Gbenɔ haa nɛ wa yeɔ aywilɛho, nɛ e haa nɛ wa haoɔ. Enɛ ɔ he je nɛ Baiblo ɔ tsɛɛ gbenɔ ke wa he nyɛlɔ ɔ nɛ. (1 Korinto Bi 15:26) Wa kase ngɛ Ní Kasemi 27 ɔ mi kaa Yehowa maa ye he nyɛlɔ nɛ ɔ nɔ kunimi. Se wa suɔli nɛ a gbo momo ɔ hu nɛɛ, mɛni maa ba a nɔ? Ngɛ ní kasemi nɛ ɔ mi ɔ, wa maa na si kpa ko nɛ se be nɛ Yehowa wo. Lɔ ɔ ji kaa e ma ha nɛ nimli ayɔhi abɔ nɛ a gbo ɔ maa ba wami mi ekohu. E ma tle mɛ si, nɛ a maa hi si kɛ ya neneene! Anɛ si womi nɛ ɔ maa ba mi niinɛ lo? Anɛ a ma tle gbogboe ɔmɛ si kɛ ba hi zugba a nɔ, aloo a ma tle mɛ si kɛ ya hiɔwe?

1. Mɛni nɛ Yehowa suɔ kaa e maa pee kɛ ha wa suɔli nɛ a gbo ɔ?

Yehowa suɔ kaa e ma tle nihi nɛ a gbo ɔ si kɛ ba wami mi ekohu. Nyumu ko nɛ a tsɛɛ lɛ ke Hiob nɛ e ngɛ hemi kɛ yemi ɔ ngɛ nɔ mi mami kaa ke e gbo ɔ, Mawu hɛ be e nɔ jee. E de Mawu ke: “O ma tsɛ mi, nɛ ma he nɔ [ngɛ yɔkɔ ɔ mi].”​—Kane Hiob 14:13-15.

2. Kɛ wa plɛ kɛ le kaa a ma nyɛ ma tle gbogboe ɔmɛ si kɛɛ?

Benɛ Yesu ngɛ zugba a nɔ ɔ, Mawu ha lɛ he wami nɛ e kɛ tle nihi nɛ a gbo ɔ si. Yesu tle jokuɛ yoyo ko nɛ e ye jeha 12, kɛ yalɔyo ko bi nyumu si kɛ ba wami mi. (Maako 5:41, 42; Luka 7:12-15) Pee se ɔ, Yesu huɛ nɛ a tsɛɛ lɛ ke Lazaro ɔ ba gbo. E ngɛ mi kaa benɛ Lazaro gbo nɛ́ a pu lɛ ɔ ligbi eywiɛ be mohu lɛɛ, se Yesu tle lɛ si kɛ ba wami mi ekohu. Benɛ Yesu ma tle lɛ si ɔ, e sɔle kɛ ha Mawu, lɔ ɔ se ɔ, e de ke: “Lazaro, jee kpo!” Kɛkɛ nɛ “nyumu ɔ nɛ e gbo ɔ je kpo kɛ ba.” Lazaro ba wami mi! (Yohane 11:43, 44) Moo hyɛ bɔ nɛ Lazaro weku li kɛ e huɛmɛ a bua maa jɔ ha!

3. Mɛni hɛ nɔ kami lɛ ngɛ kɛ ha o suɔli nɛ a gbo ɔ?

Baiblo ɔ wo si kaa, ‘A ma tle nihi si kɛ je gbeje.’ (Ní Tsumi 24:15) Nihi nɛ Yesu tle mɛ si benɛ e ngɛ zugba a nɔ ɔ a ti nɔ ko nɔ ko yɛ hiɔwe benɛ a gbo ɔ. (Yohane 3:13) A bua jɔ kaa a tle mɛ si kɛ ba wami mi ekohu ngɛ zugba a nɔ. Jã kɛ̃ nɛ e be kɛe nɛ Yesu ma tle nimli ayɔ akpehi abɔ nɛ a gbo ɔ si kɛ ba wami mi ekohu, nɛ a maa hi paradeiso ɔ mi ngɛ zugba a nɔ kɛ ya neneene. Yesu de ke a ma tle “nihi tsuo nɛ a ngɛ kaimi yɔkɔ ɔmɛ a mi” ɔ si. A ma tle ni nɛmɛ nɛ eko ɔ wa hɛ je a nɔ, se a ngɛ Mawu kaimi mi ɔ tsuo si kɛ ba wami mi.​—Yohane 5:28, 29.

 MOO KASE BABAUU

4. Yesu ha nɛ wa na kaa e ma nyɛ ma tle nihi nɛ a gbo ɔ si

Moo kase nɔ́ nɛ Yesu pee kɛ ha e huɛ Lazaro ɔ he ní fuu. Nyɛɛ kane Yohane 11:14, 38-44 ɔ, nɛ nyɛ susu sane bimihi nɛ nyɛɛ se nɛ ɔmɛ a he:

• Kɛ wa plɛ kɛ le kaa Lazaro gbo niinɛ kɛɛ?​—Hyɛ kuku 39.

• Kaa Lazaro ho hiɔwe ya a, anɛ o susu kaa Yesu ma ha nɛ e kpale ba hi si ngɛ zugba a nɔ ekohu lo?

Mo je VIDEO ɔ.

5. A ma tle nihi babauu si!

Nyɛɛ kane La 37:29 ɔ, nɛ nyɛ susu sane bimi nɛ ɔ he:

• Jije nimli ayɔ akpehi abɔ nɛ a ma tle mɛ si ɔ maa hi?

Pi nihi nɛ a sɔmɔ Yehowa a pɛ nɛ Yesu ma tle mɛ si, e ma tle nihi babauu si. Nyɛɛ kane Ní Tsumi 24:15 ɔ, nɛ nyɛ susu sane bimi nɛ ɔ he:

• Mɛnɔ aloo mɛnɔmɛ nɛ o ngɛ blɔ hyɛe kaa o maa na nɛ́ a tle mɛ si kɛ ba wami mi?

• Kɛ gbogboehi a si tlemi he hɛ nɔ kami ɔ wo Phelicity fɔli ɔmɛ a bua, nɛ e wo mɛ he wami ha kɛɛ?

 NYA MWƆMI

Baiblo ɔ wo si kaa a ma tle nimli ayɔ akpehi abɔ nɛ a gbo ɔ si kɛ ba wami mi. Yehowa suɔ kaa a ba wami mi ekohu, nɛ e ha Yesu he wami nɛ́ e kɛ tle mɛ si.

Mi Nylɔmi

• Kɛ wa plɛ kɛ le kaa Yehowa kɛ Yesu suɔ kaa a ma tle nihi nɛ a gbo ɔ si ha kɛɛ?

• Jije nɛ nimli ayɔ akpehi abɔ nɛ́ a ma tle mɛ si ɔ maa hi​—hiɔwe aloo zugba a nɔ? Mɛni he je nɛ o de jã?

• Mɛni haa nɛ o náa nɔ mi mami kaa o suɔli nɛ a gbo ɔ maa ba wami mi ekohu ɔ?