Xi nuꞌi, ¿xkä ꞌme̱di ha rä du nꞌa ri familia o nꞌa ri amigo? Ora di thogihu̱ nꞌa rä däta dumu̱i nguꞌä, jakägihu̱ gä ñꞌanihu̱: «¿Ma dä zo̱ho̱ rä pa gä handi mänꞌaki? ¿O̱de näꞌä di mää?». Ha nunä lección ꞌne ha näꞌä mä nꞌa xä ꞌñepu̱, ma gä pädihu̱ te udi rä Biblia.

1. ¿Habu̱ pa nuꞌu̱ yä jäꞌi xä du?

Rä Hesu bi kompara rä du ngu nꞌa rä tꞌähä xa ntsꞌe̱di. ¿Por hanja? Ora nꞌa rä jäꞌi ähä ntsꞌe̱di, hingi da ngue̱nda te thogi. Njabu̱ ꞌnehe, nꞌa rä jäꞌi näꞌä xä du ya hinte di senti ꞌne ya hinte di mbeni. Rä Biblia enä: «Nuꞌu̱ xä du, nuꞌu̱ ya hinte pädi» (hñeti Eclesiastés 9:5).

2. ¿Hanja ma dä benefisiagihu̱ gä pädihu̱ näꞌä xa mäjuäni de rä du?

Ndunthi yä jäꞌi xa tsu dä du, o tsu nuꞌu̱ yä jäꞌi ya xä du. Pe näꞌä udi rä Biblia de rä du, ma dä hubgä mä mu̱ihu̱. Rä Hesu bi ꞌñenä: «Ma gi pädihu̱ näꞌä mäjuäni, ꞌne näꞌä mäjuäni ma dä hye̱kꞌähu̱ libre» (Juan 8:32, TNM). Ndunthi yä relijion udi ge ora tu nꞌa rä jäꞌi, rä alma po̱ni ꞌne bi sigi bi te ha mä nꞌa rä luga. Pe rä Biblia udi ge nuꞌu̱ yä jäꞌi xä du ya hindi sufri. Koꞌmu̱ nuꞌu̱ ya hinte di senti ꞌne ya di mbeni, hingi tsa dä maxkägihu̱ nixi tsa te dä yꞌo̱tkägihu̱. Hänge mäske dä tꞌo̱ꞌtuäbi yä mixa o yä ngo, nuꞌu̱ ya hinte di benefisiabi.

Rꞌa yä jäꞌi enä ge tsa dä ñäui nuꞌu̱ yä jäꞌi ya xä du, pe ninꞌa rä jäꞌi hingi tsa dä me̱fi njabu̱. Ja ngu ya dä handihu̱, nuꞌu̱ xä du «ya hinte pädi». Nuꞌu̱ yä jäꞌi di ñꞌetsꞌi ge tsa dä ñäui nuꞌu̱ yä jäꞌi ya xä du, hingä mäjuäni. ¿Gi pädi toꞌo nuꞌu̱ ñäui? Nuꞌu̱ ñäui yä u̱xjua. Ngeꞌä yä u̱xjua tsa dä me̱ti hanja mi ñä nuꞌu̱ yä jäꞌi xä du. Po rängeꞌä, gä pädihu̱ näꞌä xa mäjuäni udi rä Biblia de nuꞌu̱ yä jäꞌi xä du, faxkägihu̱ pa hingä tagihu̱ ha nuꞌu̱ yä trampa hutsꞌi yä u̱xjua. Rä Zi Dada Jeoba di mändagihu̱ ge hingä honihu̱ gä ñäuihu̱ nuꞌu̱ yä jäꞌi ya xä du. Ngeꞌä mu̱ gä trata gä ñähu̱ kongeꞌu̱, go ma gä ñäuihu̱ yä u̱xjua, ꞌne nunä xi nꞌa rä däta peligro (hñeti Deuteronomio 18:10-12).

3. Näꞌä xa mäjuäni thogi ora di tuhu̱

Po gatꞌho rä Xiꞌmhai, yä jäꞌi pe̱ꞌtsi rꞌa nꞌañꞌo yä creencia de te thogi ko nuꞌu̱ yä jäꞌi ya xä du. Pe nuꞌu̱ yä creencia hingä geꞌä udi rä Biblia.

