A wa ka tongo figwa? Mu chibaka ichecho chi no gwadza, u ngana u ka zwibuzwa: ‘Ko shingikalani ha ti fa? A ti nga lingilila kuti towo bona ba ka fa kakale?’ Mu thuto iyeyi ne i no tobela, bona dabilo dzi no nyaladza dze Baibili.

1. Ko shingikalani ha ti fa?

Jesu wa ka fanisa lufu ne ku yizela. Nthu wa ka yizela ha a to khona ku bona kene ku hwa chi no shingikala. Lufu go fanana chini ne ku yizela? Shule kwe kuti nthu a fe, ha a to hwa zogwadza. Ne a ka be e da bakhwinya babe ne be nsha uwe, ha a to ba shuba. Baibili ikati: “Koga bafi abatoziba tjimwe.” Bala Nreri 9:5.

2. Ku ziba malebeswa ne kwe lufu ku nga ti batsha chini?

Bathu banjinji ba no cha lufu, kakale ba no cha bafi! Ngono u nga nyaladziwa ne chi no lebgwa ne Baibili ne kwe lufu. Jesu wa kati: “Malebeswa anowomusunungula.” (Johani 8:32) Dzikereke dzingwe dzo diya kuti kuna chingwe chi no dwilila chi chila mu nthu shule kwe lufu gugwe, ngono a te ili icho chi no diyiwa ne Baibili. Malebeswa wuti nthu wa ka fa, ha a to dziyila. Kakale, ne kuti ha ba to bona kene ku hwa chingwe, ha ba ngake ba ka ti kubadza kene ku ti hwisa zogwadza. A ku to shakika kuti ti like ku shathisa kene ku namata ba ka fa, kakale a ku to shakika kuti ti ba tembezelele.

Bathu bangwe ba kati, ti nga khona ku lebesana ne bafi. Ngono ichecho a chi to khoneka. Se kwa ta zwidiya, bafi “abatoziba tjimwe.” Ibabo ba no kumbula kuti ba no lebesana ne ba ka fa, dumbu ba ngana ba ka be be lebesana ne madimoni a no zwithama bathu ba ka fa. Ngono, ku ziba malebeswa ne kwe bafi ko ti vikila mu madimoni. Jehova u no ti budza kuti ti si like ku lebesana ne ba ka fa, ne kuti u no ziba kuti, ku amana ne madimoni kowo ti kubadza.​—Bala Ditironomi 18:10-12.

3. Zwidiye kuti dumbu chimo che bafi ini

Mu shango yose, bathu ba no dumila zwithu zwinjinji ne kwe kuti ko shingikalani ha ti fa. Ne kwa ka jalo, ha te ili kuti zwithu zose zwa ba no dumila i malebeswa.

• Kwa u no gala ko, bunji go dumilani ne kwe bafi?

 4. Ku ziba malebeswa ne kwe lufu ko ti batsha

Ku ziba malebeswa ne kwe lufu ko ti batsha kuti ti si che bafi. Bala Nreri 9:10, mu be mu lebesana ne kwe buzo i no tobela:

• A bafi ba nga ti kubadza?

Kakale chi no diyiwa ne Baibili cho ti vikila mu dumilo ye kuti bafi ba ka fanila ku shathisiwa kene ku namatiwa. Bala Izaya 8:19 ne Zumbunulo 4:11, mu be mu lebesana ne kwe buzo i no tobela:

• No kumbula kuti Jehova u no zwiwa chini ne kwe nthu u no kumbila batsho mu bafi?

5. Ku ziba malebeswa ne kwe lufu ko ti nyaladza

Bathu banjinji ba ka diyiwa kuti ha be fa, ba nowo dziyila ne kuti ba ka thama zwithu zwa ka bipa. Ngono ko ti nyaladza ku ziba kuti a kuna u no dziyila shule kwe lufu​—ne nthu dumbu wa ka thama zwithu zwa ka bipa kwazo. Bala Baroma 6:7, mu be mu lebesana ne kwe buzo i no tobela:

• Ku dwa mu na cha ta bala mu Baibili, lufu go sunungula nthu mu chibi. A u no kumbula kuti nthu wa ka be e thama zwithu zwa ka bipa, u no dziyila?

Ha ti dwilila ti ziba Jehova kwa ka paphidzika, towo bona kuti ha a ngake a ka thama kuti bafi ba dziyile. Bala Ditironomi 32:4 na 1 Johani 4:8, mu be mu lebesana ne kwe buzo dzi no tobela:

• A Ndzimu we buthu gu no thalusiwa mu ndimana idzedzi, u nga dumilila kuti bafi ba dziyidziwe?

• A u no duma kuti ku ziba malebeswa dumbu ne kwe lufu ko nyaladza? Ne kutini?

 CHA WA ZWIDIYA

Ha nthu e fa, buchilo gugwe go pela. Bafi ha ba to dziyila kakale ha ba nga kubadze ba no chila.

U Nga Tini?

• Ko shingikalani ha ti fa?

• Ku ziba malebeswa dumbu ne kwe lufu ko ti batsha chini?

• Ku ziba malebeswa dumbu ne kwe lufu ko ti nyaladza chini?