Nge me fwidilá muntu yina nge vanda zolá mingi? Na bantangu ya mpasi yina, nge lenda yufula: ‘Yinki ke kuminá beto na manima ya lufwa? Kilumbu kele kwandi yina mu ke talana dyaka na bantu ya munu yina me kufwaka?’ Na kileso yayi mpe yina ke landa beto ke tala bamvutu ya Biblia yina ke pesa beto ngolo.

1. Yinki ke kuminá beto na manima ya lufwa?

Yesu fwanisá lufwa na pongi ya ngolo. Muntu yina ke na lalá pongi ya ngolo lenda zaba ve yinki ke na lutá na kisika yina yandi kele. Wa’ faso lufwa ke mutindu pongi? Ntangu muntu ke kufwaka, yandi ke talá dyaka ve mpasi, mpe ata kima dyaka lenda nyongisa yandi. Ni na yawu Biblia ke zonzá: “Bantu ya kufwa ke zabaka kima ve”.—Tanga Longi 9:5.

2. Samu na yinki ya ke mbote na kuzaba matsyeleka na yina me tadila lufwa?

Bantu mingi ke na boma ya lufwa—mpe ya bantu ya kufwa! Kasi mambu yina Biblia ke zonzá samu na lufwa lenda katula nge boma. Yesu zonzá: “Butsyelika ke pesa beno kimpwanza.” (Yoane 8:32) Mabuundu mingi ke zonzá ti na manima ya lufwa, kima mosi ke basiká na nzutu ya beto, mpe ke kwendá zinga kisika ya nkaka. Kasi ni yina ve Biblia ke longá. Biblia ke longá ti, ata muntu ke talá mpasi na manima ya lufwa. Na yawu, samu bantu ya kufwa zaba ve ata kima, ba lenda talisa ve beto mpasi. Beto ke ve na nsatu ya kusambila bantu ya kufwa to kusala mambu yina ke sala ti ba talisa ve beto mpasi.

Bantu ya nkaka ke zonzá ti ba lenda solola na bantu ya kufwa. Kasi ya lenda salama ata fioti ve. Mutindu beto me longoka yawu, bantu ya kufwa, “ke zabá ata kima ve.” Beto simba mpe ti, bambazi ya yimbi ke na makoki ya kulanda ndinga, kubaka kizizi ya muntu yina kufwá mpe kubasikila bantu. Na yawu, bantu yina ke kanisá ti ba ke sololá na bantu ya kufwa, ntangu ya nkaka ke sololá ni na bambazi ya yimbi. Na yawu, kuzaba matsyeleka samu na lufwa, ke sadisa beto na kuvanda ntama na bambazi ya yimbi. Yehova ke niminá beto na kusosa kusolola na bantu ya kufwa, samu yandi zaba ti kana beto sala yawu, bambazi ya yimbi ke sala beto yimbi.—Tanga Kulonga Misiku 18:10-12.

3. Longoka yina ke kuminá bantu na manima ya lufwa

Na yinza nyonso, bantu ke kanisá mambu ya mutindu na mutindu na yina ke kuminá beto na manima ya lufwa. Kasi, nyonso yina lenda vanda ve ya tsyeleka.

• Na kisika yina nge kele, yinki bantu ke kanisá samu na yina ke kuminá bantu na manima ya lufwa?

 4. Bambote ya kuzaba matsyeleka na yina me tadila lufwa

Kuzaba matsyeleka samu na lufwa, ke katulá beto boma ya bantu ya kufwa. Tanga Longi 9:10, mpe na manima beto zonzila kyuvu yayi:

• Bantu ya kufwa lenda talisa kwandi beto mpasi?

Kukwikila na matsyeleka ya Biblia ke bumbá beto na kusambila ve bantu ya kufwa to na kuvanda ve na boma ya bawu. Tanga Izaya 8:19 na Luzabusu 4:11, mpe na manima beto zonzila kyuvu yayi:

• Samu na nge, yinki ya ke salá Yehova ntangu bantu ke sambilá bantu ya kufwa to ke sosá ba sadisa bawu?

5. Matsyeleka samu na lufwa ke zunisa beto

Ba longá bantu mingi ti ntangu ba ke kufwa, ba ke talisa bawu mpasi samu na yimbi yina ba salaka na luzingu ya bawu. Kasi ya ke zunisá beto na kuzaba ti ata muntu ke talá mpasi na manima ya lufwa—ata ti yandi salá mambu mingi ya yimbi. Tanga Baroma 6:7, mpe na manima beto zonzila kyuvu yayi:

• Biblia ke zonzá ti ntangu muntu ke kufwá, yandi ke futá mfuka ya disumu ya yandi. Nge me kanisa ti bantu ya kufwa ke talá dyaka mpasi samu na masumu yina ba salá ntangu ba vandá moyo?

Ntangu nge ke longoka mingi na kuzaba Yehova, nge ke zaba ti yandi ke nyokolá ata fioti ve bantu ya kufwa. Tanga Kulonga Misiku 32:4 na 1 Yoane 4:8, mpe na manima beto zonzila byuvu yayi:

• Nzambi na kimuntu ya yandi ya mbote faso beto me tanga yawu na baverse, lenda nyokola kwandi bantu ya kufwa?

• Nge me kanisa ti kuzaba matsyeleka samu na lufwa me zunisa nge? Samu na yinki?

 NA BUNKUFI

Ntangu muntu ke kufwaka, luzingu ya yandi ke sukaka. Muntu ya kufwa ke talá ve mpasi, mpe lenda talisa ve bantu yina ke moyo mpasi.

Mambu ya kusimba

• Yinki ke kuminá beto na manima ya lufwa?

• Wapi bambote beto ke kuzwa na kuzaba matsyeleka na yina me tadila lufwa?

• Wa’ faso matsyeleka samu na lufwa ke pesá beto ngolo?