¿Të yˈooky tyëgoyë mjëëky mmëguˈuk? Pën të xypyaatyë duˈumbë ayoˈon, waˈan mnayajtëyëty: “¿Jukyˈäjtˈadëtsëmdaa muum wiinktsoo? ¿Waˈanëts näˈä jatëgok mëdë njëëky nmëguˈuk nnayˈix nnaybyäädëdët?”. Mä yäˈädë leksion ets mä jatuˈukpë, xyjyotkujkmoˈoyäˈänëm ko nnijäˈäwëm wiˈixë Biiblyë tˈatsoowëmbity.

1. ¿Jukyˈäjtˈadëtsëm wiinktsoo ko nˈoˈkëm?

Jesus duˈun ojts tˈijxkijpxyë oˈkën extëm ko nmëkmäˈäjëm. Ko tuˈugë jäˈäy të jyantsy myanaxy, kyaj tjawë ti tuun jäjtëp pyëˈääy. Nanduˈun jyaty ko nˈoˈkëm. Duˈun nyajpatëm extëm ko njantsy myëkmäˈäjëm, kyaj nekyˈayoˈowëm ets kyaj wiinktsoo nyajnäjxëmë jäj jëmuˈumën. Biiblyë jyënaˈany ko “oˈkpë nitii tkanekynyijawëdë” (käjpxë Eclesiastés 9:5).

2. ¿Wiˈix xypyudëjkëm ko nnijäˈäwëm ja tëyˈäjtën mä wiˈix yajpäättë oˈkpë?

Mayë jäˈäy tsëˈkëdëp yˈooktët ets tsyëˈkëdëp nanduˈun pënaty të yˈoˈknëdë. Perë Biiblyë nyimaytyakypy wiˈixë oˈkpë yajpäättë ets mbäät mjotkujkmoˈoyëty extëm tnimaytyaˈaky. Jesus duˈun jyënany: Ja “tëyˈäjtën yëˈë myajwëˈëmëdëp awäˈätstuuy” (Fwank 8:32). Näägë relijyonk tyukniˈˈixëdë ko pëtsëëmbë anmë mëdiˈibë wiinktsoo nëjkxp jukyˈäjtpë ko nˈoˈkëm. Per mä Biiblyë kyaj mä tnimaytyaˈaky ko nmëdäjtëm tuˈugë anmë mëdiˈibë kyaj yˈooky, pääty ko tuˈugë jäˈäy yˈooky kyaj nyekyˈayoy. Komë oˈkpë nitii tkanekyjyawëdë, kyaj mbäät xyˈaxëktuˈunëm. Pääty kyaj tiko ninuˈkxtakëm o jam ti nduˈunëm parë nbudëjkëm o nyajjotxaˈamëm.

Näägë jäˈäy myëbëjktëp ko mbäädë oˈkpë nmëtmaytyakëm, per extëm të njäjtëm mä Biiblyë, oˈkpë “nitii tkanekynyijawëdë”, pääty niwiˈixtsoo mbäät mëët ngakäjpx ngamaytyakëm. Pënaty myëbëjktëp ko mbäät tmëtmaytyäˈäktë oˈkpë, yëˈë nety myëtkäjpx myëtmaytyaktëbë kaˈoybyëtëjk mëdiˈibë duˈun nayajnäjxëp extëm ja oˈkpë. Pääty ko nnijäˈäwëm ja tëyˈäjtën mä wiˈix yajpäättë oˈkpë xykyuwäˈänëm mä kaˈoybyëtëjk. Jyobaa xyˈanmäˈäyëm ets nnaygyuentëˈäjtëm parë kyaj nmëtmaytyakëmë oˈkpëty, pes nyijäˈäwëp ko mbäät xyˈaxëktuˈunëm mët ko yëˈë nety mëët nduˈun ngäjpxëmë kaˈoybyëtëjk (käjpxë Deuteronomio 18:10-12).

3. ¿Wiˈix njäjtëm ko nˈoˈkëm?

