LESONA 29
O le ā e Tupu pe a Tatou Feoti?
Po ua maliu se tasi e pele iā te oe? I na taimi faigatā, e te ono tomānatu: ʻO le ā e tupu pe a tatou feoti? Pe e iai se faamoemoe e tatou te toe vāai ai i ē pele ua maliliu?’ I lenei lesona ma le lesona e sosoo ai, mātau tali faamāfanafanaloto mai le Tusi Paia.
1. O le ā e tupu pe a tatou feoti?
Na faatusaina e Iesu le oti i le moe gase. O se tagata e gase lana moe, e na te lē iloa mea o loo tutupu. O le ā le auala e tutusa ai le oti ma le moe? O se tagata ua oti, e na te lē lagonaina ni tigā. E na te lē lagonaina foʻi le tuua toʻatasi, e tusa lava po o le ā le tele o lona alofa i ana uō ma lona aiga a o soifua, auā ua faapea mai le Tusi Paia: “O ē ua oti latou te lē iloa se mea.”—Faitau le Failauga 9:5.
2. O ā aogā o le iloaina o le mea moni e faatatau i le oti?
E toʻatele tagata e fefefe i le oti, ma e fefefe foʻi i ē ua maliliu. Ae e faamāfanafanaina oe i le manatu o le Tusi Paia e faatatau i le oti. Na fetalai Iesu: ʻE tuusaʻoloto outou e le upu moni.’ (Ioane 8:32) E aʻoaʻo e nisi tapuaʻiga e iai le vaega o le tagata e ola pea pe a oti, ae e lē o le aʻoaʻoga lenā a le Tusi Paia. O lea, e lē o faapuapuagatia se tasi pe a oti. E lē iloa foʻi e le tagata ua oti se mea, ma e lē mafai ona latou faia se mea leaga iā i tatou. E lē manaʻomia la ona tatou taumafai e faamalie pe soona faamamalu naʻuā tagata ua maliliu, ma e lē tatau ona tatou tatalo mo i latou.
Ua faapea mai nisi, e mafai ona latou fesootaʻi atu i tagata ua maliliu. Ae e lē mafai ona tupu lenā mea. O lea ua tatou aʻoaʻoina, o ē ua oti, e “latou te lē iloa se mea.” O i latou e faapea mai o loo fesootaʻi ma ē pele ua maliliu, o le mea moni o loo latou fesootaʻi ma temoni, lea o loo faafoliga mai iā i latou. O le iloa la o le mea moni e faatatau i le oti, e puipuia ai i tatou mai i temoni. O le māfuaaga lenā na lapataʻia ai i tatou e Ieova i le taumafai e fesootaʻi atu i tagata ua feoti, auā o le a fesootaʻi atu ai i temoni, ma faaleagaina ai i tatou.—Faitau le Teuteronome 18:10-12.
SAʻILIʻILI ATILI
Iloilo atili aʻoaʻoga a le Tusi Paia e faatatau i le oti, ma faamalosia lou faatuatua i le iloa e alofa le Atua ma e na te lē faapuapuagatia tagata pe a maliliu.
3. Ia iloa le tulaga moni o le tagata pe a maliu
E eseese talitonuga o tagata i so o se vaipanoa o le lalolagi, i le mea e tupu pe a tatou feoti. Ae o nisi o na talitonuga e lē saʻo.
-
O ā talitonuga taatele i lou vaipanoa e faatatau i le tulaga o le tagata ua maliu?
Ina ia iloa le aʻoaʻoga a le Tusi Paia, faaali le VITIŌ.
Faitau le Failauga 3:20, ona talanoa lea i fesili nei:
-
E tusa ai o lenei mau, o le ā e tupu i le tagata pe a oti?
-
Pe e iai se vaega o le tagata e ola pea pe a oti?
Ua faailoa mai i le Tusi Paia le oti o Lasalo, o se uō vavalalata a Iesu. A o e faitau i le Ioane 11:11-14, mātau fetalaiga a Iesu e faatatau i le tulaga o Lasalo, ona talanoa lea i fesili nei:
-
O le ā na faatusa i ai e Iesu le oti?