• Xi ha ri komunida, ¿te kamfri yä jäꞌi de nuꞌu̱ xä du?

 4. Ora di pädihu̱ näꞌä udi rä Biblia de rä du, ya hindi tsuhu̱

Hinte mä raso di pe̱ꞌtsihu̱ pa gä ntsuhu̱. Rä Biblia utkägihu̱ ge nuꞌu̱ xä du, hindä za dä maxkägihu̱ nixi tsa te dä yꞌo̱tkägihu̱. Hñetihu̱ Eclesiastés 9:10, ꞌnepu̱ thädihu̱ nunä rä ntꞌani:

• Xi nuꞌi te gi mbeni, ¿dä za te dä yꞌo̱tkägihu̱ nuꞌu̱ yä jäꞌi xä du?

Mäpaya ndunthi yä jäꞌi enä ge pa hindä ntsu̱te nuꞌu̱ xä du, pe̱ꞌtsi te drä xatuäbi o dä tꞌespäbi yä ofrenda. Pe ora di handihu̱ näꞌä xa mäjuäni udi rä Biblia, faxkägihu̱ pa gä kꞌotꞌihu̱ de nunä costumbre hindi ho rä Zi Dada Jeoba. Hñetihu̱ Isaías 8:19 ꞌne Apocalipsis 4:11, ꞌnepu̱ thädihu̱ nunä rä ntꞌani:

• Ndunthi yä jäꞌi, en lugar de dä hyombäbi rä mfatsꞌi rä Zi Dada Jeoba, go hombäbi rä mfatsꞌi nuꞌu̱ xä du. ¿Te gi kamfri ge di senti rä Zi Dada Jeoba ora handi njabu̱?

5. Hubgä mä mu̱ihu̱ gä pädihu̱ näꞌä udi rä Biblia de rä du

Ndunthi yä relijion pidi yä jäꞌi ora embäbi ge nuꞌu̱ xä du, bi sufri po nuꞌu̱ yä pekado xki yꞌo̱tꞌe. Pe rä Biblia hubgä mä mu̱ihu̱ ora xikägihu̱ ge nuꞌu̱ xä du, ya himbi sufri; nisiquiera nuꞌu̱ yä jäꞌi bi yꞌo̱tꞌe yä däta pekado nuꞌmu̱ mi te. Hñetihu̱ Romanos 6:7, TNM, ꞌnepu̱ thädihu̱ nuya yä ntꞌani:

• Ja ngu dä hetihu̱ ha nunä testo, ¿te thogi ko nuꞌu̱ yä pekado nꞌa rä jäꞌi ora dä du? ¿Gi kamfri ge nuꞌu̱ xä du bi sufri po nuꞌu̱ yä pekado bi yꞌo̱tꞌe nuua ha rä Xiꞌmhai?

Entremäs di pädihu̱ tenguꞌä rä mꞌu̱i rä Zi Dada Jeoba, mänꞌa di dahu̱ ngue̱nda ge Näꞌä nunka xä beni dä kastiga nuꞌu̱ yä jäꞌi xä du. Hñetihu̱ Deuteronomio 32:4 ꞌne 1 Juan 4:8, TNM, ꞌnepu̱ thädihu̱ nuya yä ntꞌani:

• Ja ngu dä handihu̱ ha nuya yä testo, ¿tenguꞌä rä mꞌu̱i rä Zi Dada Jeoba? ¿Gi kamfri ge nꞌa rä Zi Dada njabu̱, ma dä kastiga nuꞌu̱ yä jäꞌi xä du?

• ¿Hubꞌäꞌi ri mu̱i gi pädi näꞌä udi rä Biblia de nuꞌu̱ xä du? ¿Por hanja?

 NÄꞌÄ DÄ PÄDIHU̱

Ora nꞌa rä jäꞌi tu, ya ja bi uadibu̱ rä te, ya hinte di mbeni, hinte di senti, ya himbi sufri, ha nixi dä za te dä yꞌo̱tkägihu̱.

Pa gä benihu̱

• ¿Te thogi ko nuꞌu̱ yä jäꞌi xä du?

• ¿Te mä benefisio di hänihu̱ ora di pädihu̱ te thogi ko nuꞌu̱ xä du?

• ¿Hanja hubgä mä mu̱ihu̱ gä pädihu̱ näꞌä udi rä Biblia de rä du?