Hato don napdeng kiba ïeid ba thoiñ jong phi kiba la khlad? Ha kum kita ki por ba sngewsih kthang, lehse phi pyrkhat: ‘Kiba ïap ki long kumno? Hato don jingkyrmen ban ïohi biang ïa la kiba ïeid ba thoiñ kiba la khlad?’ Ha kane ka lynnong bad ha kaba bud, peit kumno ka Baibl ka ai ka jubab kaba pyntngen ïa ngi.

1. Kiba ïap ki long kumno?

U Jisu u pynïasyriem ïa ka jingïap bad ka jingïohthiah. U briew uba ïohthiah lyngngai um tip ei ei jia aïu ha sawdong jong u. Kumno ka jingïap ka ïa syriem bad ka jingïohthiah? Haba u briew u ïap, um sngew shuh ïa ka jingpang jingshitom, bad um don shuh kano kano ka jingsngew ruh. Ka Baibl ka ong: “Kiba ïap kim tip ei ei shuh.”—Pule Ekklesiastis 9:5.

2. Kumno ngi myntoi haba ngi tip ïa ka jingshisha shaphang ka jingïap?

Bun ki briew ki tieng ïa ka jingïap—bad wat ïa kiba ïap ruh! Hynrei phi lah ban ïoh jingtngen na kaei ba ka Baibl ka ong shaphang ka jingïap. U Jisu u la ong: “Ka jingshisha kan pyllait noh ïa phi.” (Ïoannis 8:32) Don ki niam kiba hikai ba ka mynsiem jong u briew ka im sah haba u la ïap. Hynrei kane kam dei ka jinghikai bashisha jong ka Baibl. Pynban, ym don uwei ruh uba jynjar hadien ba u la ïap. Bad ruh, namar kiba ïap kim tip ei ei shuh, kim lah ban ïarap ne pynjynjar ïa ngi. Na kata ka daw, ym donkam ban duwai ne ban leh ei ei na ka bynta jong ki.

Don kiba ong ba ki lah ban ïakren bad kiba ïap. Hynrei kata kam lah ban long. Kumba ngi dang shu dep pule, kiba ïap “kim tip ei ei.” Kito kiba tharai ba ki lah ban ïakren bad kiba ïap, ha ka jingshisha ki ïakren bad ki ksuid kiba wan ha ka dur jong kito kiba la ïap. Te ka jingtip ïa ka jingshisha shaphang ka jingïap ka ïada ïa ngi na ki ksuid. U Jehobah u maham ïa ngi ba ngim dei ban ïakren bad kiba ïap namar u tip ba ki ksuid ki lah ban pynsniew ïa ngi.—Pule Deuteronomi 18:10-12.

3. Ki briew kiba la ïap ki long kumno?

Ha kylleng ka pyrthei, ki briew ki don la ka jong ka jong ka jingngeit shaphang kiba ïap. Hynrei kumno baroh kita ki jingngeit ki lah ban dei kiba shisha?

• Ha ka jaka ba phi sah bun ki briew ki ngeit kumno shaphang kiba ïap?

 4. Ka jingshisha shaphang ka jingïap ka pynmyntoi ïa ngi.

Ka jingtip jong ngi ïa ka jingshisha shaphang ka jingïap ka pyllait ïa ngi na ka jingtieng ïa kiba ïap. Pule Ekklesiastis 9:10, bad nangta sa ïa peit lang ïa kane ka jingkylli harum:

• Hato kiba ïap ki lah ban pynsniew ïa ngi?

Ka jingshisha jong ka Baibl ka ïada ïa ngi na ka jingngeit bakla ba dei ban pynsngewbha ïa kiba ïap ne wat ban mane ruh ïa ki. Pule Isaïah 8:19 bad Jingpynpaw 4:11, bad nangta sa ïa peit lang ïa kane ka jingkylli harum:

• Kumno phi tharai U Jehobah u sngew ïa kito kiba mane ïa kiba la ïap ne wad jingïarap na ki?

5. Ka jingshisha shaphang ka jingïap ka pyntngen ïa ngi

Bun ki ïoh jinghikai ba haba ki briew ki ïap ki lah ban shah pynshitom katkum ka jingleh jong ki. Hynrei ka pyntngen ïa ngi ban tip ba ym don uwei ruh u briew u ban shah pynshitom hadien ba u la ïap—wat uba sniew tam ruh. Pule Rom 6:7, bad nangta sa ïa peit lang ïa kane ka jingkylli harum:

• Ka Baibl ka ong ba hadien ba u briew u la ïap, U Blei um ñiew shuh ïa u kum u nongpop. Te hadien ba u briew u ïap, hato phi tharai un dang shah pynshitom namar ki pop kiba u la leh mynshuwa?

Katba ngi nang tip shaphang U Jehobah, katta ngin nang sngewthuh ba lano lano ruh un ym pynshitom ïa kiba ïap. Pule Deuteronomi 32:4 bad 1 Ïoannis 4:8, bad nangta sa ïa peit lang ïa kine ki jingkylli harum:

• Hato U Blei uba don ïa kum kine ki jinglong u lah ban pynshitom ïa kiba ïap?

• Hato ka jingshisha shaphang ka jingïap ka pyntngen ïa phi? Balei?

 KI MAT BAKONGSAN

Haba u briew u ïap, ka jingim jong u ruh ka kut. Kiba ïap kim jynjar, ne kim lah ban pynsniew ïa ki briew.

Peit Biang

• Kiba ïap ki long kumno?

• Kumno ngi myntoi haba ngi tip ïa ka jingshisha shaphang ka jingïap?

• Kumno ka jingshisha shaphang ka jingïap ka pyntngen ïa ngi?