Oraafeereirweho omukundwa? Omu bwire bw’obusaasi obwo, noobaasa kwebuuza oti: ‘Niki ekirikubaho omuntu yaafa? Hariho amatsiko ngu nitwija kugaruka kureeba abakundwa baitu abaafiire?’ Omu ishomo eri n’eririkukurataho, yetegyereze eby’okugarukamu bya Baibuli ebirikuhuumuriza.

1. Niki ekirikubaho omuntu yaafa?

Yesu akagyeragyeranisa okufa n’okugwejegyera. Omuntu orikuba agwejegyeire naaba atarikumanya ebiriyo nibibaho. Okufa nikushushana kuta n’okugwejegyera? Omuntu yaafa, naaba atarikuhurira obusaasi bwona. Naaba ataine eihamba, n’obu yaakuba abaire naakunda munonga banywani be nari ab’eka ye. Baibuli neegira ngu ‘abafu tihaine eki barikumanya.’—Shoma Omubuurizi 9:5.

2. Nitugasirwa tuta twamanya amazima agarikukwata aha kufa?

Abantu baingi nibatiina okufa n’abafu! Kwonka noobaasa kuhuumurizibwa eki Baibuli erikwegyesa aha kufa. Yesu akagira ngu ‘amazima nigaija kubahindura ab’obusingye.’ (Yohaana 8:32) Okutaana n’eki ediini ezimwe zirikugamba, Baibuli terikwegyesa ngu haine ekirikuruga omu muntu kikaguma kihuriire bwanyima y’okufa. Buzima, omuntu naaba atarikubonabona bwanyima y’okufa. Kandi, obu abafu bataine eki barikumanya, tibarikubaasa kutukora kubi. N’ahabw’ekyo, tikirikwetengyesa kushemeza abafu nari kubaramya, kandi tikirikwetengyesa kubashabira.

Abantu abamwe nibagira ngu nibabaasa kuhurizana n’abafu. Kwonka eki tikirikubaasika. Nk’oku twaheza kwega, abafu ‘tibaine ki barikumanya.’ Abarikuteekateeka ngu nibahurizana n’abakundwa baabo abaafiire, nibabaasa kuba nibahurizana na baadaimoni abarikweshushaniriza n’abantu abaafiire. N’ahabw’ekyo, okumanya amazima agarikukwata aha kufa nikuturinda kutataahirirwa baadaimoni. Yehova tarikwenda ngu tuteereho kuhurizana n’abafu ahakuba naamanya ngu twakikora baadaimoni nibatukora kubi.—Shoma Eky’Ebiragiro 18:10-12.

3. Manya embeera yenyini ei abafu barimu

Omu nsi yoona, abantu nibaikiriza ebitarikushushana aha kirikubaho omuntu yaafa. Enyegyesa ezo zoona tizirikubaasa kuba zihikire.

• Omu kicweka kyanyu baingi nibagamba ki aha mbeera y’abafu?

 4. Amazima agarikukwata aha kufa nigatugasira

Okumanya amazima agarikukwata aha kufa nikituhwera kutatiina abafu. Shoma Omubuurizi 9:10, kubaasa kugarukamu ekibuuzo ekirikukurataho:

• Abafu nibabaasa kutukora kubi?

Kandi amazima ga Baibuli nigaturinda kutaikiriza ekishuba ngu nitubaasa kushemeza abafu nari kubaramya. Shoma Isaaya 8:19 na Okushuuruurwa 4:11, kubaasa kugarukamu ekibuuzo eki:

• Noogira ngu Yehova naayehurira ata yaareeba omuntu arikuramya omufu, nari arikumusheruraho obuhwezi?

5. Amazima agarikukwata aha kufa nigatuhuumuriza

Abantu baingi beegyesiibwe ngu ku baraafe, nibaija kufubirwa ahabw’ebibi ebi baakozire enyima. Kwonka nikihuumuriza kumanya ngu tihaine orikubonabonesibwa bwanyima y’okufa, n’obu yaakuba yaakozire ebibi. Shoma Abarooma 6:7, kubaasa kugarukamu ekibuuzo eki:

• Noogira ngu omufu naaba naabonabona ahabw’ebibi ebi yaakozire enyima, kandi obwo Baibuli erikugira ngu ku arikufa naaba atakiine rubanja?

Twayongyera kumanya Yehova, nitwetegyereza ngu tarikubaasa kufubira abafu arikubabonabonesa. Shoma Eky’Ebiragiro 32:4 na 1 Yohaana 4:8, kubaasa kugarukamu ebibuuzo ebi:

• Ruhanga shi oine emitwarize eyaagambwaho omu mishororongo egyo naabaasa kubonabonesa abafu?

• Ahabw’enki nooteekateeka ngu amazima agarikukwata aha kufa nigahuumuriza?

 OMU BUGUFU

Omuntu yaaheza kufa, naaba atakiine magara. Abafu tibarikubonabona, kandi tibarikubaasa kukora kubi abahuriire.

Okweijutsya

• Niki ekirikubaho omuntu yaafa?

• Amazima agarikukwata aha kufa nigatugasira gata?

• Amazima agarikukwata aha kufa nigatuhuumuriza gata?