ƐZUKOALƐDEƐ 29
Saa Yɛwu A Yɛkɔ Ni?
Wɔ kulovolɛ bie ɛwu ɛlɛ ɔ? Wɔ mekɛ zɛhae mɔɔ yɛ nyane la anu, bie a ɛbabiza kɛ: ‘Saa yɛwu a yɛkɔ ni? Asoo anyelazo wɔ ɛkɛ ne kɛ yɛbanwu yɛ alɔvolɛ mɔɔ ɛwu la bieko ɔ?’ Nea mualɛ mɔɔ Baebolo ne fa maa mɔɔ kyekye yɛ rɛle la wɔ ɛzukoalɛdeɛ ɛhye nee mɔɔ doa zo la anu.
1. Saa yɛwu a yɛkɔ ni?
Gyisɛse vale ewule totole nafelɛ botoo nwo. Awie mɔɔ ɛlafe botoo la ɛnze mɔɔ ɛlɛkɔ zo la. Kɛzi ewule le kɛ nafelɛ ɛ? Saa awie wu a, ɔnde nyane. Ɔ nwo ɛnyɛ ye koonwu ɔnva nwo kɛzi ɛnee ɔkulo ɔ gɔnwo mɔ nee ye mbusuafoɔ la. Baebolo ne ka kɛ: “Mowuamra ɛnze ɛhwee.”—Kenga Nolobɔvo 9:5.
2. Kɛzi yɛnwu ewule nwo nɔhalɛ ne a ɔboa yɛ ɛ?
Menli dɔɔnwo sulo ewule—bɔbɔ mowuamra! Noko mɔɔ Baebolo ne ka ye wɔ ewule nwo la bahola akyekye ɛ rɛle. Gyisɛse hanle kɛ: “Nɔhalɛ ne bamaa bɛanyia fanwodi.” (Dwɔn 8:32) Asolo mɔɔ ɛzonlenlɛ bie mɔ kilehile a, noko Baebolo ne kilehile kɛ sonla ɛnlɛ ɛkɛla mɔɔ ɛnwu a. Ɔti awie wu a ɔnnwu amaneɛ. Eza kɛmɔ mowuamra ɛnze ɛhwee la ati, bɛngola bɛngyegye yɛ. Yemɔti ɔngyia kɛ yɛkpɔda mowuamra anzɛɛ yɛsonle bɛ yɛɛ ɔngyia kɛ yɛyɛ asɔne yɛmaa bɛ.
Bie mɔ se bɛkola bɛ nee mowuamra tendɛ. Noko ɛhye ɛnrɛyɛ boɛ. Kɛ mɔɔ yɛzukoa ye kɛkala la, “mowuamra ɛnze ɛhwee.” Menli mɔɔ dwenle kɛ bɛ nee bɛ alɔvolɛ mɔɔ ɛwu ɛlɛtendɛ la nee sunsum ɛtane ne mɔ mɔɔ yɛ bɛ nwo kɛ menli mɔɔ ɛwu la a amgba ɛlɛtendɛ a. Ɔti saa yɛnwu ewule nwo nɔhalɛ ne a, ɔbɔ yɛ nwo bane ɔfi sunsum ɛtane ne mɔ anwo. Gyihova ɛbɔ yɛ kɔkɔ kɛ yɛmmabɔ mɔdenle kɛ yɛ nee mowuamra badendɛ ɔluakɛ ɔze kɛ saa yɛ nee sunsum ɛtane ne mɔ di ngitanwo a bɛbagyeye yɛ.—Kenga Ditilɔnomi 18:10-12.
SUKOA DƆƆNWO
Sukoa mɔɔ Baebolo ne ka ye wɔ ewule nwo la anwo ninyɛne dɔɔnwo, na nyia diedi kpole wɔ ɛlɔlɛ Nyamenle ne mɔɔ ɛngile menli mɔɔ ɛwu nyane la anu.
3. Sukoa mowuamra anwo nɔhalɛ edwɛkɛ ne
Menli lɛ ɛleka mɔɔ yɛwu a yɛkɔ la anwo diedi ngakyile wɔ ewiade amuala. Nɔhalɛ nu, tɛ diedi ɛhye mɔ kɔsɔɔti a le nɔhalɛ a.
-
Mowuamra anwo edwɛkɛ boni a menli dɔɔnwo die di wɔ bɛ ɛkɛ a?
Amaa wɔanwu mɔɔ Baebolo ne kilehile la, ye VIDIO ne.
Kenga Nolobɔvo 3:20, na akee bɛzuzu kpuya ɛhye mɔ anwo:
-
Kɛ mɔɔ tɛkese ɛhye kile la, saa awie wu a ɔkɔ ni?
-
Saa awie wu a asoo debie wɔ ye nu mɔɔ kɔ zo tɛnla aze ɔ?
