Hao, eniwan wea iu lovem tumas hem dae? Taem iu kasem hard samting olsem, maet iu laek for savve: ‘Man wea dae finis hem hao? Enitaem bae iumi lukim moa olketa lo famili and olketa fren blo iumi wea dae finis?’ Lo disfala leson and lo next leson, bae iumi storyim ansa from Bible for olketa kwestin hia.

1. Man wea dae finis hem hao?

Jesus sei man wea dae hem olsem man wea deepim sleep. Hao nao man wea dae hem semsem witim man wea sleep? Man wea deepim sleep no savve lo eni samting wea happen raonem hem. Bihaen man dae, hem no feelim eni pain and no lonely tu. Bible sei: “Olketa hu i dae finis, olketa nating save long enisamting.”​—Readim Eklesiastes 9:5.

2. Why nao hem gud for iumi savve lo tru samting abaotem dae?

Staka pipol fraet for dae and fraetem tu pipol wea dae finis! Bat bae iu hapi for savve lo samting wea Bible talem abaotem dae. Jesus sei: “[Truth] bae mekem iufala free.” (John 8:32) Samfala religion sei man wea dae soul blo hem gohed laef, bat Bible no teachim datwan. So bihaen man dae, hem no gohed safa. Bible sei tu pipol wea dae finis no savve lo eni samting, so olketa no savve spoelem iumi. So iumi no need for worshipim pipol wea dae finis or duim samting for mekem olketa no kros lo iumi. And iumi no need for prea for olketa tu.

Samfala pipol sei olketa savve story witim pipol wea dae finis. Bat hem hard tumas for olketa duim datwan. Olsem iumi just lanem, olketa wea dae “nating save long enisamting.” Olketa wea tingse olketa story witim pipol wea dae finis, olketa story nomoa witim olketa demon wea act olsem olketa nao pipol hia wea dae. So for savve lo tru samting abaotem dae, datwan protectim iumi from olketa demon. Jehovah warnim iumi for no trae for story witim pipol wea dae finis, bikos Hem savve olketa demon bae spoelem iumi.​—Readim Diutronomi 18:10-12.

3. Lanem truth abaotem pipol wea dae finis

Evriwea raonem world, pipol garem olketa difren biliv abaotem man wea dae. Bat datwan no minim evri biliv hia hem tru.

• Wat nao pipol lo ples blo iu bilivim abaotem man wea dae finis?

 4. For savve lo truth abaotem dae hem helpem iumi

Taem iumi savve lo tru samting abaotem dae, datwan helpem iumi for no fraetem pipol wea dae finis. Readim Eklesiastes 9:10, then discussim tugeta kwestin hia:

• Hao, olketa wea dae finis savve spoelem iumi?

For savve lo truth from Bible hem protectim iumi tu from olketa biliv wea sei, iumi mas worshipim pipol wea dae finis, or duim samting mekem olketa no kros lo iumi. Readim Aesaea 8:19 and Revelation 4:11, then discussim tugeta kwestin hia:

• Hao nao tingting blo Jehovah abaotem eniwan wea worshipim man wea dae or askem help from datfala man?

5. For savve lo truth abaotem dae hem mekem iumi hapi

Staka lanem from taem olketa smol, God bae panisim olketa for olketa nogud samting wea olketa duim taem olketa dae. Bat iumi hapi for savve no eniwan safa bihaen hem dae, nomata man wea duim barava nogud samting. Readim Rome 6:7, then discussim tugeta kwestin hia:

• Olsem Bible talem, lo tingting blo God, taem man dae hem no guilty nao lo olketa sin blo hem. So iu tingse man wea dae hem gohed safa bikos lo olketa nogud samting wea hem duim bifor?

Taem iumi gohed lane abaotem Jehovah and savve gud lo hem, bae iumi luksavve hard tumas for hem mekem pipol wea dae finis for safa. Readim Deuteronomy 32:4 (NW) and 1 John 4:8, then discussim tugeta olketa kwestin hia:

• Iu tingse God wea garem olketa naesfala wei wea tufala scripture hia storyim bae hapi for mekem pipol wea dae finis for gohed safa?

• Hao, iu hapi for savve lo tru samting abaotem dae? Why nao olsem?

 MAIN POINT

Taem man dae, hem no savve lo eni samting. Hem no safa and no savve spoelem olketa wea laef.

Review

• Man wea dae finis hem hao?

• Taem iumi savve lo truth abaotem dae, hao nao datwan helpem iumi?

• Taem iumi savve lo truth abaotem dae, hao nao datwan mekem iumi hapi?