Namatayan ka na ba hin hinigugma? Ha sugad nga makasurubo nga kahimtang, bangin magpakiana ka: ‘Ano an mahitatabo ha aton kon mamatay kita? May-ada pa ba paglaom nga makita naton utro an aton hinigugma?’ Hini nga leksyon ngan ha masunod, usisaha an nakakaliaw nga mga baton han Biblia.

1. Ano an mahitatabo ha aton kon mamatay kita?

Iginpariho ni Jesus an kamatayon ha hilarom nga pagkaturog. An usa nga tawo nga maopay an katurog diri maaram kon ano an nahitatabo ha iya palibot. Kay ano nga an kamatayon puropariho ha pagkaturog? Kon an tawo namamatay, diri na hiya naabat hin kasakit. Diri hiya naabat hin kamingaw, bisan kon hinigugma gud niya an iya kasangkayan ngan kapamilya. “An mga patay diri maaram han bisan ano,” siring han Biblia.—Basaha an Eclesiastes 9:5.

2. Paonan-o nakakabulig ha aton an paghibaro han kamatuoran mahitungod han kamatayon?

Damu nga tawo an nahahadlok ha kamatayon—ngan bisan ha mga patay! Pero maliliaw ka han ginsisiring han Biblia mahitungod ha kamatayon. Hi Jesus nagsiring: “An kamatuoran maghahatag ha iyo hin kagawasan.” (Juan 8:32) An iba nga relihiyon nagtututdo nga an tawo may-ada diri namamatay nga kalag nga nagpapadayon nga buhi kamatay niya. Pero diri ini an gintututdo han Biblia. Salit waray tawo nga nag-aantos kamatay niya. Dugang pa, tungod kay an mga patay diri maaram han bisan ano, diri hira makakabuhat hin maraot ha aton. Salit diri kinahanglan nga halaran o singbahon an mga patay, ngan diri kinahanglan nga pangadian hira.

An iba nga mga tawo nasiring nga nakakaistorya nira an mga patay. Pero imposible ito. Sugad han aton nahibaroan na, an mga patay “diri maaram han bisan ano.” An mga naghuhunahuna nga nakakaistorya nira an ira namatay na nga mga hinigugma, ha tinuod la nakikiistorya ha mga demonyo nga nagpapakunokuno nga mga tawo nga namatay. Salit an paghibaro han kamatuoran mahitungod ha kamatayon nagpapanalipod ha aton tikang ha mga demonyo. Hi Jehova nagpahamangno ha aton mahitungod ha pakiistorya ha mga patay tungod kay maaram hiya nga an pakigkomunikar ha mga demonyo makakadaot ha aton.—Basaha an Deuteronomio 18:10-12.

3. Hibaroi an tinuod nga kahimtang han mga patay

Ha bug-os nga kalibotan, iba-iba an gintotoohan han mga tawo mahitungod ha mahitatabo ha aton kon mamatay kita. Syempre, diri ngatanan hito tinuod.

• Ano an komon nga gintotoohan ha iyo lugar mahitungod ha kahimtang han mga patay?

 4. Makakabulig ha aton an kamatuoran mahitungod ha kamatayon

An paghibaro han kamatuoran mahitungod ha kamatayon nagtatalwas ha aton tikang ha kahadlok ha mga patay. Basaha an Eclesiastes 9:10, katapos, hisguti niyo ini nga pakiana:

• An mga patay ba makakabuhat hin maraot ha aton?

An kamatuoran ha Biblia nagpapanalipod liwat ha aton tikang ha buwa nga katutdoan nga an mga patay kinahanglan halaran o singbahon pa ngani. Basaha an Isaias 8:19 ngan Pahayag 4:11, katapos, hisguti niyo ini nga pakiana:

• Ha imo hunahuna, ano daw la an inaabat ni Jehova kon an usa nga tawo nagsisingba o napabulig ha patay?

5. Makakaliaw ha aton an kamatuoran mahitungod ha kamatayon

Damu nga tawo an natutdoan nga kon mamatay hira, mag-aantos hira tungod han ira nabuhat nga maraot ha naglabay. Pero nakakaliaw ha aton an paghibaro nga waray tawo nga mag-aantos kamatay niya—bisan pa ngani an nagbuhat hin maraot gud nga mga butang. Basaha an Roma 6:7, katapos, hisguti niyo ini nga pakiana:

• Sugad han aton nabasa ha Biblia, kon an namatay nga tawo gin-abswelto na ha iya sala, ha imo hunahuna an patay ba nag-aantos pa tungod han iya sayop nga nabuhat ha naglabay?

Samtang mas nakikilala naton hi Jehova, mas nasasabtan naton nga diri gud niya tutugotan nga mag-antos an mga patay. Basaha an Deuteronomio 32:4 ngan 1 Juan 4:8, katapos, hisguti niyo ini nga mga pakiana:

• An Dios ba nga may mga kalidad nga sugad han ginsisiring hini nga mga teksto matugot nga pasakitan an mga patay?

• Nakakaliaw ba ha imo an paghibaro han kamatuoran mahitungod ha kamatayon? Kay ano?

 SUMARYO

Kon an usa nga tawo mamatay, natatapos na an iya kinabuhi. An mga patay diri nag-aantos, ngan diri liwat hira makakabuhat hin maraot ha mga buhi.

Repaso

• Ano an mahitatabo ha aton kon mamatay kita?

• Paonan-o makakabulig ha aton an kamatuoran mahitungod ha kamatayon?

• Paonan-o makakaliaw ha aton an kamatuoran mahitungod ha kamatayon?