Kumbi mwenga ndi mubali winu yo mwamuyanjanga ukongwa yo wakufwa? Pa nyengu yakuchitiska chitima yeniyo, panyaki mwajifumbanga kuti: ‘Ntchinthu wuli chichitika asani munthu wafwa? Kumbi tazakuŵawona so abali ŵidu ŵenaŵa?’ Mu sambiru ili kweniso mu Sambiru 30, tiwonengi vo Bayibolu limuka.

1. Ntchinthu wuli chichitika asani munthu wafwa?

Yesu wanguyeruzgiya nyifwa ndi tulu takufwa natu. Munthu yo wagona tulu takufwa natu waziŵa cha vo vichitika. Kumbi nyifwa yiyanana wuli ndi tulu? Munthu watuvwa urwirwi cha asani wafwa. Iyu wachita phukwa cha chinanga kuti waŵayanjanga ukongwa abali ŵaki ndipuso anyaki. Bayibolu likamba kuti: “Akufwa aziŵa chechosi cha.”—Ŵerengani Wakutawula 9:5.

2. Kumbi kuziŵa uneneska wakukwaskana ndi nyifwa kutitiwovya wuli?

Ŵanthu anandi atopa nyifwa kweniso ŵanthu wo akufwa! Kweni mungachiskika ukongwa asani mungavwa vo Bayibolu likamba vakukwaskana ndi nyifwa. Yesu wangukamba kuti: “Uneneska . . . ukufwatuweningi.” (Yohane 8:32) Matchalitchi nganandi ngakamba kuti munthu we ndi mzimu wo ulutirizga kuja ndi umoyu asani iyu wafwa. Kweni Bayibolu lisambiza venivi cha. Mwaviyo, tingakamba kuti palivi yo wasuzgika asani wafwa. Kweniso ŵanthu akufwa angatipweteka cha chifukwa yiwu aziŵa chechosi cha. Mwaviyo, tikhumbika cha kukondwesa akufwa pamwenga kuŵasopa ndipuso tikhumbika cha kuŵapemphere.

Ŵanthu anyaki akamba kuti akambiskana ndi ŵanthu wo akufwa. Kweni lenili ndi boza. Nge mo tawone, “akufwa aziŵa chechosi cha.” Ŵanthu wo aŵanaŵana kuti akambiskana ndi abali ŵawu wo akufwa, atuŵa kuti akambiskana ndi angelu aheni wo apusikiziya kuti mbanthu wo akufwa. Mwaviyo, kuziŵa uneneska wakukwaskana ndi nyifwa kutitivikiliya kwa angelu aheni ŵenaŵa. Yehova watitikaniza kukambiskana ndi ŵanthu wo akufwa chifukwa waziŵa kuti asani tingayamba kuchita vinthu ndi angelu aheni, yiwu angatipweteka.—Ŵerengani Dotoronome 18:10-12.

3. Ziŵani uneneska wakukwaskana ndi vo vichitika asani munthu wafwa

Pacharu chapasi, ŵanthu agomezga vinthu vakupambanapambana pa nkhani ya vo vichitika asani munthu wafwa. Kweni vinyaki vo yiwu agomezga vaboza.

• Kumbi ŵanthu anandi muchigaŵa chinu akamba kuti ntchinthu wuli chichitika asani munthu wafwa?

 4. Uneneska wakukwaskana ndi nyifwa utitifwatuwa

Kuziŵa uneneska wakukwaskana ndi nyifwa kutitifwatuwa kuti tileki kopa ŵanthu wo akufwa. Ŵerengani Wakutawula 9:10, pavuli paki kambiskanani fumbu ili:

• Kumbi akufwa angatipweteka?

Uneneska wa mu Bayibolu utitiwovya so kuti tileki kugomezga kuti tikhumbika kukondwesa ŵanthu wo akufwa pamwenga kuŵasopa. Ŵerengani Yesaya 8:19 ndipuso Chivumbuzi 4:11, pavuli paki kambiskanani fumbu ili:

• Kumbi muwona kuti Yehova watimuwona wuli munthu yo wasopa ŵanthu akufwa pamwenga watiŵapempha kuti amuwovyi?

5. Kuziŵa uneneska wakukwaskana ndi nyifwa kutitipembuzga

Ŵanthu anandi asambizika kuti asani ŵafwa, amutombozgeka chifukwa cha vinthu viheni vo achitanga. Kweni tipembuzgika kuziŵa kuti palivi munthu yo watombozgeka asani wafwa, chinanga wangaŵa munthu yo wachitanga vinthu viheni ukongwa. Ŵerengani Aroma 6:7, pavuli paki kambiskanani fumbu ili:

• Mu Bayibolu taŵerenga kuti asani munthu wafwa wafwatulika ku maubudi ngaki, sonu kumbi muwona kuti asani munthu wafwa watombozgeka chifukwa cha vinthu viheni vo wachitanga?

Asani tayamba kumuziŵa umampha Yehova, tiwona kuti iyu wangaŵatombozga cha ŵanthu akufwa. Ŵerengani Dotoronome 32:4 ndipuso 1 Yohane 4:8, pavuli paki kambiskanani mafumbu yanga:

• Kumbi Chiuta yo we ndi mijalidu yo taŵerenga pa mavesi yanga wangazomereza kuti ŵanthu akufwa atombozgekengi?

• Kumbi muwona kuti kuziŵa uneneska wakukwaskana ndi nyifwa nkhwakupembuzga? Ntchifukwa wuli muwona viyo?

 KUMBI MWASAMBIRANJI?

Asani munthu wafwa umoyu waki umaliya penipo. Ŵanthu wo akufwa asuzgika cha ndipuso angaŵapweteka cha ŵanthu amoyu.

Kuweriyamu

• Ntchinthu wuli chichitika asani munthu wafwa?

• Kumbi kuziŵa uneneska wakukwaskana ndi nyifwa kutitiwovya wuli?

• Kumbi kuziŵa uneneska wakukwaskana ndi nyifwa kutitipembuzga wuli?