Be nitie ng’at mihero ma nosetho? E kinde mag kuyo kaka mago, inyalo penjori niya: ‘Ang’o ma timorenwaga sama watho? Be wabiro neno wedewa kod osiepewa mosetho?’ E sulani kod ma luwo, wabiro neno dwoko ma Muma chiwo kendo dwokogo biro hoyowa ahinya.

1. Ang’o ma timorega ne ng’ato sama otho?

Yesu nopimo tho gi nindo matut. Ng’at ma nindo matut otero, ok ong’eyo gik ma timore kama entie. Ere kaka tho chalo gi nindo? Ka ng’ato osetho, ok owinj rem moro amora kendo ok osandre. Muma wacho niya: “Jo motho ok ong’eyo gimoro amora.”​—Som Eklesiastes 9:5.

2. Ng’eyo adiera e wi jomotho konyowa nade?

Ji mang’eny oluoro tho kod jomotho! Kata kamano, gima Muma wacho e wi tho nyalo hoyi. Yesu nowacho niya: “Adiera noketu thuolo.” (Johana 8:32) Dinde moko puonjo ni ka ng’ato otho, to chunye dhi nyime bedo mangima. Muma to ok puonj gima kamano. Ng’ato kosetho, ok osandre kamoro. Nikech jomotho ok ong’eyo gimoro amora, mano nyiso ni ok ginyal hinyowa. Omiyo, onge tiende lamo jomotho, lemonegi, kata timo gik moko mondo wamorgi.

Jomoko wachoga ni ginyalo wuoyo gi jomotho. To mano ok en gima nyalore. Mana kaka wasepuonjore, jomotho “ok ong’eyo gimoro amora.” Joma paro ni wuoyoga gi joma osetho nyalo bedo ni wuoyoga gi jochiende ma wuondore ni gin wedegi kata osiepegi ma ne osetho. Omiyo, ng’eyo adiera e wi jomotho konyowa mondo jochiende kik hinywa. Jehova siemowa ni kik watem wuoyo gi jomotho, nikech ong’eyo ni ka watudore gi jochiende, to gibiro hinyowa.​—Som Rapar mar Chik 18:10-​12.

3. Ng’e adiera e wi jomotho

E piny ngima, ji nigi paro mopogore opogore e wi gik ma timorenwa ka watho. To mano ok nyis ni parogo duto gin adier.

• Gin paro mage ma isewinjo ka ji wacho e wi jomotho?

 4. Ng’eyo adiera e wi tho konyowa

Ng’eyo adiera e wi tho konyowa mondo kik waluor jomotho. Som Eklesiastes 9:10, kae to uwuo e wi penjo ma luwoni:

• Be jomotho nyalo hinyowa?

Adiera ma Muma puonjo e wi tho konyowa mondo kik wuondwa ni nyaka walam jomotho, kata timo gik moko mondo wamorgi. Som Isaya 8:19 kod Fweny 4:11, kae to uwuo e wi penjo ma luwoni:

• Iparo ni Jehova neno nade ng’at ma lamo jomotho, kata ma manyo kony kuom ng’at motho?

5. Ng’eyo adiera e wi tho hoyowa

Osepuonj ji mang’eny ni joma timo gik maricho ibiro sand ka githo. Kata kamano, en gima hoyowa ng’eyo ni onge ng’at ma sandorega bang’ tho. Mano oriwo nyaka joma ne otimo gik maricho ahinya. Som Jo-Rumi 6:7, kae to uwuo e wi penjo ma luwoni:

• Kaluwore gi ndikono, ng’at ma osetho osewene richone kata osegonye kuom richone. Koro, be iparo ni ng’at ma osetho pod dhi nyime chandore nikech gik maricho ma notimo?

Kaka wamedo ng’eyo Jehova e kaka wamedo fwenyo ni ok onyal sando jomotho. Som Rapar mar Chik 32:4 kod 1 Johana 4:8, kae to uwuo e wi penjo ma luwogi:

• Kaluwore gi kido ma Nyasaye nigo miwuoye e ndikogo, be onyalo sando jomotho?

• Be ng’eyo adiera e wi tho en gima hoyi? Ang’o momiyo iwacho kamano?

 PUONJ MADUONG’

Sama ng’ato otho, ok odhi nyime bedo mangima. Jomotho ok sandre kendo ok ginyal hinyo jo mangima.

Ang’o ma ipuonjori?

• Ang’o ma timorenwa sama watho?

• Ng’eyo adiera e wi jomotho konyowa nade?

• Ng’eyo adiera e wi jomotho hoyowa e yo mane?