Wafuishile gale muthu wakhalele muzumba ba? Mu tangua diene dia lamba, wajiya gudihula egi: ‘Itshi yana gubua gula muthu wafua? Gudi nu lusugu mbatumona luko athu ene afuile gale ba?’ Longo edi nu dinyi dialundula mbadigukuatesa ha gujiya mvutu jiabonga jia Biblia gu mihu yiyi.

1. Itshi yana buila muthu gula wafua?

Yesu wafuanesele gufua nu tulo tuakola. Muthu udi gu tulo tuakola gana jiya ndo ndaga jidi mubalega. Gudivua gutshi gudi mukatshi dia gufua nu tulo? Gula muthu wafua, gana mona ndo lamba. Ganago gudivua hakhenji ikhale wakhalele muzumba mafut’enji nu enya fami yenji muavula. Biblia idi muzuela egi: ‘Athu a gufua ana jiya ndo nga gima.’​—Tanga Mulongeshi 9:5.

2. Luholo lutshi gujiya giamatshidia giatadila athu a gufua guana gutubatela gubonga?

Athu avula ana vua woma wa gufua nga wa mvumbi! Uvi ndaga jiana zuela Biblia mukunda nu gufua jiajiya guguhana gikhesa. Yesu wazuelele egi: “Giamatshidia mbagimikatula mu uhiga.” (Yone 8:32) Ikombelelo iko yana longesa egi gula muthu wafua, monyo wenji wana landula gujinga fundo diko; uvi Biblia yana zuela ndo ngenyi. Gushigo nu muthu wana mona lamba gula wafua. Hene luholo athu a gufua anago gujiya nga gima, ajiyilego nji gutukalagala nga gima. Gishina giene tushigo naye guakombelela nga gutshita ndaga imoshi ngenyi hagula atuvuilago khabu, tushigo naye nji gutoga Nzambi mukunda nu ene.

Athu ako ana zuela egi ajiya guta maga nu mvumbi. Uvi ndaga ya luholo elu yajiyilego gukalegewa, handaga gifua luholo tuayimonyi, athu a gufua ‘ana jiya ndo nga gima.’ Hene athu ana tangiza egi ana zuela nu mvumbi, uvi mu guzuela guabonga ana guta maga nu bademo anyi ana gudibuisa gifua athu anyi afuile gale. Gujiya giamatshidia giatadila athu a gufua guana gutubamba hagula bademo atuhuigigo. Yehowa wana gututunyisa ha guzuela nu mvumbi handaga wana jiya egi guta maga nu bademo guajiya gutubatela malamba.​—Tanga Mikhuala 18:10-12.

3. Longuga giamatshidia giatadila athu a gufua

Ha mavu agasue, athu ana tshigina ndaga jia gudisha jiatadila athu a gufua. Uvi mukatshi dia ndaga jiene jiagasue, jiko jiana khalago jia giamatshidia.

• Ha fundo muana khala, ndaga jitshi athu ana zuela mukunda nu athu anyi afuile gale?

 4. Gujiya giamatshidia giatadila athu a gufua guana gutubatela gubonga

Gujiya giamatshidia giatadila athu a gufua guana gutukuatesa ha gutuna guvua woma wa mvumbi. Tanga Mulongeshi 9:10, gungima zuelelenu muhu owu:

• Athu a gufua ajiya gututshita gubola ba?

Gula tudi musha mutshima mu giamatshidia giana longesa Biblia, mbatushigo mutshigina malongo a mambo ana zuela egi tudi naye gukombelela athu afuile gale nga gukalagala ndaga imoshi ngenyi hagula atuvuilago khabu. Tanga Yeshaya 8:19 nu Gumonesa 4:11, gungima zuelelenu muhu owu:

• Udi mutangiza egi Yehowa wana gudivua luholo lutshi gula muthu udi mukombelela athu a gufua, nga ndo udi mukamba ukuateshi gudi athu ene?

5. Gujiya giamatshidia giatadila athu a gufua guana gutuhana gikhesa

Athu avula ana longesewa egi gula afua, mbaahanewa ndola mukunda nu ndaga jiabola jiakalegele ene. Uvi ndaga ya giamatshidia idi egi, gushigo nga nu muthu mumoshi wana mona malamba gula wafua, ikhale muthu muene wakhalele mutshita ndaga jiabonga nga jiabola. Tanga Roma 6:7, gungima zuelelenu muhu owu:

• Biblia yana zuela egi gula muthu wafua, wana futa mukudi wa gubola guenji. Hene udi mutangiza egi muthu wajiya gulandula gumona lamba mukunda nu ndaga jiabola jiakalegele muene gutuama egi afue ba?

Gula tudi mulonguga ndaga jiavula jiatadila Yehowa, mbatukotelesa diago egi muene gajiyilego gumonesa athu a gufua malamba. Tanga Mikhuala 32:4 nu 1 Yone 4:8, gungima zuelelenu mihu eyi:

• Luholo verse eji jiazuelela makalegelo abonga a Nzambi, aye udi mutangiza egi Nzambi wajiya diago gumonesa athu a gufua malamba ba?

• Gujiya giamatshidia giatadila athu a gufua guajiya guguhana gikhesa ba? Mukunda natshi?

 NDAGA WALONGUGA

Gula muthu wafua, wafui diago, ganago gujiya nga gima. Athu a gufua anago gumona malamba, ajiyilego nji gututshita nga gima.

Mihu ya Guvutugila

• Itshi yana buila muthu gula wafua?

• Luholo lutshi gujiya giamatshidia giatadila athu a gufua guana gutubatela gubonga?

• Luholo lutshi gujiya giamatshidia giatadila athu a gufua guana gutuhana gikhesa?