Baebolo ne ka Gyisɛse agɔnwo Lazalɛse ewule ne anwo edwɛkɛ kile yɛ. Saa ɛlɛkenga Dwɔn 11:11-14 a, yɛ kɛzi Gyisɛse hanle Lazalɛse ewule ne anwo edwɛkɛ la nzonlɛ. Akee bɛzuzu kpuya ɛhye mɔ anwo:
-
Duzu a Gyisɛse vale ewule totole nwolɛ a?
-
Duzu a mɔɔ ɔhanle la maa yɛnwu ye wɔ mowuamra anwo a?
-
Ɛnea a ndelebɛbo wɔ ewule nwo edwɛkɛ mɔɔ Baebolo ne ka la anu ɔ?
4. Ewule nwo nɔhalɛ edwɛkɛ ne boa yɛ
Saa yɛnwu ewule nwo nɔhalɛ edwɛkɛ ne a ɔmmaa yɛnzulo mowuamra. Kenga Nolobɔvo 9:10, na akee bɛzuzu kpuya ɛhye anwo:
-
Asoo mowuamra kola gyegye yɛ?
Baebolo ne anu nɔhalɛ ne eza bɔ yɛ nwo bane fi diedi mɔɔ menli lɛ kɛ ɔwɔ kɛ bɛkpɔda mowuamra anzɛɛ bɛsonle bɛ bɔbɔ la anwo. Kenga Ayezaya 8:19 yɛɛ Yekile 4:11, na akee bɛzuzu kpuya ɛhye anwo:
-
Ɛnea a kɛzi Gyihova bu awie mɔɔ sonle mowuamra anzɛɛ kpondɛ moalɛ fi awie mɔɔ ɛwu la ɛkɛ ɛ?
Ewule nwo nɔhalɛ edwɛkɛ ne maa yɛtwe yɛ nwo yɛfi amaamuo mɔɔ Gyihova anye ɛnlie nwo la anwo
5. Ewule nwo nɔhalɛ edwɛkɛ ne kyekye yɛ rɛle
Bɛhilehile menli dɔɔnwo kɛ saa bɛambɔ ɛbɛla kpalɛ na bɛwu a bɛbanwu amaneɛ. Noko saa yɛnwu kɛ awie wu a ɔnnwu amaneɛ, bɔbɔ awie mɔɔ yɛle ninyɛndane la a ɔkyekye yɛ rɛle. Kenga Wulomuma 6:7, na akee bɛzuzu kpuya ɛhye anwo:
-
Kɛ mɔɔ Baebolo ne ka la, saa awie wu a bɛbua ye benle anzɛɛ bɛdie ye bɛfi ɛtane nu, ɔti ɛnea a awie mɔɔ ɛwu la ɛlɛnwu ɛtane bie mɔɔ ɔyɛle la anwo amaneɛ ɔ?
Saa yɛnwu Gyihova kpalɛ a, yɛbanwu ye kɛ ɔnrɛmaa mowuamra ɛnrɛnwu amaneɛ ɛlɛ. Kenga Ditilɔnomi 32:4 yɛɛ 1 Dwɔn 4:8, na akee bɛzuzu kpuya ɛhye mɔ anwo:
-
Asoo Nyamenle mɔɔ lɛ subane mɔɔ bɛha nwolɛ edwɛkɛ wɔ tɛkese ɛhye mɔ anu la balie ado nu kɛ bɛhile mowuamra nyane ɔ?
-
Ewule nwo nɔhalɛ edwɛkɛ ne kyekye ɛ rɛle ɔ? Duzu ati ɔ?
BIE MƆ KA KƐ: “Mesulo mɔɔ mewu a ɔbado me la.”
-
Baebolo tɛkese boni mɔ a ɛbava wɔakyekye bɛ rɛle a?
EDWƐKƐ TITILI
Saa awie wu a, ɔnde aze bieko. Mowuamra ɛnnwu amaneɛ yɛɛ bɛngola bɛngyegye anyewɔzoamra.
Ndinu
-
Saa yɛwu a yɛkɔ ni?
-
Kɛzi ewule nwo nɔhalɛ edwɛkɛ ne boa yɛ ɛ?
-
Kɛzi ewule nwo nɔhalɛ edwɛkɛ ne kyekye yɛ rɛle ɛ?
KPONDƐ DƆƆNWO
Nea mɔɔ edwɛkɛkpɔkɛ “ɛkɛla” kile wɔ Baebolo ne anu la.
Nea saa Nyamenle twe menli nzo wɔ abɔnsam senle nu a.
Asoo ɔwɔ kɛ yɛsulo mowuamra?
Mowuamra Sunsum—Asoo Bɛkola Bɛboa Wɔ Anzɛɛ Bɛgyegye Wɔ? Asoo Amgba Bɛwɔ Ɛkɛ? (buluku)
Nea kɛzi nrenyia bie zukoale ɛleka mɔɔ yɛwu a yɛkɔ la anwo nɔhalɛ ne la ɔkyekyele ɔ rɛle la.
“Me Nye Liele Baebolo Ne Mualɛ Mɔɔ Ndelebɛbo Wɔ Nu La Anwo” (Ɛzinzalɛ Arane, February 1, 2015)
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