Abëtsëmy naxwinyëdë tëgatsyatyë jäˈäy tmëbëktë mä wiˈix njäjtëm ko nˈoˈkëm. Per kyaj tukëˈëyë tyëyˈäjtënëty mëdiˈibë jäˈäy myëbëjktëp.

• Mä mijts mtsëënë, ¿wiˈixë jäˈäy tmëbëktë ko pën yˈooky?

 4. ¿Wiˈix xypyudëjkëm ko nnijäˈäwëm ja tëyˈäjtën mä wiˈixë oˈkpë yajpäättë?

Ko nnijäˈäwëm ja tëyˈäjtën mä wiˈix yajpäättë oˈkpë, ta kyaj nekytsyëˈkëm. Käjpxtë Eclesiastés 9:10 ets nimaytyäˈäktë mëdiˈibë yä yajtëëpy:

• ¿Mbäädë oˈkpë xyˈaxëktuˈunëm?

Ja tëyˈäjtën mëdiˈibë yajpatp mä Biiblyë, xypyudëjkëm parë kyaj nekymyëbëjkëm ko tsojkëp nwintsëˈkëmë oˈkpë o nwinˈyojx nwinnoˈkëm këdiibë wiˈix xytyuˈunëm. Käjpxtë Isaías 8:19 etsë Diˈibʉ Jatanʉp o Apocalipsis 4:11, ets nimaytyäˈäktë mëdiˈibë yä yajtëëpy:

• ¿Wiˈixëdaa Jyobaa nyayjyawëty ko tuˈugë jäˈäy twinˈyoxy twinnoˈogyë oˈkpë o tˈamdoyë naybyudëkë?

5. Xyjyotkujkmoˈoyëm ko nnijäˈäwëm wiˈixë oˈkpë yajpäättë

Mayë jäˈäy duˈun të yajtukniˈˈixëdë ko ja nëjkx tkumëdowdë ja pyoky kyaytyey ko yˈooktët. Per xyjyotkujkmoˈoyëm ko nnijäˈäwëm ko kyaj pën yˈayowäˈäny ko yˈoogët, ni yëˈë pënaty të jyukyˈattë jantsy axëëk. Käjpxtë Romanos 6:7, TNM ets nimaytyäˈäktë mëdiˈibë yä yajtëëpy:

• Extëm të ngäjpxëm mä Biiblyë, ko tuˈugë jäˈäy yˈooky ta nyiwatstäˈäyëty ja pyoky kyaytyey. Pääty wiˈix mˈokjënäˈäny, ¿japëdaa ja oˈkpëty tkumëdowdë extëm të jyukyˈattë?

Ko mas niˈigyë Jyobaa nˈixyˈäjtëm, ta mas niˈigyë njaygyujkëm ko yëˈë ninäˈä oˈkpë tkayaˈˈayowët. Käjpxtë Deuteronomio 32:4 etsë 1 Fwank 4:8, ets nimaytyäˈäktë mëdiˈibë yä yajtëëpy:

• Extëm mä yäˈädë tekstë yajnimaytyaˈagyë Dios, ¿yaˈˈayowëbëdaa pënaty të yˈoˈknëdë?

• Wiˈix mijts mˈokwinmay, ¿mjotkujkmooyëp ko xynyijawë wiˈixë oˈkpë yajpäättë? ¿Ets tiko?

 TI TË NJÄJTËM

Ko tuˈugë jäˈäy yˈooky jabäädë jyukyˈäjtën jyëjpkëxy. Yëˈë oˈkpë kyaj muum yˈayowdë ets kyaj mbäät xyˈaxëktuˈunëm.

Ajamyatsë

• ¿Jukyˈäjtˈadëtsëm wiinktsoo ko nˈoˈkëm?

• ¿Wiˈix xyaˈˈawäˈätspëtsëˈëmëm ko nnijäˈäwëm ja tëyˈäjtën mä wiˈixë oˈkpë yajpäättë?

• ¿Wiˈix xyjyotkujkmoˈoyëm ko nnijäˈäwëm ja tëyˈäjtën mä wiˈixë oˈkpë yajpäättë?