Gning wuié o kouŋo yé tèʼ laa kwé mbwo wou? Lélhʉo pʉa pié ée tsèe yèe nti ngôʼ zaté ngié: «Gning kwée ntchʉʼʉ kô? Ta méng gé laʼa lièʼ ying giè pʉa pôôn pié é la kwé?» A gé wo na sôôn léziʼi po léziʼi sié ée mvfo, pégé giè mémbʉèe mié é kuingté, émié Biible naa.

1. Akô tchʉaté fʉʼ yié gning kwée?

Yéeso la pii légwé ntsuiéʼé na lélôg. Ée yèe ntémté yié lélôg po légwé gwiée? Gning wuié à pouou né ndhié té zsé mmo yié a né ntchʉaté jʉʼ yé wô. Ndésém pouʼou, gning wuié à kwé té ying jouʼou tso mmo yié a né ngiaŋa yé wô. A té ying ngia ngôʼ wô. Biible gôôn ngié: «Mépfo té ying nzsé tso no wô» (toŋo Ékléziaste 9:5).

2. Lézsée no nénʉ nti mépfo kuiété wégé lékô?

Pʉa ta ngiôôn pôgô légwé, pétso pʉa pôg pʉa pié é kwée. Taʼ, ngouo mmo yié Biible ziʼi nti légwé kuingté wou. Yéeso la gôôn ngié: «No nénʉ gé tchouʼou wui» (Jang 8:32). Métchʉôôsé ta ngiôôn ziʼi ngié gning vôg ta nkwé, atso mmo foo mboum nna yé, nging ngouo wo. Taʼ a té mmo yié Biible ziʼi wô. Paʼ mépfo té zsé tso no wô la, po té gia ngôʼ wô. Ngouo po ké lé na ngôʼ mbwo pégé wô. Yèe lôgô ngôôn ngié, pégé té gwiée lé faʼ méchʉo lé gʉo ngié po pôôn lé ying nnaa wégé ngôʼ wô, nké té gwiée lé gouʼté wôb wô, mbing té gwiée lé gʉo préya nti two sôb wô.

Tso pʉa gôôn ngié ngouo pô chouŋé lé pʉa pié po kwée. Taʼ, ngouo a lé wo pouʼou wô. Paʼ pégé gièe la, mépfo «té ying nzsé tso mmo wô». Pʉa pié po kouang ngié paa mépfo né chouŋé, po laa méssé tépong pié po kaa nghié mpfo zoo né chouŋo. Lézsée no nénʉ nti légwé kabté wégé na méssé tépong. Jéova gôôn ngié ta pégé zôôn naʼa faʼa lé chouŋé né mépfo, nti noué a né nzsé ngié légwiée ntémté lé méssé tépong aa mmo mbat tèʼ (toŋo Détéronôm 18:10-12).

3. Ziʼi no nénʉ nti mépfo

Méziʼi ta ngiôôn ée wo mié é gôôn no nti mmo yié a tchʉaté fʉʼ yié gning kwée. Taʼ ngouo méziʼi mè ntsém lé chouŋo no nénʉ wô.

• Aa kélé wou, épʉa kouang ngié kô nti légwé?

 4. Lézsée no nénʉ na légwé kuilé wégé nda nkouôôn

Lézsée no nénʉ na légwé kuilé wégé tsèe nkouôôn lé tchʉôʼ pʉa pié po kwée. Toŋo Ékléziaste 9:10, mbing ngôôn no na yôôn nzaté:

• Ngouo mépfo gégé wégé?

Ngouo mmo yié Biible ziʼi nti légwé kuilé wégé tsèe nkouôôn méziʼi mié é gôôn ngié a zaté lé gʉo choum ndôg ntôʼ mépfo lé naa wégé ngôʼ ka po lé gouʼté wôb wôô. Toŋo Ésaya 8:19 po Ngia jʉʼ 4:11, mbing ngôôn no na yôôn nzaté:

• O kouang jou ngié Jéova kouang ngié kô nti pʉa pié po gouʼté mépfo mboo pʉa pié po zaté nkuiété mbwo pôb?

5. Lézsée no nénʉ nti mépfo néng létʉm ségé

Mé la ziʼi lélʉo pʉa ngié po gé laʼ wô ta kwé, mé ponésé wôb nti méfʉʉʼ méno môb. Taʼ, a naa suiété né pégé lé jouʼ ngié gning vôg ta nkwé, a té ying ngiè ngôʼ wô, mbaa gning wuié a lôôn fʉʼʉ méno. Toŋo Roma 6:7, mbing ngôôn no na yôôn nzaté:

• Biible gôôn ngié gning vôg ta nkwé péʼé, nkʉo no tépong foo na yé nkièʼè. O kouang jou ngié pʉa pié po kwée gia ngôʼ nti méno mié po la fʉʼ kée?

Pégé ziʼi lé kuiʼi nzsé Jéova, ayèe tsoté wégé lé zuing té mʉʼté ngié ngouo a lé gʉo mépfo gia ngôʼ wô. Toŋo Détéronôm 32:4 po 1 Jang 4:8, mbing ngôôn no na môôn ménzaté:

• Mé tsigé no na méma mié môôn ménkang ŋwaʼné tʉ, ngia ngié ta ngouo Ssé gʉo mépfo gia ngôʼ?

• O gia jou ngié lézsée no nénʉ nti mépfo naa suiété létʉm? Pouʼou nti kô?

 TA O ZIʼII KÔ?

Gning vôg ta nkwé, awé léwô mag. Pʉa pié po kwée té gia ngôʼ wô, ngouo po ké lé na ngôʼ mbwo pʉa pié po gnié wo wô.

Ta o né nkimté?

• Gning kwée ntchʉʼʉ kô?

• Lézsée no nénʉ nti légwé kuiété wégé tsèe kô po kô?

• Lézsée no nénʉ nti légwé suiété létʉm ségé lékô?