NGUDO 29
Hu Itea Mini Musi Ri Tshi Lovha?
Naa no no vhuya na lovhelwa nga muthu ane na mu funa nga maanḓa? Nga tshenetsho tshifhinga tshi konḓaho, ni nga vha no ḓivhudzisa uri: ‘Hu itea mini musi ri tshi lovha? Naa ri ḓo dovha ra vhona mashaka ashu na khonani dzashu vho lovhaho?’ Ṱhogomelani phindulo dzi khuthadzaho dzi bvaho Bivhilini kha ino ngudo na i tevhelaho.
1. Hu itea mini musi ri tshi lovha?
Yesu o vhambedza lufu na khofhe khulu. Muthu o eḓelaho khofhe khulu ha ḓivhi zwine zwa khou itea hune a vha hone. Lufu lu fana hani na khofhe? Musi muthu o lovha, ha pfi vhuṱungu. Ha shengeli nga nḓila naho i ifhio. Bivhili i ri: “Vho faho a vha ḓivhi tshithu.”—Muhuweleli 9:5.
2. Ndi ngani zwi tshi ri thusa u ḓivha ngoho nga ha lufu?
Vhathu vhanzhi vha a ofha lufu na u ofha vhathu vho lovhaho! Fhedzi ni nga khuthadzwa nga zwine Bivhili ya zwi amba nga ha lufu. Yesu o ri: “Ngoho i ḓo ni vhofholola.” (Yohane 8:32) Dziṅwe kereke dzi funza uri hu na tshithu tshine tsha bvela phanḓa tshi tshi tshila musi muthu a tshi lovha, fhedzi Bivhili a i funzi zwenezwo. A hu na muthu ane a shengela musi o no lovha. Zwiṅwe hafhu, samusi vhathu vho lovhaho vha sa ḓivhi tshithu, vha nga si kone u ri huvhadza. Ngauralo, a zwi ṱoḓei uri ri gwadamele vhathu vho lovhaho kana u vha itela zwithu uri vha si ri sinyutshele, a zwi ṱoḓei na uri ri vha rabelise.
Vhaṅwe vhathu vha amba uri vha a kona u amba na vhathu vho lovhaho. Fhedzi zwenezwo a zwi konadzei. Samusi ri tshi kha ḓi tou bva u zwi guda, vhathu vho lovhaho “a vha ḓivhi tshithu.” Vhane vha humbula u nga vha khou amba na vhathu vho lovhaho, vha nga vha vha tshi khou amba na madimoni ane a ḓiita u nga ndi vhenevho vhathu vho lovhaho. U ḓivha ngoho nga ha lufu zwi ri tsireledza kha madimoni. Yehova u ri tsivhudza uri ri songo lingedza u amba na vhathu vho lovhaho ngauri u a zwi ḓivha uri u amba na madimoni zwi ḓo ri huvhadza.—Vhalani Dotoronomio 18:10-12.
GUDANI ZWO ENGEDZEAHO
Gudani zwo engedzeaho nga ha zwine Bivhili ya zwi funza nga ha lufu, ni khwaṱhise lutendo lwaṋu kha Mudzimu, a sa shengedziho vhathu vho lovhaho.
3. Gudani ngoho nga ha vhuimo ha vhafu
U mona na shango ḽoṱhe, vhathu vha tenda zwithu zwi sa fani nga ha zwine zwa itea musi ri tshi lovha. Zwi tou pfala uri zwiṅwe zwa zwenezwi zwithu zwine vhathu vha zwi tenda a si ngoho.
-
Ndi zwifhio zwithu zwo ḓoweleaho zwine vhathu vha zwi tenda nga ha vhafu hune na dzula hone?
U itela u vhona zwine Bivhili ya zwi funza, ṱalelani VIDIO.
Vhalani Muhuweleli 3:20, ni kone u fhindula mbudziso dzi tevhelaho:
-
U ya nga iyi vese, hu itea mini musi muthu a tshi lovha?
-
Naa hu na tshithu tshine tsha bvela phanḓa tshi tshi tshila musi muthu o lovha?
Bivhili i ri vhudza nga ha u lovha ha Lazaro we a vha e khonani ya Yesu ya tsini. Ṱhogomelani zwe Yesu a zwi amba nga ha vhuimo ha Lazaro. Vhalani Yohane 11:11-14, ni kone u fhindula mbudziso dzi tevhelaho:
-
Yesu o vhambedza lufu na mini?
