¿Wilik na afamilia kamnaq? Noq tiʼikʼik chupaam i tiʼkiil kʼuxliis wilih, mareh inawaaj anabʼeem «¿Chajariik inkʼularik kuukʼ taqeh kamnaq? ¿Ne woʼ na chik inwil kiwach taqeh nufamilia kamnaq?». Chupaam i tijinik wilih eh chupaam i chalik reh, reʼ Santo Laj Huuj naruqʼorom rubʼehel qeh taqeh pahqanik wilih eh ne iruyeew rukowiil qakʼux.

1. ¿Chajariik iruqʼor i Santo Laj Huuj chi inkikʼraaj taqeh kamnaq?

Reʼ Jesús xuqʼor chi reʼ kimik jeʼ rukabʼ noq jenoʼ inqajik i ruwiriik. ¿Chaaj woʼ reet jenaj wach i kimik ruukʼ i wirik? Noq jenoʼ kʼachareel qajinaq i ruwiriik maʼxta irikʼraaj eh noq jenoʼ inkimik maʼxta i tiʼ irikʼraaj. Reʼ Santo Laj Huuj iruqʼor «reʼ taqeh kamnaq maʼxta chik i kehtʼal» (chawil Eclesiastés 9:5, TNM).

2. ¿Nikʼwach qojrutobʼeej runabʼjiik i korik chi riij i kimik?

Kʼih taqeh kʼachareel kiyoʼjik ruum i kimik, eh kiyoʼjik woʼ ruum taqeh kamnaq. Wilaʼ reʼ hat tiyoʼjik, reʼ iruqʼor i Santo Laj Huuj ne tirutobʼeej. Chawil i xuqʼor i Jesús: «Reʼ i korik ne taq tiruchej» (Juan 8:​32, TNM). Juʼjun taqeh iglesia inkikʼuhtaaj chi reʼ i anima maʼ insahchik ta wach noq inkimik i kʼachareel xa reʼ laʼ, reʼ Santo Laj Huuj iruqʼor chi reʼ taqeh kamnaq maʼ inkitoj ta chik kimahk. Ruum chi reʼ taqeh kamnaq maʼxta chik i kehtʼal, maʼ ne ta inkibʼan i tiʼ qeh ni xa ta ne qojkiyohbʼisaj. Ruum aj reʼ, maʼ ko ruman ta chi ne inqabʼan qatiij chi kiij ni xa ta ko ruman chi ne inqabʼan jenoʼ ninqʼiij reh chi ne inqajotʼisaj wach i kijosqʼiil oon reh kiloqʼjik.

Juʼjun taqeh kʼachareel inkiqʼor chi inkiqʼoreej taqeh kamnaq, xa reʼ laʼ reʼ wilih maʼ korik ta. Jeʼ rukabʼ xqil «reʼ taqeh kamnaq maʼxta chik i kehtʼal». Noq reʼ taqeh kʼachareel inkiqʼor chi kiqʼorik ruukʼ i kifamilia kamnaq, maʼ reʼ ta i kifamilia inkiqʼoreej reʼ laʼ taqeh i maʼ atoobʼ laj uxlabʼal. Jeʼ reʼ noq, reʼ runabʼjiik i korik chi riij taqeh kamnaq qojrukoʼleej chuwach taqeh i maʼ atoobʼ laj uxlabʼal. Reʼ Jehová iruqʼor qeh chi maʼ inqabʼan i qʼorik kuukʼ taqeh kamnaq, wilaʼ xqabʼan ne inqakoj qiibʼ pan yohbʼaal ruum chi reʼ taqeh maʼ atoobʼ laj uxlabʼal ne inqaqʼoreej (chawil Deuteronomio 18:​10-​12).

3. Reʼ wilih i korik chi riij i kimik

Jun suut i akʼal reh reh wach inkikapaaj chi riij noq inkimik jenoʼ xa reʼ laʼ reʼ inkikapaaj maʼ korik ta.

• Pan atinamiit, ¿chajariik inkibʼan chi kiij taqeh kamnaq?

 4. Runabʼjiik i korik chi riij i kimik qojruchej pan chukuj qʼorik

Noq inqatijej iruqʼor i Santo Laj Huuj chi riij i kimik maʼ qojyoʼjik ta chik kuum taqeh kamnaq. Chawil taq i Eclesiastés 9:​10 eh tiqʼoroq taq chi riij:

• ¿Ne na inkibʼan i tiʼ kʼaxik qeh taqeh kamnaq?

Reʼ irukʼuhtaaj i Santo Laj Huuj qojruchej pan chukuj qʼorik jeʼ rukabʼ noq inkiqʼor chi naqajotʼisam wach i kikʼaah taqeh kamnaq oon chi naqayeʼem kiloqʼil pan kiqʼijil. Chawil taq Isaías 8:19 eh Apocalipsis 4:​11, eh tiqʼoroq taq chi riij:

• ¿Chajariik irikʼraaj i Jehová inaqʼor i hat noq jenoʼ kʼachareel iruyeew ruloqʼil taqeh kamnaq oon irupahqaaj rutobʼaal keh?

5. Iruyeew rukowiil qakʼux noq inqanabʼeej i korik chi riij i kimik

Kʼih taqeh kʼachareel inkiqʼor chi noq jenoʼ maʼ irubʼan ta i holohik pan rukʼachariik inooj rutoj wach noq kamnaq chik. Xa reʼ laʼ irusuqbʼisaj qakʼux noq inqanabʼeej chi noq jenoʼ inkimik maʼxta chik irikʼraaj ni xa ta inkikʼul i tiʼ taqeh inkibʼan i maʼ holohik ta. Chawil taq i Romanos 6:7 eh tiqʼoroq taq chi riij:

• Reʼ Santo Laj Huuj iruqʼor chi noq inkimik jenoʼ kʼachareel maʼxta chik rajaawriik i mahk chi naah eh insahchik wach taqeh rumahk. Jeʼ reʼ noq, ¿inaqʼor na i hat chi reʼ taqeh kamnaq kʼahchiʼ kitojom wach i kimahk xkibʼan pan kikʼachariik?

Noq inqanabʼeej wach chi korik i Jehová chʼiklik qakʼux chi reʼ reh maʼ irubʼan ta chi reʼ taqeh kamnaq ne inkitoj i kimahk. Chawil taq i Deuteronomio 32:4 eh i 1 Juan 4:8, eh tiqʼoroq taq chi riij:

• Wilaʼ reʼ Dios korik wach rukʼux eh ajkʼaxool jeʼ rukabʼ iruqʼor taqeh texto, ¿ne na irukanaaʼ chi reʼ taqeh kamnaq ne inkitoj kimahk?

• ¿Inaqʼor na i hat chi reʼ irukʼuhtaaj i Santo Laj Huuj chi riij i kimik ne iruyeew rukowiil qakʼux? ¿Chaaj woʼ reet jeʼ reʼ inaqʼor?

 KʼOLOQ PAN AKʼUX

Noq jenoʼ inkimik insahchik wach i rukʼachariik. Reʼ taqeh kamnaq maʼ inkitoj ta kimahk eh maʼ ajwach ta ne inkibʼan i tiʼ reh.

Reʼ xkahnik pan akʼux

• ¿Chajariik iruqʼor i Santo Laj Huuj chi inkikʼraaj taqeh kamnaq?

• ¿Chaaj woʼ reet reʼ runabʼjiik i korik chi riij i kimik qojruchej pan chukuj qʼorik?

• ¿Chaaj woʼ reet iruyeew rukowiil qakʼux noq inqanabʼeej i korik chi riij i kimik?