-
O le ā ua faailoa mai e lenei faatusatusaga, e faatatau i le tulaga o le tagata pe a maliu?
-
O le ā sou manatu i le faamatalaga a le Tusi Paia e faatatau i le oti?
4. E maua aogā i le iloa o le mea moni e faatatau i le oti
O le iloaina o le mea moni e faatatau i le oti, e tatou te saʻoloto ai mai le fefe i le oti. Faitau le Failauga 9:10, ona talanoa lea i le fesili lenei:
-
Pe e mafai e le tagata ua oti ona faia se mea leaga iā i tatou?
E puipuia foʻi i tatou e le upu moni o le Tusi Paia mai le talitonuga, e tatau ona faamalie pe soona faamamalu naʻuā tagata ua maliliu. Faitau le Isaia 8:19 ma le Faaaliga 4:11, ona talanoa lea i le fesili lenei:
-
O le ā sou manatu i faalogona o Ieova i se tagata e tapuaʻi, pe saʻili atu mo se fesoasoani a se tagata ua maliu?
O le iloa o le mea moni e faatatau i le oti, e tuusaʻoloto ai i tatou mai i aganuu e lē fiafia i ai le finagalo o Ieova
5. E faamāfanafanaina i tatou i le mea moni e faatatau i le oti
Ua aʻoaʻoina le toʻatele o tagata o le a faapuapuagatia i latou pe a maliliu, ona o mea na latou faia a o soifua. Ae e faamāfanafanaina i tatou i le iloa, e lē faapuapuagatia se tasi pe a oti, e tusa lava pe na ia faia mea leaga. Faitau le Roma 6:7, ona talanoa lea i le fesili lenei:
-
Pe afai o loo faapea mai le Tusi Paia o le oti ua magalo ai se tasi mai i le agasala, pe e te manatu la o loo faapuapuagatia se tagata ua maliu ona o ni mea sesē na ia faia?
O le tele o lo tatou iloa e faatatau iā Ieova, o le tele foʻi lenā tatou te iloa ai, e lē mafai ona ia faapuapuagatia se tagata ua maliu. Faitau le Teuteronome 32:4 ma le 1 Ioane 4:8, ona talanoa lea i fesili nei:
-
Pe e mafai e se Atua e iai uiga o loo taʻua i nei mau, ona faapuapuagatia i latou ua maliliu?
-
Pe e faamāfanafanaina oe i le iloa o le mea moni e faatatau i le oti? Aiseā?
UA FAAPEA MAI NISI: “Ou te fefe neʻi fai e se tagata ua oti se mea leaga iā te aʻu.”
-
O le ā se mau faalaeiau mai le Tusi Paia e te ono faailoa atu i ai?
AOTELEGA
Pe a oti le tagata, e na te lē toe iloa se mea. E lē o faapuapuagatia, ma e lē mafai foʻi ona ia faia se mea leaga iā i latou o loo soifua pea.
Fesili Autalu
-
O le ā e tupu pe a tatou feoti?
-
O ā aogā o le iloa o le mea moni e faatatau i le oti?
-
E faapefea ona faamāfanafanaina i tatou i le iloa o le mea moni e faatatau i le oti?
MANATU FAAOPOOPO
Iloilo le uiga o le upu “agaga” i le Tusi Paia.
Pe e faasala e le Atua tagata leaga i le afi i seoli?
Pe e tatau ona tatou fefefe i ē ua maliliu?
Iloilo pe na faapefea ona faamāfanafanaina se tamāloa, i le iloa o le mea moni e faatatau i le tagata pe a maliu.
“Sa Ou Maofa i Tali Saʻo ma Manino Mai i le Tusi Paia” (Le Olomatamata, Fepuari 1, 2015)
E te Ono Fiafia Foʻi
FESILI E MASANI ONA LĀGĀ
O le ā le Talanoaga Faale-Tusi Paia o Loo Ofoina e Molimau a Ieova?
Ua ofo atu e Molimau a Ieova se suʻesuʻega faale-Tusi Paia e lē totogia, e mafai ona e faaaogāina ai so o se faaliliuga o le Tusi Paia. E mafai foʻi ona valaaulia lou aiga atoa po o au uō e auai ai.
