Se qualchedun che te ami l’è morto, fursi te te domandi: ‘Cossa che ga sucedesto con lu? Sarà che vao vederlo ancora?’. In questa lession e nela pròssima, ndaremo imparar quel la Bìblia la dise. Questo ne darà tanto consolo!

1. Cossa che sucede dopo dela morte?

Gesù el ga dito che la morte la ze come indormensarse. Quando una persona la ze pròpio drio dormir, no la sa quel che l’è drio suceder intorno. Alora, se la morte la ze come dormir, la persona che la ze morta no la sente pi gnente. Ela no la ze drio sofrir parché la Bìblia la dise che i morti no i sa pi gnente. — Ledi Eclesiasti 9:5.

2. Parché che ne giuta saver cossa che sucede dopo dela morte?

Tante persone le ga paura de morir e de quei che i ze morti. Ma Gesù el ga dito che, quando imparemo la verità, restemo lìberi. (Gioani 8:32) Alora, quel che la Bìblia la dise sora la morte ne assa pi tranquili. Par esémpio, arquante religion le insegna che ghemo una ànima che la seita viva dopo dela morte. Ma la Bìblia la mostra che questo no l’è mia vera, parché la dise che i morti no i sa pi gnente. Alora, i morti no i sofre e no i fà i altri sofrir. Questo anca ne giuta a capir che no ne ocore adorar quei che i ze morti, far qualcossa par contentarli o pregar par lori.

Arquanti i dise che i pol parlar coi morti. Ma questa la ze una busia! Ghemo pena imparà che i morti no i sa gnente. Alora, con chi che questa persona la ga parlà? Fursi l’è stà coi demoni. I demoni i fà finta esser la persona morta. Alora, quando capimo quel che sucede dopo dela morte, restaremo distante dei demoni. Geovà el dise che no ghemo de proar parlar coi morti parché el sa che i demoni i pol doperar questo par farne mal. — Ledi Deuteronómio 18:10-12.

3. Impara de pi sora quel che sucede dopo dela morte

Persone de tuto el mondo le insegna robe difarente sora i morti. Ma sicuro che no le ze tute giuste.

• Ndove te sì de star, cossa le persone le parla sora quel che sucede dopo dela morte?

 4. Saver quel che sucede dopo dela morte ne giuta tanto

Quando imparemo cossa la Bìblia la dise sora i morti, no ghemo pi paura de lori. Ledé Eclesiasti 9:10, e dopo, parlé sora questo:

• Sarà che i morti i pol far qualcossa contra noantri?

Quando studiemo la Bìblia, capimo che no ne ocore far robe par i morti e gnanca adorarli. Ledé Isaia 8:19 e Apocalisse 4:11, e dopo, parlé sora questo:

• Come sarà che Geovà el se sente quando una persona la adora i morti o la domanda qualcossa a lori?

5. Restemo pi tranquili de saver quel che sucede dopo dela morte

Tante persone le ga imparà che dopo che le more, le gavarà de pagar par le robe sbaliade che le ga fato. Ma l’è tanto bon saver che, anca se ghemo fato robe sbaliade, no ndaremo mia sofrir dopo morti. Ledé Romani 6:7, e dopo, parlé sora questo:

• La Bìblia la dise che, quando una persona la more, Dio el perdona i so pecati. Alora, sarà che una persona la gavaria de pagar par i so pecati dopo che la more?

Quando cognossemo a Geovà, restemo cada volta pi sicuri che lu no’l fà i morti sofrir. Ledé Deuteronómio 32:4 e 1 Gioani 4:8, e dopo, parlé sora questo:

• Sarà che un Dio con queste bele qualità el ndaria castigar le persone che le more?

• Come te te senti de saver cossa che sucede dopo dela morte? Parché?

 COSSA CHE TE GHÈ IMPARÀ?

Quando una persona la more, no la sa pi gnente, no la ze drio sofrir e no la pol far gnente de mal a quei che i ze vivi.

Sito bon de ricordarte?

• Cossa che sucede con una persona che la more?

• Come che ne giuta saver cossa che sucede dopo dela morte?

• Parché restemo pi tranquili de saver cossa che sucede dopo dela morte?