Na o kile wa hlokofalelwa ke motho yo o mo ratago kudu? Mohlomongwe ka yona nako yeo o ile wa ipotšiša gore: ‘Go direga’ng ka batho bao ba hlokofetšego? Na re tla tsoga re ba bone gape?’ Thutong ye le yeo e latelago, re tlo kwa dikarabo tša dipotšišo tše di tšwago Beibeleng tšeo di kgothatšago.

1. Go direga eng ka batho bao ba hlokofetšego?

Jesu o swantšhitše lehu le boroko. Motho yo a robetšego boroko bjo bogolo goba bjo re ka rego ke bja matla-gosa, ga a kwe selo ge a robetše. Lehu le swana bjang le boroko? Ge motho a hlokofetše, ga a sa kwa bohloko, ga a sa hlologela batho ba gabo le bagwera ba gagwe bao a bego a ba rata kudu. Beibele e re: “Bahu ga ba tsebe selo le gatee.”​—Bala Mmoledi 9:5.

2. Go tseba seo se diregago ka batho bao ba hlokofetšego go re thuša bjang?

Batho ba bantši ba tšhaba lehu, e bile ba tšhaba le bahu. Eupša seo Beibele e se bolelago ka lehu se ka go kgothatša. Jesu o itše: “Therešo e tla le lokolla.” (Johane 8:​32) Dikereke tše dingwe di ruta gore ge motho a hlokofala moya wa gagwe ga o hwe, eupša se ga se seo Beibele e se rutago. Beibele e ruta gore ga gona motho yo a kwago bohloko ge a hlokofetše. Le gona ka ge bahu ba sa tsebe selo, ba ka se re gobatše. Ka gona ga se ra swanela go ba rapela goba go ba direla dilo tše itšego go swana le go phasa badimo, ka ge re tšhaba gore ba tlo re pokela.

Batho ba bangwe ba re ba ka kgona go bolela le bahu. Eupša seo ga se kgonege. Ka ge re šetše re kwele, Beibele e re “bahu ga ba tsebe selo le gatee.” Batho bao ba naganago gore ba boledišana le batho bao ba ba ratago bao ba hlokofetšego, botsebotse ba ka no ba ba boledišana le batemona bao ba itirago bahu bao. Ka gona ge re tseba seo se diregago ka bahu, re tlo šireletšega go batemona. Jehofa o re lemoša gore re se ke ra leka go boledišana le bahu, ka gobane o a tseba gore go dira seo go tlo dira gore batemona ba re gobatše.​—Bala Doiteronomio 18:​10-12.

3. Ekwa gore go direga eng ka batho bao ba hlokofetšego

Lefaseng ka moka, batho ba bantši ba dumela dilo tša go fapafapana ka seo se diregago go rena ge re hlokofetše. Eupša ga se go re dilo tšeo ka moka ba di dumelago ke nnete.

• Moo wena o dulago gona, ke’ng seo batho ba bantši ba se dumelago ka bahu?

 4. Go tseba nnete ka lehu go a re thuša

Ge re tseba gore go direga eng ka batho bao ba hlokofetšego, se se re thuša gore re se ke ra boifa bahu. Balang Mmoledi 9:​10, gomme le boledišaneng ka potšišo e latelago:

• Na bahu ba ka re gobatša?

Ge re tshepa seo Beibele e se rutago ka bahu, re ka se dumele maaka ao batho ba a bolelago a gore re swanetše go rapela bahu. Balang Jesaya 8:​19 le Kutollo 4:​11, gomme le boledišaneng ka potšišo e latelago:

• O nagana gore Jehofa o ikwa bjang ge motho a rapela motho yo a hlokofetšego goba a mo kgopela thušo?

5. Go tseba nnete ka seo se diregago ka bahu go a re kgothatša

Batho ba bantši ba rutilwe gore ge ba dira dilo tše mpe, ba tlo tlaišwa ge ba hlokofetše. Eupša go a homotša go tseba gore ga go na motho yo a tlago go tlaišega ge a hlokofetše le ge a be a dira dilo tše mpe. Balang Baroma 6:​7, gomme le boledišaneng ka potšišo e latelago:

• Beibele e ruta gore ge motho a hlokofetše, Modimo o phumola dibe tša gagwe. Bjale o nagana gore motho yo mongwe le yo mongwe yo a hlokofetšego o a tlaišega ka baka la dilo tše mpe tšeo a bego a di dira?

Ge re tseba Jehofa gabotse, re tlo bona gore a ka se tsoge a tlaišitše batho bao ba hlokofetšego. Balang Doiteronomio 32:4 le 1 Johane 4:​8, gomme le boledišaneng ka dipotšišo tše di latelago:

• Go ya ka tsela yeo mangwalo a a hlalosago Modimo ka yona, na o nagana gore a ka tlaiša batho bao ba hlokofetšego?

• Na go tseba nnete ka seo se diregago ka batho bao ba hlokofetšego go a go kgothatša? Go re’ng o re’alo?

 O ITHUTILE ENG?

Ge motho a hlokofetše, ga a sa tseba selo. Batho bao ba hlokofetšego, ga ba tlaišege e bile ba ka se gobatše bao ba phelago.

Dipotšišo

• Go direga’ng ka bahu?

• Go tseba nnete ka seo se diregago ka batho bao ba hlokofetšego go re thuša bjang?

• Go tseba nnete ka batho bao ba hlokofetšego go re homotša bjang?