Дали декхой, колес дехес, муло? Тогава сигурно пучлян тут: „Со ачшол аменца, кана мерас? Дали ащи пак те дикхас амаре близконе манушен, колато муле?“ Калке тай околе-да урокиесте ка дикхас со пхенел и Библия калке въпросиенге тай сави утеха дел амен.

1. Со ачшол аменца, кана мерас?

О Исусес пхенгяс, кай кана мануш мерел, все едно совел. Соске? Кана декхой совел, ов на ахальовел со ачшол турял лесте. О също си кана декхой мерел. Ов на ахальовел нищо, на дукхал лес нищо, нито мъчинел пес. И Библия пхенел, кай „о муле на ахальовен нищо“. (Четине Еклисиаст 9:5.)

2. Соске си шукар те жанас со наистина ачшол аменца, кана мерас?

Бут мануша даран таро мериба тай таро муле. Ама като ка ахальовес со пхенел и Библия е муленге, ка локьол туке. О Исусес пхенгяс: „И истина ка освободинел тумен.“ (Йоан 8:32) Бут кхангеря сикавен, кай е манушен иси безсмъртно душа. Ама и Библия на сикавел, кай иси амен душа, която продължинел те живинел палал о мериба. Латар ахальовас, кай никхой на мъчинел пес палал о мериба. Щом о муле на ахальовен нищо, он нащи те керен аменге кханилипе. Аке соске на требе те дарас, кай ка холянкярас лен тай на требе те раздас ленге, те мукас хабе ко мимори или те молинас амен за ленге.

Авер пхенен, кай ащи те хоратинен е муленца. Ама сарто сиклилям, о муле „на ахальовен нищо“ тай нанай сар те хоратинас ленца. Десаве мануша мислинен, кай хоратинен е муленца, ама он хоратинен е демониенца, колато прекерен по гласос сар е мулескоро или керен пес сар лесте. Аке соске, като жанас со наистина ачшол е муленца, ащи те пазинас амен таро демоня. О Йехова пхенел аменге те на опитинас амен те хоратинас е муленца, соскето жанел, кай о демоня ка керен аменге кханилипе. (Четине Второзаконие 18:10-12.)

3. Со наистина ачшол е муленца

О мануша верувинен различноне букиенде далкхеске со ачшол аменца, кана мерас. Ама нащи саворе калка букя те овен верна.

• Со пхенен, кай ачшол е муленца, о мануша отхе, кате бешес?

 4. Шукар си те жанас и истина е муленге

И истина е муленге, помагинел аменге те на дарас лендар. Четинен Еклисиаст 9:10 тай хоратинен калке въпросиеске:

• Ащи ли о муле те керен аменге кханилипе?

Кана жанас со пхенел и Библия за е муленге, нанай те верувинас андо хохайбе, кай требе те раздас или те мукас хабе ко мимори или те керас авер букя, за те на холянкярас лен. Четинен Исаия 8:19 тай Откровение 4:11 тай хоратинен калке въпросиеске:

• Сар чувствинел пес о Йехова, кана дикхел, кай декхой поклонинел пес е муленге или родел помощ лендар?

5. Локьол аменге, кана жанас и истина е муленге

Бут мануша мислинен, кай кана ка мерен, ка овен накажиме е кханиле букиенге, колато керде. Ама си бут шукар те жанас, кай нито йекх мануш на мъчинел пес палал о мериба — даже о мануша-да, колато керде бут кханиле букя. Четинен Римляни 6:7 тай хоратинен калке въпросиеске:

• И Библия пхенел, кай кана йекх мануш мерел, о Дел простинел лескере саворе безеха. Мислинес ли тогава, кай о муле мъчинен пес, ашал е безехенге, колато керде, кана сине живде?

Кизом по-бут пенжарас е Йеховас, зомкха по-бут ахальовас, кай ов нанай сар те домукел о муле те мъчинен пес. Четинен Второзаконие 32:4 тай 1 Йоан 4:8 тай хоратинен калке въпросиенге:

• Като жанес саво си о Дел, мислинес ли, кай ов ка домукелас о муле те мъчинен пес?

• Локьол ли туке, като жанес и истина е муленге? Соске?

 СО СИКЛИЛЯМ

Кана мануш мерел на ахальовел нищо. О муле нито мъчинен пес, нито ащи те керен аменге кханилипе.

О най-важна букя таро уроки

• Со ачшол аменца, кана мерас?

• Соске си шукар те жанас и истина е муленге?

• Соске локьол аменге, като жанас и истина е муленге?