ILINNIAGASSAQ 29
Toqugutta qanoq pisoqassava?
Asasannik toqusoornikuuit? Artorsarninni immaqa apeqqutit uku eqqarsaatigivatit: Toqugutta qanoq pisoqassava? Asasatta toqusimasut takoqqinnissaat neriuutigisinnaavarput? Akissutit tuppallernartut Biibilimeersut ilinniagassami matumani tulliuttumilu sammineqassapput.
1. Toqugutta qanoq pisoqassava?
Jiisusip toqu itisuumik sininnermut assersuuppaa. Sinittup eqqamini qanoq pisoqarnera sianiginngilaa. Taamatuttaaq toqusimasoq anniarnanilu ilaquttani ikinngutinilu asasimasani maqaasinagillu kisimiittutut misiginngilaq. Tassa Biibilimi allassimasutut “[toqungasut] sunnguamilluunniit ilisimasaqanngillat.” – Oqaluussisartup oqaasii 9:5 atuarsiuk.
2. Toqu pillugu ilumoortup ilisimanera qanoq iluaqutigaarput?
Inuppassuit toqu toqusimasullu ersigisarpaat. Taamatut misigiguit Biibilimi allassimasut tuppallersaatigissavatit. Jiisusi ima oqarpoq: ‘Ilumoortup inussiaajunnaarsissavaasi.’ (Johannesi 8:32) Upperisarsioqatigiippassuarni ilinniartitsissutigineqarpoq toqusuitsumik tarneqartugut, Biibilimili taamaattoqarneranik allassimasoqanngilaq. Taamaattumik toqusimasut sumilluunniit ilisimasaqannginnamik anniarsinnaanatillu ajoqusersinnaanngilaatigut. Qinnutigullu taakkununnga sunniuteqarsinnaanngillat. Aamma iluareqqusaarfigisariaqarnagillu pallorfigisariaqanngilagut.
Inuit ilaat isumaqarput toqusimasut oqaloqatigisinnaallugit. Sammeriikkatsitulli toqusimasut ‘ilisimasaqanngimmata’ taamaattoqarsinnaanngilaq. Imaassinnaavoq asasaminnik toqusimasumik oqaloqatiginnissorisut anersaapiluit tassaasuusaartut inuit toqusimasut oqaloqatigisaraat. Toqu pillugu ilumoortoq nalunnginnatsigu anersaapilunnit tammartinneqassanngilagut. Jehovap nalunnginnamiuk anersaapiluit ajoquserusukkaatigut illersorniarluta toqusimasunik attaveqarniarsareqqunngilaatigut. – Mosesimik 5. 18:10-12 atuarsigit.
ITISILIINEQ
Toqu pillugu Biibilimi ilinniartitsissutigineqartoq paasiniaruk. Guutilu asannittoq toqusimasunik pillaaneq ajortoq upperfigineruleruk.
3. Toqusimasut pillugit ilumoortoq
Nunani assigiinngitsuni toqu toqusimasullu pillugit assigiinngitsunik isumaqartoqartarpoq. Soorunami upperisat assigiinngitsut tamarmik ilumoortuusinnaanngillat.
-
Illit nunagisanni toqusimasut pillugit qanoq upperisaqartoqartarpa?
Biibilimi ilinniartitsissutigineqartoq paasiumallugu VIDEO takusiuk.
Oqaluussisartup oqaasii 3:20 atuarsiuk apeqqutillu uku eqqartorlugit:
-
Versi naapertorlugu toqugutta qanoq pisoqassava?
-
Toqusut arlaannut ingerlaqqittarpat?
Jiisusip ikinngutigilluagaata, Laazarusip, toqunera Biibilimi oqaluttuarineqarpoq. Johannesi 11:11-14 atuarsigit maluginiarlugulu Jiisusip Laazarusi toqusimasoq qanoq inneraraa. Apeqqutit uku eqqartorsigit:
-
Jiisusip toqu sumut assersuuppaa?
-
Assersuussineq tamanna toqusimasut pillugit qanoq paasisaqarfigaarput?
-
Toqu pillugu Biibilimi allassimasut qanoq isumaqarfigaagit?
4. Toqu pillugu ilumoortup ilisimanera iluaqutigaarput
Toqu pillugu ilumoortoq ilisimagatsigu toqusimasut ersigisariaqanngilagut. Oqaluussisartup oqaasii 9:10 atuarsiuk apeqqullu una eqqartorlugu:
-
Toqusimasut ajoqusersinnaavaatigut?
Ilumoortoq Biibilimeersoq iluaqutigalugu paasivarput toqusimasut iluareqqusaarfigisariaqarnagillu pallorfigisariaqanngikkigut. Esaja 8:19b, NW a aamma Saqqummersitat 4:11 atuarsigit apeqqullu una eqqartorlugu:
-
Toqusimasunik pallorfiginnittoq taakkununngaluunniit ikiortissarsiortoq pillugu Jehova qanoq isumaqarsoraajuk?
5. Toqu pillugu ilumoortoq tuppallernarpoq
Inuppassuit ilinniartinneqarsimapput toqugunik iliuuserisimasatik pillugit naalliutsitaassallutik. Tuppallernarporli nalunagu kinaluunniit – allaat ajortuliungaarsimasoq – toquguni naalliutsitaassanngitsoq. Romamiut 6:7 atuarsiuk apeqqullu una eqqartorlugu:
-
Toqusoq ajortuliani pillugit isumakkeerfigineqartoq Biibilimi allassimammat, isumaqarpit toqusimasut ajortuliatik pillugit naalliutsitaasut?
Jehova ilisarisimaleratsigu paasivarput toqusimasut naalliutsinneqarnissaat akuerinngisaannassagaa. Mosesimik 5. 32:4 aamma Johannesimit 1. 4:8 atuarsigit apeqqutillu uku eqqartorlugit:
-
Guuti taama nuannertigisunik pissuseqarmat ilimagaajuk toqusimasut naalliutsitaanissaat akuerissagaa?
-
Toqu pillugu ilumoortoq tuppallersaatigaajuk? Sooq?
OQARTOQARTARPOQ: “Toqunissara annilaangagaara.”
-
Tuppallersarumallugu allassimaffiit Biibilimeersut sorliit takutissinnaavigit?
EQIKKAANEQ
Inuk toqusoq uumassuseeruttarpoq. Toqusimasut naalliunngillat, aamma ajoqusersinnaanngilaatigut.
Uteqqiineq
-
Toqugutta qanoq pisoqassava?
-
Toqu pillugu ilumoortup ilisimanera qanoq iluaqutigaarput?
-
Toqu pillugu ilumoortoq sooq tuppallernarpa?
NAMMINEQ MISISSUGASSATIT
Biibilimi oqaaseq “tarneq” allassimagaangat qanoq paasisariaqartoq paasiniaruk.
Guuti inunnik ajortunik anniarfimmi pillaasarnersoq paasiniaruk.
Toqusimasut ersigisariaqarpagut?
Toqu pillugu ilumoortup ilisimalernera angutip qanoq tuppallersaatigigaa atuaruk.
a Esaja 8:19b, NW: “Inuit Guutiminnut siunnersortissarsiussannginnerpat? Sooq toqusunut inuusut pillugit siunnersortissarsiussappat?”