Muľa tuke vareko, kas igen kamehas? Andre odi bari dukh tuke šaj avel pre goďi: ‚So amenca ela, te meraha? Dikhaha varekana olen, so amenge mule?‘ Andre kadi lekcija the andre aver pes dodžanaha o lava andal e Biblija, savendar chudaha smirom pro jilo.

1) So amenca ela, te meraha?

O Ježiš phenďa, hoj o meriben hin sar o zoralo soviben. O manuš, so zorales sovel, na džanel, so pes kerel khatar leste. Soske šaj phenas, hoj o meriben hin sar o zoralo soviben? Sar manuš merel, imar na ciťinel ňisavi dukh, aňi imar na džanel, či les vareko kamel abo na. „Ola, so mule, imar na džanen ňič,“ phenel e Biblija. (Pregen Kazateľ 9:5)

2) Sar amenge pomožinel o čačipen pal o meriben?

But manuša daran le meribnastar the le mulendar! Te tut dodžaneha, so vakerel e Biblija pal o meriben, šaj tuke ačhel o jilo pro than. O Ježiš phenďa: „O čačipen tumen oslobodzinela.“ (Ján 8:32 NZ) Varesave vjeri sikhľaren, hoj o manuš pal o meriben dživel dureder. Aľe kada andre Biblija nane. La Biblijatar džanas, hoj pal o meriben ňiko na cerpinel. A tiš džanas, hoj o manuš pal o meriben pestar na džanel. Našťi amenge kerel ňisavo nalačhipen aňi amen našťi daravel. A vašoda na kampel te kerel ňič, kaj pes le mulendar te chraňinas, aňi pes vaš lenge na modľinas.

Varesave manuša phenen, hoj vakerenas le mulenca. Aľe kada pes na del! Akana sikhľiľam, hoj o mule „na džanen ňič.“ Ola, so peske mišľinen, hoj vakeren le mulenca, čačes vakeren le demonenca. On pestar ča keren, hoj hine ola manuša, so mule. Te imar džanas o čačipen pal o meriben, sam chraňimen the le demonendar. O Jehovas na kamel, kaj te vičinas avri le mulen, bo džanel, hoj avka vičinas le demonen ke amende khere a akor amenge šaj ubližinen. (Pregen 5. Mojžišova 18:10–12)

3) O čačipen pal oda, so hin le mulenca

Sako pro svetos paťal andre varesoste aver, hoj, so hin amenca pal o meriben. Aľe na savoro hin čačipen.

• Andre soste paťan o manuša odoj, kaj džives, hoj, so hin le mulenca?

 4) O čačipen pal o meriben amen del sloboda

Te džanas o čačipen pal oda, so hin le mulenca, paľis lendar na daras. Pregen Kazateľ 9:10 a paľis vakeren jekhetane:

• Šaj amenge o mule keren vareso nalačho?

Te čačeste paťas, so phenel e Biblija pal o mule, na keraha ňič, kaj pes le mulendar te chraňinas a aňi pes vaš lenge na modľinas. Pregen Izaiáš 8:19 the Zjavenie 4:11 a paľis vakeren jekhetane:

• So peske o Jehovas mišľinel pal o manuš, so pes modľinel kijo mule abo vičinel avri le mules, kaj leske te pomožinel?

5) Čačipen pal o meriben amen del smirom pro jilo

But manuša paťan, hoj pal o meriben cerpinena vaš o nalačhipen, so kerenas. Aľe amen na mušinas te daral, bo imar džanas, hoj pal o meriben ňiko na cerpinel, aňi ola, so kerenas igen bare bini. Pregen Rimanom 6:7 a paľis vakeren jekhetane:

• Adaj andre Biblija genďam, hoj o manuš le meribnaha poťinel vaš peskere bini. Šaj paľis vareko pal o meriben cerpinel vaš o bini, so kerelas?

Te buter sprindžaraha le Jehovas, džanaha, hoj bi leske ňigda na avľahas pre goďi varekas pal o meriben te labarel andre jag. Pregen 5. Mojžišova 32:4 the 1. Jána 4:8 a paľis vakeren jekhetane:

• Ala teksti sikaven, savo hino o Del. Domukhľahas bi ajso Del, kaj vareko pal o meriben te cerpinel dukh?

• Hin tut smirom pro jilo, te imar džanes čačipen pal o meriben? Soske?

 SO SIKHĽIĽAM

Te o manuš merel, imar dureder na dživel. Ňikhaj na cerpinel a aňi ňikas na daravel.

So bi phenehas

• So amenca ela, te meraha?

• Savi sloboda amen del o čačipen pal o meriben?

• Soske hin amen smirom pro jilo, te džanas čačipen pal o meriben?