Idx peeykãanisa uute wala nxuswaꞌj jiꞌphuçxa, idxa paapẽyneꞌga: ¿Uuçxa mteey ĩtxi ũsmanx? ¿Uusa yakh kiꞌ puutx uyyaꞌ ewuumathaꞌw? Naa peꞌla idxaꞌs wala puꞌçxhina. Uyuuneꞌga ewsa pasnisaꞌs Dxus yuwete.

1. ¿Uuçxa kĩhtekxthaꞌw uꞌjwe?

Jesusyuꞌ naꞌwku kaajaꞌdaꞌjn weꞌwe uunisaꞌsyuꞌ çxhãçxha dehni naꞌwne weꞌwe. ¿Dehniꞌs kĩh yũuçxa kik kaajaꞌdaꞌj weꞌw uuni yakh? Nasa çxhãçxha dehçxayuꞌ txãa pukasu kĩh yũutewaꞌj jiyuçmeeneꞌ, açyu txaꞌwẽyçxa uuteyuꞌ kĩh yuhwa jiyuçmeeneꞌ aꞌkatewa, pxthaa yuu meena. Dxus yuwe naꞌjĩꞌk: Kĩhwa jiyuçmeeneꞌta “uusayuꞌ kĩh yuhwa jiimee ũstxina” (lẽeywe Eclesiastés 9:5).

2. Uuniꞌs isasate jiyute, ¿maꞌwka puꞌçxhi?

Nasa wala ũukhuneꞌta uuwaꞌjaꞌs saꞌ txaꞌwẽy uusatxwa ũukhuneꞌta. Dxus yuweyuꞌ naꞌjĩꞌk: Uusa kĩh yuhwa yuumeeyã. Txãa jiiniꞌs jiyuçxa wãtthaꞌw yaꞌyaatxi. Txaꞌwẽy naꞌjĩꞌk. “Ewsaꞌs jiyuneꞌkwe açaꞌ txãa ewsaꞌ ewmeesajũ nweꞌwena” (Juan 8:32). Religión isasameeyuꞌ fxiyneꞌta kaapiyaꞌja, nawa Dxus yuweyuꞌ naꞌjĩꞌk: Nasayuꞌ alma inmortal jiꞌphmeeyã, açyu uusaweꞌsxyuꞌ kĩhwa jiyuyaꞌ ãjaçmeeneꞌta, kĩhçxa puuçwa vxitwaꞌj jiꞌphmeenetkhaꞌw, lisaawaꞌj jiꞌphmeenetkaꞌw. Txãaweꞌsx yakh weꞌwyaꞌ ãjameenaꞌw.

Maii nasaweꞌsxyuꞌ naꞌjĩneꞌta kweꞌsxyuꞌ uusaweꞌsx yakh weꞌwyaꞌ ãjanaꞌw, nawa txãayuꞌ wala ĩsxiinisana. Uusayuꞌ kĩh yuhwa jiimeꞌ ũsyã. Dxus yuwe txãꞌwku kaapiyaꞌja. Uusa yakhthaꞌw weꞌwe jiinisayuꞌ txãꞌw meena, demonio yakh weꞌwnisaçxaana. Demonioweꞌsxyuꞌ uusa naꞌwẽneꞌta yũu, txãꞌw yũuçxanta nasatxiꞌs wala kaajxpubaꞌjçxa kaakreĩ uusa yakh weꞌwna jiina. Açyu Dxus yuwe isasaꞌs jiyuçxa yaꞌnweꞌwene demoniosweꞌsxtxiꞌs, açyu Jeuwayuꞌ wala jxpaꞌyakx ũs kaahaꞌk. Uusaweꞌsx yakh weꞌwte demoniosweꞌsx yakh weꞌwna ũsna, açyu txãa yũu wala ewmeesana (lẽeywe Deuteronomio 18:10-12).

3. Uute isateyuꞌ maꞌw kik yaꞌyũu

Naa kiwete uta fxiy fxiy kreĩneꞌta uusaweꞌsxte, nawa txãꞌw yũunisa ewmeena.

• ¿Idx upxnite uusaweꞌsxte kĩhteta kreĩ?

 4. Uuniꞌs isate jiyuçxa wãt yaꞌfxiꞌze

Uuniꞌs isate jiyuçxa kweꞌsxyuꞌ ũukhmeenaꞌw uusaweꞌsxtxiꞌs. Lẽeywe Eclesiastés 9:10, txajuꞌ naa paapẽynisatxis paswe:

• ¿Uusa kweꞌsxtxiꞌs pkxuumatx?

Jeuwa kaapiyaꞌjte kweꞌsxyuꞌ uusatx weçxawaꞌj jiꞌphmeenetkhaꞌw, kĩh ritual yuhwa vxitwaꞌj jiꞌphmeenetkhaꞌw. Lẽeywe Isaías 8:19 vxiteꞌ Apocalipsis 4:11, txajuꞌ naa paapẽynisatxis paswe:

• Uusaweꞌsxtxi pakwete, ¿Jeuwayuꞌ maꞌw kik yahkx?

5. Uuniꞌs isate jiyute wala kvxiisxãꞌjaꞌk

Maii nasaweꞌsx naꞌwneꞌta kaapiyaꞌja, naa kiwete ãhmee yũun uꞌjuçxa uuteyuꞌ Dxusyuꞌ wala pkxuune, nawa txãa weꞌwnisa ĩsxiinisaꞌk neeyũu. Jeuwayuꞌ baaçx yuhwa nasatxiꞌs pkxuumeena, uusayuꞌ kĩh yuhwa yũuyaꞌ ãjaçmeꞌneꞌta. Lẽeywe Romanos 6:7, txajuꞌ naa paapẽynisatxis paswe:

• Uuçxa pkaaltxi khũkhni yaꞌneeyũu, açyu, ¿uusaweꞌsxyuꞌ pxthaa yuun ũsmanx txãjx pkaal paꞌka?, ¿idxyuꞌ maꞌw pasuguigk?

Jeuwa uusatxiꞌs pkxuun ũsmeena. Jeuwayuꞌ wala peeykãhsana baaçx yuhwa ewmeesaꞌs vxituçmeene. Lẽeywe Deuteronomio 32:4 vxiteꞌ 1 Juan 4:8, txajuꞌ naa paapẽynisatxis paswe:

• Txãa textos lẽeyçxa, ¿Dxusyuꞌ uusaweꞌsxtxiꞌs pkxuumaꞌk?

• Isasaꞌs jiyute uusaweꞌsxte, ¿idxaꞌs kvxiisãꞌjmaꞌk?, ¿kĩh yũuçxa?

 ¿AYTE PAꞌJ KĨHKXTHAꞌW PIYA?

Nasa uute ĩtxi fxiꞌzeni kxteey pçuuna. Uusaweꞌsxyuꞌ kĩhwa pxthaa yuun fxiꞌzen ũsmeeyã vxite nasatxiwa pkxuuyaꞌ ãjameeyã.

¿Kĩh pasuguigk?

• ¿Uuçxa kĩhtekxthaꞌw uꞌjwe?

• Uuniꞌs isate jiyuçxa wãtku yaꞌfxiꞌze, ¿kĩh yũuçxa?

• Uuniꞌs isate jiyute wala kvxiisxãꞌjaꞌk, ¿kĩh yũuçxa?