Itwaniaritor kereka ijo itunganan yenimina jo noi? Kapak kangin naetiono, ipedori ijo aomoom ebe ‘Inyo bo etakanikini oni kitwaka’? Ejai kereka amun ebe ‘ipedori oni aanyun lukatwak bobo?’ Kotoma aisisiaet kana keda naetupakini koany abongonokineta nuka Ebaibuli nuitalakaarete.

1. Inyo etakanikini oni kitwaka?

Abu Yesu kituput atwanare keda ajo. Kanuinyo? Itunganan yenejotoi mam ejeni nuiswamasi kamake. Kwape kwangin da, itunganan yenatwana mam ejeni idiobore, mam nges epupi apipilu karaida aiticanitoi. “Mam ikatwak ejenete ibore,” ebala Ebaibuli kwangin.​—Kosiom Ekalimonokinan 9:5.

2. Anyoin bo ajokis naka ajenun abeit naikamunit atwanare?

Itunga luipu ekuriaka luatwak ka atwanare. Konye ipedori ijo adumun aitalakaario kotoma aijen nuebala Ebaibuli kanuikamunitos atwanare. Abala Yesu ebe: “kilacakini yes abeit.” (Yokana 8:32, NWT) Isisianakinete idiinin ice ebe ejai ibore esali ejari ketwana itunganan, konye mam Ebaibuli isisianakini kwangin. Kanuangun, emamei itunganan yenepupi aiticanitoi ketwana. Kwape mam lukatwak ejeniata idiobore, mam kes epedorete aiswamakin oni nueroko. Aso, emamei ajokis na oni aitam aisiyalamikin kes arai bo aima kes, ido mam ibusakinit oni ailipanakin kes.

Ebakasi icetunga ebe inerananas kesi kaluatwak. Konye mam ngun epedoros. Kwape idaunia ijo aisisiaun, mam luatwak ‘ejenete idiobore.’ Itunga lueomitos ebe ineranakinos kesi keda lukatwak, erai aticepak ajokin nuituputooro bala itunga lukatwak kes inerananas kakes. Kanuangun, aijen abeit naikamunit lukatwak eyuwari oni kaneejaas ajokin. Ikwenyarit Yawe oni mam aitam einer keda lukatwak naarai ejeni ngesi ebe ainerenen keda ajokin itodoikini oni toma aronis.​—Kosiom Ikisila 18:10-12.

3. Kisisiau abeit naikamunit lukatwak

Anatar akwap kere, ejaatar itunga luipu kaiyuununeta nuegelegela nuikamunitos nuetakanikinete oni kitwaka. Konye mam aiyuuneta ngun kere eraasi nuabeit.

• Anu bo aiyuununeta nuejaasi atutubetekon nuikamunitos lukatwak?

 4. Imedauni oni kotoma aijen abeit naikamunit atwanare

Aijen abeit naikamunit atwanare, elakuni oni kotoma akurian lukatwak. Kosiom Ekalimonokinan 9:10, kosodete aimor aingiset nata:

• Epedorete kereka lukatwak aiswamakin oni adioronis?

Elakuni bobo oni abeit naka Ebaibuli kotoma aiyuununeta nuka aswam asuban nuka aitam aitalakaar lukatwak arai bo aima kes. Kosiom Isaia 8:19 keda Apukokinio 4:11, kosodete aimor aingiset nata:

• Iwomit ijo epone ani epupio Yawe kanuikamunitos itunganan yenijaanakini arai bo yenilipi aingarakinio kaneejaasi luatwak?

5. Einakinit oni Ebaibuli aitalakaario

Itunga luipu isisianakinitai ebe arai ketwaka kesi itisilaario kanu adiakanareta nuiswamatos kesi eroko etwaka. Konye eraasi nuitalakaarete oni aijen ebe mam bobo idiotunganan epupi apipil ketwana, karaida ngul lueswamatos iboro lueroko noi. Kosiom Iromayon 6:7, kosodete aimor aingiset nata:

• Ebala Ebaibuli ebe ketwana itunganan, mam bobo Edeke itepesenit nges kanu arokisioke, iwomit kereka ijo ebe epupete kwape kwana lukatwak apipil kanu adiakanaretakec nuiswamatos kesi eroko etwaka?

Nainyikokinia oni aisisia nuikamunitos Yawe, iyatakini oni ajenun ebe mam ngesi itisilaanari lukatwak. Kosiom Ikisila 32:4 keda 1 Yokana 4:8, kosodete aimor aingiseta nuta:

• Epedori kereka Edeke loejaatar keda iponesio luineritai kokokoron kangul aitojokaar aitisilaanar lukatwak?

• Abeit naikamunit atwanare italakaarit kereka ijo? Kanuinyo?

 NUIDAU AISISIAUN

Ketwana itunganan, adaun akeijar. Mam lukatwak epupete apipil ido emameete nuepedorete kesi aiswamakin oni.

Ainyogoor

• Inyo etakanikini oni kitwaka?

• Epone ani imedaunia oni kotoma aijen abeit naikamunit atwanare?

• Epone ani italakaaritor oni abeit naikamunit atwanare?