Uzye mwatala mwafwilwapo umwi wino mwatemilwe sana? Pa nsita iyo itale limwi mungayuzya ukuti: ‘I vyani vikacitika nga twafwa? Uzye tulatala tulolepo atemwikwa itu nupya? Mwi sambililo lii ni lilondelilepo, mumalola amasuko aya muli Baibo aakuteekezya.

1. I vyani vikacitika umuntu nga wafwa?

Yesu wakolinye imfwa uku kulaala utulo. Umuntu atalala asimanya ivikucitika. Uzye imfwa yakolana uli nu kulaala utulo? Ndi cakuti umwi wafwa, asiuvwa ukuwaya. Asiuvwa ukuzukilwa, asi mulandu na vino watemilwe ya cuza yakwe na ya lupwa yakwe. Baibo ikati: “Afwe yatamanya nanti acimwi.”—Belengini Kasambilizya 9:5.

2. Uzye ukumanya icumi pa mfwa kukatwazwa uli?

Antu aingi yakatiina ukufwa nupya yakatiina na antu afwe. Nomba vino Baibo ikalanda pa mfwa vingamikomelezya. Yesu walanzile ukuti: “Cumi cilamulenga ukuya antungwa.” (Yoani 8:32) Amu mipepele imwi yakasambilizya ukuti kwaya cimwi icikatwalilila ukuya nu umi umuntu nga wafwa, nomba vii asi vino Baibo ikasambilizya. Fwandi kusi umuntu aliwensi aakacula nga wafwa. Nupya pa mulandu wakuti afwe yasimanya icili consi, yatange yatucitile iviipe. Fwandi tutalinzile ukuyapepa nanti ukuyacitila ivintu vimwi pakuti yatatusokela, nupya tutalinzile nu kuyapepelako.

Antu yamwi yakalanda ukuti yangalanda na antu afwe. Nomba cii citange cicitike. Wakwe vino twasambilila, afwe “yatamanya nanti acimwi.” Yayo akaelenganya ukuti yakalanda na atemwikwa yao afwa, yangalanda ni viwa ivikaipanga ukuya wa yantu afwe. Fwandi ukumanya icumi pa mfwa kukatucingilila uku viwa. Yeova akatucelula ukuti tutalinzile ukulanda na afwe pano wamanya ukuti ukulanda ni viwa kungatuletelela.—Belengini Malango 18:10-12.

3. Sambililini icumi pali vino afwe yaya

Ukuzinguluka insi yonsi, antu yazumila ivipusanepusane pali vino vikacitika nga twafwa. Nomba asi vyonsi ivingaya ivya cumi.

• Uzye kuno mukaikala i vyani vino antu aingi yazumila apa mfwa?

 4. Ukumanya icumi pa mfwa kukatwazwa

Ukumanya icumi pa mfwa kukatulenga ukukanatiina afwe. Belengini Kasambilizya 9:10, alino mulanzyanye iuzyo lii:

• Uzye afwe yangatucitila iviipe?

Nga twataila icumi ca muli Baibo, tutalazumila ufi wakuti tulinzile ukucitila afwe vimwi nanti ukuyapepa pakuti yatatucuzya. Belengini Ezaya 8:19 na Kusokolola 4:11, alino mulanzyanye iuzyo lii:

• Uzye mukwelenganya ukuti Yeova akayuvwa uli pa yantu aakapepa afwe nanti aakalenga uwazwilizyo ukufuma uku yafwe?

5. Ukumanya icumi pa mfwa kukatuteekezya

Antu aingi yakayasambilizya ukuti nga yafwa yalayacuzya pa viipe vino yacitanga. Nomba cikatuteekezya ukumanya ukuti kusi aakacula nga wafwa ukwikako sile na yonsi aacisile ivintu iviipe sana. Belengini Loma 6:7, alino mulanzyanye iuzyo lii:

• Baibo ikalanda ukuti ndi cakuti umuntu wafwa, Leza asimupingula pa viipe vino wacisile, uzye lyene mukwelenganya ukuti umuntu umufwe angacuula pa viipe vino wacisile mpiti?

Lino tukuya tukumanyilako Yeova, tuliluka ukuti atalatala acuzye antu afwe. Belengini Malango 32:4 na 1 Yoani 4:8, alino mulanzyanye mauzyo yaa:

• Uzye Leza uwaya ni miyele iyatilumbulwa umu vikomo vii, angacuzya afwe?

• Uzye ukumanya icumi pa mfwa kwamuteekezya? U mulandu ci?

 VINO TWASAMBILILA

Ndi cakuti umuntu wafwa asiya nu umi. Afwe yasicuula nupya yatange yacuzye apuma.

I vyani vino mwasambilila?

• I vyani ivikacitika umuntu nga wafwa?

• Uzye ukumanya icumi pa mfwa kukatwazwa uli?

• Uzye ukumanya icumi pa mfwa kukatuteekezya uli?