Wune wathaholerwa? Okwa buthuku obukalire ng’obu, iwangana yibulya: ‘Thukabya omwa mibereki thukaholha? Mbwino hane amaha wosi-wosi aw’erisyalholha okwa babiriholha?’ Omw’Isomo lino n’erikakwamako, thukendi lebya erisubirya lye Biblia erikahimba.

1. Thukabya omwa mibereki thukaholha?

Yesu mwalinganisya olhuholho ng’othughotseri thunene kutsibu. Omundu oyuli omwa thughotseri thunene kutsibu syaliminya ebikabya aho ali. Olhuholho lhusosene lhuthi n’othughotseri? Omundu amaholha syalithasyowa obulhumi. Syalithasyabya omo mbwera, nomwangabya iniabya anzire bungahi abanywani n’abahughu biwe. E Biblia yikabugha yithi: ‘Abaholi sibasiki.’​—Soma Omugambuli 9:5.

2. Thukaghasirawa thuthi thukaminya ekwenene eyihambire okwa lhuholho?

Abandu bangyi bakubaha olhuholho​—kandi nibya n’abaholi! Aliwe ebya Biblia yikabugha okwa lhuholho byangana kuhumulikania. Yesu mwabugha athi: ‘Omwatsi w’ekwenene asyabaha obwiranda.’ (Yoane 8:32) Mbaghane n’ebya wandi madini akabugha, e Biblia siyiribugha yithi omundu ali mw’akalimu akatheholha. Neryo, sihali oyukaghalhawa enyuma w’olhuholho. Kandi, kundi abaholi sibasiki, sibanga thukolha nabi. Neryo sihali ekyangaleka thukaghonga-ghonga abaholi kutse eribaramya, kandi sihali ekyangaleka thukabasabira.

Abandi bandu bakabugha bathi bangana kanirania n’abaholi. Aliwe eki sikithokekene. Ngoku thwanamabirilhangira, abaholi “sibasiki.” Abakabugha bathi bakakaniranaya n’abandu babu ababiriholha, omo kwenene bakabya ibalikukanirania n’esyombinga esikayisosekanaya ng’abandu ababiriholha. Neryo eriminya ekwenene eyihambire okwa lhuholho kikathutheghaya okwa syombinga. Yehova akathukunga okw’ikanirania n’ababiriholha kundi anasi ngoku erikanirania n’esyombinga kyangana thukolha nabi.​—Soma Eryibuka Ebihano 18:10-12.

3. Minya nga ni mibere yahi ey’abaholi balimu

Erithimba omo kihugho kyosi, abandu bawithe esyonyikirirya muthina-muthina esihambire okwa bikathubyako thukaholha. Aliwe, esyonyikirirya esyosi esyo si syangabya isihikire.

• Ni nyikirirya syahi esihambire okwa mibere y’abaholi esikanyirire ewenyu?

 4. Ekwenene eyihambire okwa lhuholho yikathughasira

Eriminya ekwenene eyihambire okwa lhuholho kikaleka ithuthasagha abaholi. Soma Omugambuli 9:10, mwanakania okwa kibulyo kino:

• Mbwino abaholi bangana thukolha nabi?

Kandi ekwenene ye Biblia yikathutheghaya okwa nyikirirya ey’eribugha indi hatholere ihabya erihonga-honga abaholi kutse nibya eribaramya. Soma Isaya 8:19 na Eribisulirwa 4:11, mwanakania okwa kibulyo kino:

• Wukalengekanaya Yehova akayowa athi oko mundu oyukaramaya kutse erisondya obuwathikya oko yuwabiriholha?

5. Ekwenene eyihambire okwa lhuholho yikathuhumulikanaya

Abandu bangyi babirikangiriribwa indi bakendisyabya bakaholha, bakendi syaghalhwa busana n’ebya babirikolha. Aliwe kikathuhumulikanaya eriminya ngoku sihali oyukaghalhawa abiriholha​—nibya n’oyuwabirikolha ebindu bibi kutsibu. Soma Abanya Roma 6:7, mwanakania okwa kibulyo kino:

• Ngoku thwamabirisoma omwa Biblia, olhuholho lhwamabya ilhukaboholha omundu oko kibi, wukalengekanaya owosi-wosi oyuwabiriholha anemwaghalhwa busana n’eby’abirikolha?

Thukabya thukongera eriminya Yehova, kwa thukanongera thuthya eriminya ngoku syanga lighira abaholi eriaghalhwa. Soma Eryibuka Ebihano 32:4 na 1 Yoane 4:8, mwanakania okwa bibulyo bino:

• Mbwino Nyamuhanga oyuwithe emibere eyiri omwa milhondo eyi inianaligha eky’eriaghalya ababiriholha?

• Mbwino ekwenene eyihambire okwa lhuholho yanamakuhumulikania? Busana naki?

 OMWA BIKUHI

Omundu amaholha, engebe yiwe yikahwaho. Abaholi sibali ghalhawa, kandi sibanga kolha nabi abaliho.

Eriyibukya

• Thukabya omwa mibereki thukaholha?

• Ekwenene eyihambire okwa lhuholho yikathughasira yithi?

• Ekwenene eyihambire okwa lhuholho yikathuhumulikanaya yithi?