ai lam yawng gaw teng ai n re.

• Na a buga hta, si mat ai ni a masa lam hte seng nna hpa hpe kam ai kun?

 4. Si ai hte seng ai tengman lam gaw anhte hpe akyu jaw

Si ai hte seng nna tengman lam hpe chye ai gaw, si ai ni hpe hkrit ai kaw na lawt shangun ai. Hpaji 9:10 hpe hti nna, ndai ga san hpe bawngban u:

• Si mat ai ni gaw anhte hpe shoihpa jaw lu ai kun?

Si ai ni hpe myit pyaw hkra galaw ya ra ai, nawku ra ai ngu ai masu ga ni hpe n kam na matu, Chyum Laika tengman lam gaw makawp maga ya ai. Esaia 8:19 hte Shingran 4:11 hpe hti nna, ndai ga san hpe bawngban u:

• Masha langai gaw, si mat wa ai marai langai ngai kaw na karum lam tam ai (sh) nawku ai nga yang, Yehowa gara hku hkamsha na ngu nang shadu ai kun?

5. Si ai hte seng ai tengman lam gaw anhte hpe shalan shabran ya

Masha law law gaw, shanhte si mat ai hpang lai wa sai aten hta galaw wa ai n kaja ai lam ni a matu, ari jaw hkrum na re ngu sharin achyin hkrum ma ai. Raitim, si mat ai hpang kadai mung ari jaw hkrum na n re, nhkru ai lam hpe galaw wa ai masha ni pyi, ari jaw hkrum na n re ai hpe chye lu ai gaw, anhte hpe shalan shabran lam lu shangun ai. Roma 6:7 hpe hti nna, ndai ga san hpe bawngban u:

• Si ai lam gaw, masha langai hpe mara kaw na lawt shangun ai ngu Chyum Laika hta tsun da ai nga yang, lai wa sai aten na mara ni a majaw, si mat ai hpang ari jaw hkrum na ngu nang shadu ai kun?

Yehowa a lam hpe grau chye wa yang, si mat ai ni hpe galoi mung ari jaw na n re ngu ai hpe mung grau chye wa na re. Tara Jahprang 32:4 hte 1 Yawhan 4:8 hpe hti nna, ndai ga san ni hpe bawngban u:

• Ndai Chyum daw ni hta madun da ai atsam ningja ni hte hpring ai Karai Kasang gaw, si mat ai ni hpe htani htana zingri da na kun?

• Si ai hte seng ai tengman lam hpe chye ai gaw, nang hpe shalan shabran lam jaw ai kun? Hpa majaw kun?

 Kadun Dawk

Masha si mat ai shaloi, shi a prat htum mat sai. Si mat ai ni gaw ari n jaw hkrum ai zawn, asak hkrung nga ai ni hpe mung shoihpa n lu jaw sai.

Bai Maram

• Si mat ai shaloi hpa byin mat ai kun?

• Si ai hte seng ai tengman lam gaw, anhte hpe gara hku akyu jaw lu ai kun?

• Si ai hte seng ai tengman lam gaw, anhte hpe gara hku shalan shabran lam lu shangun ai kun?