-
Zwenezwo zwi ri vhudza mini ha vhuimo ha vhafu?
-
Ni ḓipfa hani nga zwine Bivhili ya zwi amba nga ha lufu?
4. U ḓivha ngoho nga ha lufu zwi a ri vhuyedza
U ḓivha ngoho nga ha lufu zwi a ri tsireledza, zwi ita uri ri sa ofhe vhathu vho lovhaho. Vhalani Muhuweleli 9:10, ni kone u fhindula mbudziso i tevhelaho:
-
Naa vhafu vha nga ri huvhadza?
Musi ri tshi tenda zwine Bivhili ya zwi funza, a ri nga tendi mazwifhi ane a ambiwa a uri ri tea u gwadamela vhathu vho lovhaho kana u ita zwiṅwe zwithu u itela u vha takadza. Vhalani Yesaya 8:19 na Nzumbululo 4:11, ni kone u fhindula mbudziso i tevhelaho:
-
Ni vhona u nga Yehova u ḓipfa hani nga ha muthu ane a gwadamela muthu o lovhaho kana ane a ṱoḓa thuso kha muthu o lovhaho?
U ḓivha ngoho nga ha lufu zwi ri vhofholola kha mikhuvha ine ya sinyusa Yehova
5. U ḓivha ngoho nga ha lufu zwi a ri khuthadza
Vhathu vhanzhi vho funzwa uri musi vha tshi lovha, vha ḓo ṱarafiwa nga nṱhani ha zwithu zwivhi zwe vha zwi ita. Fhedzi zwi a ri khuthadza u ḓivha uri a hu na muthu ane a shengedzwa musi o no lovha, naho hu muthu o itaho zwivhi zwihulwane. Vhalani Vharoma 6:7, ni kone u fhindula mbudziso i tevhelaho:
-
Bivhili i amba uri musi muthu a tshi lovha, u vha o vhofholwa kha zwivhi zwawe. Zwino naa ni vhona u nga vhathu vho lovhaho vha khou ṱarafiwa nga nṱhani ha zwivhi zwe vha zwi ita?
Musi ri tshi ḓivha Yehova khwine, ri ḓo zwi ṱhogomela uri a nga si vhuye a ṱarafa vhathu vho lovhaho. Vhalani Dotoronomio 32:4 na 1 Yohane 4:8, ni kone u fhindula mbudziso dzi tevhelaho:
-
U ya nga zwe zwa ambiwa nga ha Mudzimu kha hedzi vese, naa ni vhona u nga a nga ṱarafa vhathu vho lovhaho?
-
Naa zwi a ni khuthadza u ḓivha ngoho nga ha lufu? Ndi ngani ni tshi ralo?
VHAṄWE VHATHU VHA AMBA URI: “Ndi a ofha zwine zwa ḓo itea kha nṋe musi ndi tshi lovha.”
-
Ni nga vha khuthadza nga vese dzifhio?
NO GUDA MINI?
Muthu ha bveli phanḓa a tshi tshila musi o lovha. Vhathu vho lovhaho a vha khou shengela nahone vha nga si huvhadze vhathu vha tshilaho.
Ni Kha Ḓi Zwi Humbula?
-
Hu itea mini musi ri tshi lovha?
-
U ḓivha ngoho ha nga lufu zwi ri vhuyedza hani?
-
U ḓivha ngoho ha nga lufu zwi ri khuthadza hani?
WANANI ZWO ENGEDZEAHO
Naa Bivhili i amba uri hu na tshithu tshine tsha bvela phanḓa tshi tshi tshila musi muthu a tshi lovha?
Vhonani arali Mudzimu a tshi ṱarafa vhathu vhavhi heleni.
Naa Hele Ndi Fhethu Hune Vhathu Vha Pfiselwa Hone Vhuṱungu? (3:07)
Naa ri tea u ofha vhathu vho lovhaho?
Mimuya ya Vhafu—Naa I Nga Ni Thusa kana Ya Ni Huvhadza? Naa I A Tshila Zwa Vhukuma? (bugwana)
Vhonani uri muṅwe munna o khuthadzwa hani musi a tshi guda ngoho nga ha zwine zwa itea musi ri tshi lovha.
“Ndo Takadzwa Nga Phindulo Dzi Pfalaho Dzi Bvaho Bivhilini” (Tshiingamo, 1 March 2015)
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
