Sena mwakafwidwa kale muyandwa wanu? Aciindi eeci cuusisya kapati, mulakonzya kulibuzya kuti: ‘Ncinzi cicitika ciindi notwafwa? Sena kuli notuyoobabona alimwi bayandwa besu?’ Muciiyo eeci alimwi acitobela, tuyoolanga-langa bwiinguzi bwamu Bbaibbele ibuumbulizya.

1. Ncinzi cicitika ciindi notwafwa?

Jesu wakakozyanisya lufwu kuŋonzi zinji kapati. Muntu woona takonzyi kuzyiba zicitika. Ino lufwu lukozyenye buti aŋonzi? Muntu wafwa tamvwi kucisa. Talendelelwi, nokuba kuti wakali kubayanda kapati banamukwasyi alimwi abalongwe. Bbaibbele lyaamba kuti “bafwide tabazyi cintu nociba comwe.”—Amubale Mukambausi 9:5.

2. Ino tugwasyigwa buti kuzyiba kasimpe kajatikizya lufwu?

Bantu banji balaluyoowa lufwu alimwi balabayoowa nobaba bantu bafwide! Pele mulakonzya kuumbulizyigwa kuzyiba ncolyaamba Bbaibbele kujatikizya lufwu. Jesu wakaamba kuti: “Kasimpe kayoomwangununa.” (Johane 8:32) Zikombelo zimwi ziyiisya kuti kuli cintu cimwi cizumanana kupona ciindi muntu afwa, pele oobo tabusyi mboliyiisya Bbaibbele. Icaamba kuti kunyina uupenga afwa. Aboobo mbwaanga bafwide kunyina cintu cili coonse ncobazyi, nkokuti tabakonzyi kutucisa. Aboobo tatweelede kubakomba naa kusola kubakkomanisya, alimwi tatweelede kubapailila.

Bantu bamwi baamba kuti balakonzya kwaambaula abantu bafwide. Pele eeco tacikonzyeki pe. Kweelana ambotwaiya, bafwide “tabazyi cintu nociba comwe.” Aabo ibayeeya kuti balabandika abantu bafwide, mubwini babandika aamadaimona alo aalicengeezya kuba bantu aabo ibakafwa. Aboobo kuzyiba kasimpe kujatikizya lufwu kulatukwabilila kumadaimona. Jehova ulatucenjezya kujatikizya kusola kubandika amadaimona nkaambo ulizyi kuti kucita boobo nkujatikizyigwa amadaimona, alo aakonzya kutucisa.—Amubale Deuteronomo 18:10-12.

3. Amwiiye kasimpe kujatikizya ciimo cabantu bafwide

Munyika yoonse kuli njiisyo ziindene-indene nzyobasyoma bantu kujatikizya cicitika ciindi notwafwa. Mubwini, takuli kuti njiisyo zyoonse eezyi nzyamasimpe.

• Ino ninjiisyo nzi zijatikizya ciimo cabantu bafwide izidumide kubusena nkomukkala?

 4. Kasimpe kujatikizya lufwu kalatugwasya

Kuzyiba kasimpe kujatikizya lufwu kutupa kutabayoowa bafwide. Amubale Mukambausi 9:10, akubandika mubuzyo ooyu:

• Sena bafwide balakonzya kutucisa?

Kuyungizya waawo, kasimpe kamu Bbaibbele kalatukwabilila kunjiisyo yakuti bafwide beelede kukkomanisyigwa alimwi akukombwa. Amubale Isaya 8:19 alimwi a Ciyubunuzyo 4:11, akubandika mubuzyo ooyu:

• Ino muyeeya kuti Jehova ulimvwa buti kujatikizya muntu uukomba naa kulomba lugwasyo kumuntu iwakafwa?

5. Kasimpe kujatikizya lufwu kalatuumbulizya

Bantu bayiisyigwa kuti baakufwa bayoopenzyegwa akaambo kazibi nzyobakacita kaindi. Pele cilaumbulizya kuzyiba kuti kunyina uupenga naafwa, nobaba baabo ibakali kucita zintu zibyaabi. Amubale Baroma 6:7, akubandika mubuzyo ooyu:

• Kweelana ambotubala mu Bbaibbele kuti muntu iwafwa ulaangununwa kucibi cakwe, sena muyeeya kuti inga wazumanana kupenga akaambo kazibi nzyaakacita kaindi?

Mbotuyaabumuzyiba Jehova, tulazyiba kuti takonzyi kusubula muntu uufwide. Amubale Deuteronomo 32:4 alimwi a 1 Johane 4:8, akubandika mibuzyo eeyi:

• Sena muyeeya kuti Leza uulaabube mbotwabala mutupango ootu ulakonzya kusubula baabo ibakafwa?

• Sena muyeeya kuti kuzyiba kasimpe kujatikizya lufwu kulaumbulizya? Nkaambo nzi?

 MUBUFWAAFWI

Ciindi muntu naafwa, buumi bwakwe bulamana. Bafwide tabapengi alimwi tabakonzyi kubacisa bapona.

Ncinzi Ncomwaiya?

• Ncinzi cicitika ciindi notwafwa?

• Ino kuzyiba kasimpe kujatikizya lufwu kutugwasya buti?

• Ino kuzyiba kasimpe kujatikizya lufwu kutuumbulizya buti?