Сезнең якын кешегезне югалтканыгыз бармы? Андый авыр вакытта сезнең мондый сораулар тугандыр: «Кеше үлгәч, аның белән нәрсә була? Без үлгән якыннарыбызны яңадан күрербезме?» Бу һәм киләсе дәрестә без Изге Язмалардан шушы сорауларга күңел юатырлык җаваплар карап чыгарбыз.

1. Кеше үлгәч, аның белән нәрсә була?

Гайсә үлемне тирән йокы белән чагыштырган. Ни өчен? Тирән йокыга талган кеше тирә-ягында нәрсә булганын белми. Шулай ук үлгән кеше дә бернәрсә белми. Ул авырту да сизми, газап та чикми. «Үлеләр бернәрсә дә белми»,— дип әйтелә Изге Язмаларда. (Вәгазьче 9:5 укы.)

2. Үлем турындагы хакыйкатьне белү безгә ничек ярдәм итә?

Күпләр үлемнән һәм хәтта үлгән кешеләрдән курка. Ләкин Изге Язмаларда үлем турында нәрсә әйтелгән икәне сезне юата ала. Гайсә әйткән: «Хакыйкать сезне ирекле итәр» (Яхъя 8:32). Кайбер диннәрдән аермалы буларак, Изге Язмалар кешенең үлемсез җаны бар дип һәм ул, кеше үлгәч, яшәвен дәвам итә дип өйрәтми. Шуңа күрә үлгәч, беркем дә газапланмый. Шулай ук үлгәннәр, бернәрсә дә белмәгәч, безгә зыян китерә алмый. Шунлыктан үлгәннәрне юмаларга я аларга табынырга кирәкми. Алар өчен дога кыласы да юк.

Кайберәүләр үлгәннәр белән аралаша алабыз дип әйтә. Әмма бу мөмкин түгел. Яңа гына белгәнебезчә, «үлеләр бернәрсә дә белми». Үлгән якыннары белән аралаша дип уйлаган кешеләр чынлыкта үзләрен шул үлгәннәр итеп күрсәткән җеннәр белән сөйләшә. Шуңа күрә үлем турындагы хакыйкатьне белү безне җеннәрдән яклый. Йәһвә җеннәрнең безгә зыян китерәчәген белә, шуңа күрә безгә үлгәннәр белән аралашмаска куша. (Канун 18:10—12 укы.)

3. Үлем турында хакыйкатьне белегез

Кеше үлгәч, аның белән нәрсә була? Төрле халыкларда төрле ышанулар бар. Әлбәттә, бу ышануларның барысы да дөрес була алмый.

• Ә сез яшәгән җирдә кешеләр нәрсәгә ышана?

 4. Үлем турындагы хакыйкать безгә файда китерә

Безгә үлеләрдән куркасы юк, чөнки үлем турындагы хакыйкать безне куркудан азат итә. Вәгазьче 9:10 ны укыгыз һәм җавап бирегез:

• Үлеләр безгә зыян китерә аламы?

Изге Язмалардагы хакыйкать шулай ук безне үлеләрне юмаларга я хәтта аларга табынырга кирәк дигән ышанудан яклый. Ишагыя 8:19 һәм Ачылыш 4:11 не укыгыз һәм җавап бирегез:

• Сезнеңчә, үлгән кешегә табынган я аңардан ярдәм эзләгән кешегә Йәһвә ничек карый?

5. Үлем турындагы хакыйкать безне юата

Күп кешеләрне алар үлгәч, гөнаһлары өчен газап чигәчәкләр дип өйрәткәннәр. Әмма үлгәч, беркемнең дә, хәтта бик начар эшләр кылган кешенең дә, газапланмаганын белү безне юата. Римлыларга 6:7 не укыгыз һәм җавап бирегез:

• Изге Язмаларда үлгән кеше гөнаһтан азат, ягъни аның гөнаһлары кичерелгән, дип әйтелә. Сезнеңчә, кеше үлгәч, гөнаһлары өчен газапланамы?

Йәһвә турында күбрәк белем алган саен, без аның үлгәннәрне газапламаганын ачыграк аңлыйбыз. Канун 32:4 һәм 1 Яхъя 4:8 не укыгыз һәм җавап бирегез:

• Бу шигырьләрдә искә алынган сыйфатларга ия Аллаһы үлгән кешеләрнең газаплануын хуплар идеме?

• Сез ничек уйлыйсыз, үлем турындагы хакыйкать юатамы? Ни өчен?

ЙОМГАКЛАУ

Кеше үлгәч, ул яшәүдән туктый. Үлеләр газапланмый, һәм тереләргә зыян китерә алмый.

Кабатлау

• Кеше үлгәч, аның белән нәрсә була?

• Үлем турындагы хакыйкать безгә ничек ярдәм итә?

• Үлем турындагы хакыйкать безне ничек юата?