Häst duu al air lijb mësch forspeelt ine dood? Wen soo’n traurigkët mit dij passijre däit, kan sin dat’s duu dij fråge däist. Wat passijrt wen air doodblijwt? Dau ik nij mër ais dës laiw mësch saie? Dës un dai anerd kapitel, daue oos wijse wosoo koine wij ruig blijwe doir dat wat dai Bijbel sägt.

1. Wat däit passijre wen air doodblijwt?

Jësus hät dai dood t’hoopmaint mit air mësch wat fast slåpe däit. Air wat fast slåpe däit, wät ni wat rund an em passijrt. Woweegen koine wij säge dai dood is soo’s fast slåpe? Wen dai mësch dood is, dai däit nischt mër forneeme, kain waidåg un kain slime daile. Dai Bijbel sägt “dai doore daue gewiss nischt mër waite”. (Lees Eclesiastes 9:5)

2. Wosoo kan dai wårhët oiwer dai dood oos helpe?

Feel lüür häwe angst fon dai dood un andrer häwe angst fon dai wat doodbleewe sin. Åwer, wat dai Bijbel oos inlëre däit, däit oos sër ruig låte. Jësus hät sägt “dai wårhët däit juuch fraimåke”. (João 8:32) Wek kirche daue inlëre dat dai sël fon dai lüür leewig blijwe däit. Åwer, dai Bijbel däit ni dit inlëre, dårweegen, wen dai mësch dood is, dai däit nischt mër doirsete. Den, dai doore koine oos nischt schåre, sai daue nischt waite. Soo, bruuke wij nischt måke taum eer gefale. Sogår nog ni beere tau eer.

Wek säge sai koine mit dai doore fortele. Åwer, dat is ni wår. Soo’s wij saie häwe, “dai doore daue gewiss nischt mër waite”. Wek lüür maine sai daue mit aim fortele wat al doodbleewe is, åwer sai daue mit dai Düüwel un sijn slechte ängels fortele. Dai Düüwel un sijn slechte ängels daue dës lüür belaige. Den, dai wårhët waite oiwer dai doore, däit oos behüüte fon dai Düüwel un dai slechte ängels wat em bijståe daue. Jehovaa hät oos sägt dat wij ais nij forsuike schåle fortele mit dai wat doodbleewe sin, weegen hai wät dat dai Düüwel un dai slechte ängels sin sër gefärlig tau oos. (Lees Deuteronômio 18:10 bet 12)

3. Dau mër waite wat passijre däit wen air mësch doodblijwt

Feel lüür daue ni oiwerain denke wat passijre däit mit dai doore. Dårweegen ni ales wat sai hijr oiwer denke is richtig.

• Woo’s duu wånst an wat daue dai lüür anglööwe wen air doodblijwe däit?

 4. Dai wårhët waite oiwer dai dood däit oos sër mithelpe

Dai wårhët oiwer dai dood waite däit oos fraimåke fon dai angst wat wij häwe fon dai wat al dood sin. Lees Eclesiastes 9:10 un nåheer fortel oiwer dai fråg hijr uuner:

• Koine dai doore oos wat schåre?

Wen wij dai wårhët fone Bijbel lëre, den glööwe wij ni an dai loigen dat wij dai doore gefale muite. Lees Isaías 8:19 un Apocalipse 4:11 un nåheer fortel oiwer dai fråg hijr uuner:

• Wen air mësch air dood gefale wil urer hülp forlangt dat dai doore em mithelpe schåle, wosoo däit Jehovaa sich forneeme?

5. Dai wårhët waite oiwer dai doore däit oos ruig låte

Feel lüür häwe lërt wen sai doodblijwe daue sai ware stråft, weegen dat wat sai forkërd måkt häwe. Wij koine im freere nuu sin weegen wen wij doodblijwe, wij ware ni stråft, nog wen wij slechte daile måkt häwe. Lees Romanos 6:7 un nåheer fortel oiwer dai fråg hijr uuner:

• Dai Bijbel sägt wen dai mësch doodblijwe däit, sijne ganse süün ware forgeewt. Dit bedüürt dat God ni mër andenke däit an dës süün wat dai mësch har. Den, wat mainst duu? Wart dai mësch wirklig stråft wen dai doodblijwt?

Ji mër as wij oiwer Jehovaa lëre daue, beeter daue wij forståe dat hai kain nood bringe däit oiwer dai wat doodbleewe sin. Lees Deuteronômio 32:4 un 1 João 4:8 un nåheer fortel oiwer dai frågen hijr uuner:

• Soo as wij lërt häwe in dës sprüüch, God hät feel gaure moors. Däit hai wirklig dai lüür stråfe wen sai dood sin? Wat mainst duu?

• Dai wårhët oiwer dai dood waite, däit dij ruig låte? Woweegen?

 WAT HÄWE WIJ HIJR LËRT?

Wen dai mësch doodblijwe däit, dai däit nischt mër waite. Dai doore daue kain slime daile doirsete un sai koine kaine wat schåre.

Denk dij ais nå

• Wat passijrt wen air doodblijwt?

• Dai wårhët waite oiwer dai dood helpt oos sër. Wosoo?

• Waite wat passijrt wen air doodblijwt, däit oos freere un ruig låte. Woweegen?