Neereke ootoko okhwa ole mummusivelaanyu? Mene ehuhu eyo yooxupa, nyuwo pooti wiikoha: Eheeni eneereya ni mutthu akhwa vale? Neereke atthu yaale akhwiiye nnaasivelaahu anootthikela-tho okhala akumi? Mwa yoosomeene yeela ni yoosoma enttharelana, ninkela woona waakhula wa Biblya moota oraaya woomaaliha.

1. Ninkela woowiini nakhwa vale?

Yesu aalikanxera okhwa ni ikhove sooneelela. Mutthu onneelela ikhove aakonaka, khansuwela etthu eneereya vakhiviru vawe. Moota heeni, okhwa onlikanaaya ni ikhove? Vaavo mutthu onkhwaawe, khanoona etthu, owo khanoona ovoreya, naari khaniisoona okhala meekhaawe, khanwuupuwela asinthamwene awe oonasivelaawe naari amusi awe. Biblya oneera: “Nto anamakhwa khanasuwela etthu.”—Mmusome Koheleti 9:5.

2. Moota heeni oxuttera ekhaikhai voohima sa alipa ookhwa onnikhaviheraaya?

Atthu antxipale onnawoopiha okhwa, nave annawoova atthu ookhwa. Mene ele Biblya onxuttihaawe voohima sa alipa ookhwa onoonimaaliha. Yesu enre: “Ekhaikhai enókhaliheni anethi.” (Yohani 8:32) Ittiini ikina sinhima weera, atthu ootheene aakhalano munepa ohinkhwa. Mene Biblya khanxuttiha etthu eyo. Owo onhima weera khaavo onhaawa akhwa vale. Opwaha mwa yeeyo, atthu ookhwa khanwera onihasula. Mwaha wa yeeyo, hiyo khanintthuneya waavekelela, wapakela isataka naari waapattihera iveela.

Atthu akina anhima weera, nyuwo pooti wuuluma ni atthu akhwiiye. Mene eyo khenwereya, khaiyono ekhaikhai. Ntoko nonnaahu, “Atthu òkhwa khansuwela etthu”. Mene nto wakhala weera mutthu ohooleelani weera ohuuluma ni nthamwene awe okhwiiye, mweekhaikhai mutthu owo uuluma ni mademooniyu. Yaawo yaipakiha okhala mutthu ole okhwiiye. Mwa yeeyo, osuwela ekhaikhai voohima sa nookhwa, onnanikosoopa mwa mademooniyu. Yehova onnanleela weera nihuulumeke ni atthu ookhwa. Mwaha wooweera, Yehova oosuwela weera nnuuluma ni mademooniyu. Nto eyo, tiyoowoopiha.—Mmusome Olaleya 18:10-12.

3. Muxuttere ikhaikhai sa alipa ookhwa

Atthu a elapo yootheene ahisuwenle ekhaikhai, aakhalano nyuupuwelo soovirikana voohima sa ele eneereya ni mutthu akhwa vale. Mene vanooneya weera, nyuupuwelo sootheene iyo, khaiyono ti seekhaikhai.

• Mapuro munkhalaanyu, atthu anuupuwela heeni voohima sa alipa ookhwa?

 4. Osuwela ekhaikhai voohima sa alipa ookhwa onnanikhavihera vantxipale

Oxutteera ekhaikhai voohima sa alipa ookhwa, onoonikhavihera ohiwoova alipa ookhwa. Mmusome Koheleti 9:10. Avinyaka mutthekule ni epontu enttharelana:

• Neereke alipa ookhwa anoowera onipakela etthu yoonanara?

Atthu akina anuupuwela weera onnatthuneya waapakela isataka ni waattittimiha alipa ookhwa. Yaapakelaka mavekelo ni waapattihera iveela. Oxuttera ikhaikhai sa mBiblyani onoonikhavihera ohipaka itthu iyo. Mmusome Yesaya 8:19 ni Apokalise 4:11. Avinyaka mutthekule ni epontu enttharelana:

• Neereke nyuwo munnawera wuupuwela moota Yehova onoonelaawe vaavo mutthu onaavekelelaawe atthu ookhwa, naari oninvekelaawe nikhavihero mutthu okhwiiye?

5. Tivoomaaliha osuwelela ekhaikhai voohima sa alipa ookhwa

Atthu aanxuttihiwa weera yakhwa vale ankela ohasuliwaka mwaha wa itthu soonanara apankaaya. Mene tivoomaaliha osuwela weera khaavo onkela ohasuliwa akhwa vale. Mpaka atthu yaale apanke itthu sintxipale soonanara. Mmusome Aroma 6:7. Avinyaka mutthekule ni epontu enttharelana:

• Biblya onthaliha weera mutthu akhwa vale oovuluxiwa mwa soottheka. Naari neere ha: Vamaithoni va Muluku soottheka sawe sootxipihiwa. Ntoko mwiiwalaanyu, nyuwo munoona weera mutthu akhwa vale onoohasuliwa mwaha wa soottheka opankaawe?

Vaavo ninvirelelaahu oxuttera voohima sa Yehova ninnoonelela weera Yehova khanaahasula atthu ookhwa. Mmusome Olaleya 32:4 ni Yohani 4:8. Avinyaka mutthekule ni ipontu sinttharelana:

• Neereke Muluku orinono mikhalelo nonnaahu va iversu sene seiya aamukela waahasula atthu ankhwa?

• Nyuwo munnoona okhala woomaaliha, mwaha woosuwela ikhakhai voohima sa atthu akhwiiye? Mwaha wa heeni?

 NYAHA SOOTTHUNEYA

Vaavo mutthu onkhwaawe, owo ekumi awe ennammalela, atthu ookhwa khanhaawa ni khanwera waahasula atthu akumi.

Wuuluula

• Ti heeni eneereya vaavo mutthu onkhwaawe?

• Moota heeni osuwela ikhaikhai voohima sa alipa ookhwa sinnikhaviheraaya?

• Heeni osuwela ikhaikhai voohima sa alipa ookhwa oraaya woomaaliha?