Dogan-garyndaşlaryňdan biri aradan çyksa, onda şeýle soraglar hakda oýlanýansyň: «Adam ölensoň näme bolýar? Aradan çykan dogan-garyndaşlarymy ýene görüp bilerinmi?» Şu we indiki sapakda şol soraglaryň jogabyny bilip, ýüregiň giňär.

1. Ölümden soň näme bolýar?

Isa pygamber ölümi agyr uky bilen deňeşdirdi. Süýji ukuda ýatan adam daş-töwereginde bolýan zatlary duýmaýar. Şonuň ýaly adam ölensoň, hiç zat bilmeýär, hiç ýeri agyrmaýar, özüni ýeke duýmaýar. Mukaddes Kitapda: «Ölüler... hiç zat bilmeýär» diýilýär (Nesihat 9:5-i oka).

2. Ölüm baradaky hakykaty bilmegiň nähili peýdasy bar?

Köp adamlar ölümden we ölen adamlardan gorkýarlar. Ýöne Mukaddes Kitapda ölümden we ölen adamlardan gorkmaly däldigimiz aýdylýar. Isa pygamber «hakykatyň azat etjekdigini» aýdypdy (Ýahýa 8:32). Köp dinlerde adam ölensoň, ruhy çykyp başga ýerde ýaşaýar diýip öwredýärler. Ýöne Mukaddes Kitapda munuň ýalandygy aýdylýar. Diýmek, adam ölensoň hiç hili agyry duýmaýar, hiç zady bilmeýär, zyýanam ýetirmeýär. Şol sebäpli aradan çykan adamlary razy etmek üçin edilýän zatlaryň, doga-dilegleriň hiç hili peýdasy ýok.

Käbir adamlar ölüler bilen gepleşýändirin öýdýär, ýöne biz «ölüleriň... hiç zat bilmeýändigine» düşünýäris. Ölüler bilen gepleşýän adam, aslynda, jyn-arwahlar bilen gepleşýär, sebäbi jynlar ölen adamyň keşbinde görnüp, sesine meňzeş edip gepläp bilýärler. Ölüm barada hakykaty bilip, indi jyn-arwahlardan gorkmarys. Ýehowa Hudaý ölüler bilen gepleşmek babatda duýduryş berýär, sebäbi jyn-arwahlar bilen iş salyşmak howply (5 Musa 18:10—12-nji aýatlary oka).

3. Ölüm baradaky hakykat

Adam ölensoň näme bolýandygy barada dürli-dürli ynançlar bar. Şol ynançlaryň ählisine dogry diýip bolmaz.

• Ýaşaýan ýeriňde adam ölensoň näme bolýandygy barada näme diýilýär?

 4. Ölüm barada hakykaty bilsek, onda gorkmarys

Ölüm barada hakykaty bilsek, ölülerden gorkmarys. Nesihat 9:10-y okap, aşakdaky sorag boýunça gürrüňdeş boluň.

• Ölen adamlar zyýan ýetirip bilýärmi?

Mukaddes Kitapdaky hakykaty bilsek, ölüler bilen bagly däp-dessurlary etmeris. Işaýa 8:19 we Ylham 4:11-nji aýatlary okap, aşakdaky sorag boýunça gürrüňdeş boluň.

• Ölülere sygynyp, kömek soraýan adamlara Ýehowa nähili garaýar?

5. Ölüm barada hakykat göwünlik berýär

Köpler adam ölensoň eden günäleri üçin dowzahda ýanýar diýip ynanýarlar. Ýöne hiç kim, hatda agyr günä eden adamlar hem ölensoň hiç ýerde gynalmaýar. Rimliler 6:7-ni okap, aşakdaky sorag boýunça gürrüňdeş boluň.

• Adam ölensoň eden günäleri üçin ejir çekýärmi?

Ýehowany has gowy tanasaň, onda ölen adamlara jeza bermeýändigine düşünersiň. 5 Musa 32:4 we 1 Ýahýa 4:8-nji aýatlary okap, aşakdaky soraglar boýunça gürrüňdeş boluň.

• Şeýle gowy häsiýetli Hudaý ölen adamlary gynarmy?

• Ölüm baradaky haýsy hakykat göwünlik berýär? Näme üçin?

 ESASY PIKIRLER

Adam ölensoň hiç ýerde ýaşamaýar, ejir çekmeýär, zyýan ýetirip bilmeýär.

Gaýtalamak

• Adam ölensoň näme bolýar?

• Ölüm barada hakykaty bilýän adam näme üçin gorkmaýar?

• Ölüm barada hakykat nädip göwünlik berýär?