MSOLO 29

Ko nchani chichachitika tikafa?

IMBISANI

Ko imwepo mudaferewako kale munthu yemwe muchamukonda? Vimwevi vichakhala vowawa maninge. Ndipo panango mungadzibvunze kuti: ‘Ko nchani chichachitika tikafa? Ko panachidikhiro chilichose chakuti tingadzamuwone pomwe wokondewa wathu?’ Mu pfunziro ino na yapatsogolo, tiwone midawiro yokhazika moyo pasi yomwe Baibolo ichapereka.

1. Ko nchani chichachitika tikafa?

Yesu adalinganiza impfa na tulo. Munthu yemwe aligone tulo tukulu achadziwalini vomwe vinkuchitika pafupi na iye. Ko impfa ni yobverana tani na kugona? Munthu akafa, iye akhalalini ankubva kuwawa, ndipo achadzibvalini kukhala yekhayekha. Vilibe basa peno iye ambakonda tani azishamwali wake panango azibale wake. Baibolo ichanena kuti: ‘Wakufa achadziwalini chilichose.’—Lewengani Mlaliki 9:5.

2. Ko tichaphindula tani tikadziwa chaivo vomwe vichachitika munthu akafa?

Wanthu azinji achachita mantha na impfa mpakana achagopa wanthu wakufa. Koma imwepo mungakhazikiwe moyo pasi mukadziwa vomwe Baibolo ichanena pa nkhani ya impfa. Yesu adati: ‘Chonadi chidzakumasuleni.’ (Yohane 8:32) Mosiyana na vomwe vipembedzo vinango vichanena, Baibolo ichapfunzisalini kuti munthu anamzimu womwe uchafalini, panango kuti uchakhala kumalo yanango iye akafa. Ndipomwapa munthu akafa iye aboneralini olo pang’ono. Pakuti wakufa achadziwalini chinthu chilichose, iwo angatichitirelini chinthu chilichose. Isepano tifunikalini kuchita vinthu vofuna kuti aleke kukalipa nase wanthu womwe adafa ndipo tichadekanalini pomwe kuwapempherera.

Wanthu anango achanena kuti iwo angakwanise kuyankhula na wanthu wakufa. Koma vimwevi nivosakwanisika. Ninge mwatapfunzirira, munthu akafa ‘achadziwalini chilichose.’ Wale womwe achaganiza kuti angakwanise kuyankhula na wanthu womwe adafa, akhala kuti ankuyankhula na viwanda vomwe vichanamizira kukhala wanthu womwe adafa. Ndipomwapa tikadziwa chonadi pankhani ya wanthu wakufa, vichatiteteza ku viwanda. Yahova achalambiza kuyankhula na wanthu wakufa ndawa yakuti kuchita vimwevi tingakhale tinkuyankhulana na viwanda vomwe vingatichitelini bwino.—Lewengani Deuteronomo 18:10-12.

PFUNZIRANI VIZINJI

Dziwani vizinji vomwe Baibolo ichanena pankhani ya impfa, ndipo limbisani chikhulupiriro chanu pa chikondi cha Mulungu yemwe achaboneresalini wanthu womwe adafa.

3. Dziwani chaivo vichachitika munthu akafa

Padziko yose yapasi, wanthu achakhulupirira vosiyanasiyana pa vomwe vichachitika munthu akafa. Ndipo ni vikhulupirirolini vose vimwevi vomwe vichalewa chaivo.

Ko ni chikhulupiriro chiponi cholewa va wanthu wakufa chomwe ni chodzala maninge komwe muchakhala?

Dziwani vomwe Baibolo ichapfunzisa, wonesani VIDIYO.

VIDIYO: Ko nchani chichachitika munthu akafa?—Mbali yake (1:19)

Lewengani Mlaliki 3:20, ndipo patsogolo pake kambiranani mibvunzo aya:

Mobverana na vesi mweyi, ko nchani chichachitika munthu akafa?
Ko panambali inango yomwe ichapitiriza kukhala na moyo munthu akafa?

Baibolo ichatiuza va impfa ya Lazaro yemwe wenze shamwali wake wapamoyo wa Yesu. Imwepo lewengani Yohane 11:11-14, ndipo wonani momwe Yesu adalinganizira impfa ya Lazaro. Ndipo patsogolo pake kambiranani mibvunzo aya:

Ko Yesu adalinganiza impfa na chani?
Ko kulinganiza kumuko kuchatiwuza chani pankhani ya wale womwe adafa?
Ko imwepo muchawona kuti vomwe Baibolo ichanena pankhani ya impfa ni vobveka?

4. Kudziwa chonadi pankhani ya impfa kuchatiphindulisa

Kudziwa chaivo vomwe vichachitika pankhani ya impfa kuchatimalisa mantha ya impfa. Lewengani Mlaliki 9:10, ndipo patsogolo pake kambiranani mbvunzo uyu:

Ko wanthu wakufa angatichite voipa?

Chonadi cha m’Baibolo chichatiteteza pomwe kuvikhulupiriro vomwe wanthu achati wanthu wakufa achadekana kugopewa panango kupemphererewa. Lewengani Yesaya 8:19 na Chivumbulutso 4:11, ndipo patsogolo pake kambiranani mbvunzo uyu:

Ko imwepo munkuganiza kuti Yahova achabva tani va munthu yemwe achatumikira panango achafagafaga thandizo kwa munthu yemwe adafa?

Kudziwa chaivo vomwe vichachitika munthu akafa kuchatimasula ku miyambo yomwe yachonyozesa Yahova

5. Kudziwa chaivo pa vomwe vichachitika munthu akafa kuchatikhazika moyo pasi

Wanthu azinji akhala ankuganiza kuti iwo akadzafa adzaboneresewe ndawa ya vomwe adachita ali moyo. Koma vichakhazika moyo pasi kudziwa kuti palibe yemwe achabonera akafa. Olo munthu yemwe adachita vinthu vizinji voipa. Lewengani Aroma 6:7, ndipo patsogolo pake kambiranani mbvunzo uyu:

Ninge mwatawengera m’Baibolo kuti impfa ichamasula munthu ku uchimo, ko munkuganiza kuti aliyese yemwe wafa achakhala ankushupika ndawa ya vinthu vomwe adaphonyesa kumbuyo?

Tikafika pakumudziwa bwino Yahova tingafike pakuzindikira kuti iye angabvumelini kuti wanthu wakufa ambabonere. Lewengani Deuteronomo 32:4 na 1 Yohane 4:8, ndipo patsogolo pake kambiranani mibvunzo aya:

Ko Mulungu yemwe anamakhalidwe yomwe tawona m’mavesi mwaya angabvumedi kuti ambabonerese wanthu womwe adafa?
Ko munkuwona kuti chonadi cholewa va munthu akafa nichokhazika moyo? Ndawa chani?

WANTHU ANANGO ACHATI: ‘Ninamantha na vomwe vidzanichitikire nikadzafa.’