Owulo ɩfa ɛyɛkɛ nɩɩ aɣɛlɛbɔlilɛ sʋ̃maa ɩba. Meti mɔɔ Bayɩbʋlʋ yɩ ɩfʋlɔ owulo kɛɛ ɩdɩ yɛ tamvʋlɔ yɩ a. (1 Kɔlɛntɩmaa 15:26) Wɔ ozumalɛdɩyɛ 27 yi nu nɩ, ozumanlɩ kɛɛ Gyehova ikeli tamvʋlɔ eyi zʋ nkunimi. Na mmenii mɔɔ bowu daada nɩ sʋ̃ ɛ, mɩnla yɛ ɩkɔdʋ bɛ a? Wɔ ozumalɛdɩyɛ eyi nu nɩ, okozuma sʋ̃maa ɛkɛvalɩ anʋhʋba fʋlɔ mɔɔ ɩyɛ anyɩnlɩlelɛ mɔɔ Gyehova ɩwɔ nɩ nwʋ, mɔɔ mɛyɩ yɛ lɛ kɛɛ ikezia ɩkɛva mmenii abʋmɩ abʋmɩ ɩkɛɣa nnwʋanlɩ nu dɔkʋ̃. Ikodunwo bɛ! Ekila a, eyi ɩkɛyɛ bʋwɔ a? Asʋ̃ bokodunwo bɛ ma bɔkɔhɔ sʋlɔ anzɛnyɩɩ bɔkɔwʋwa azɩlɛ yɩ zʋ?

1. Mɩnla yɛ Gyehova ɩpɛ kɛɛ ɩyɛ ɩma yɛ alɔvʋlɔ mɔɔ bowuwu nɩ a?

Gyehova ɩpɛ paa kɛɛ itunwo mmenii mɔɔ bowuwu nɩ ma bɛba nnwʋanlɩ nu dɔkʋ̃. Nɩ benyia nɔhʋanlɛvʋlɔ be mɔɔ bɔfʋlɔ yɩ Dwoobu ɩwɔ anwʋlazʋ kɛɛ sɛ iwu a, Nyamɩnlɩ yɩ ɛɣɛɛlɛ iléfi yi. Ɩhanlɩ ihileli Nyamɩnlɩ kɛɛ: “Ɔkɔvʋlɛ, na mikele ɔzʋlɔ [wɔ mi Siye yi nu].”—Kɩnga Dwoobu 14:13-15.

2. Kɛ ɩyɛ mɔɔ yɛnwʋ kɛɛ bekezia bokodunwo awuvʋlɔ a?

Mmɩlɩ mɔ Gyisɛsɩ ɩwɔ azɩlɛ yɩ zʋ nɩ, Nyamɩnlɩ ɩmanlɩ tumi yɩ ma ɩva idunwonli mmenii mɔɔ bowu. Gyisɛsɩ idunwonli kuakula baalɛ mɔɔ ili alʋbɔ 12 nɩɩ kunavʋlɔ be yɩ ɣa benyia ma bɛɣalɩ nnwʋanlɩ nu. (Maakɩ 5:41, 42; Luuku 7:12-15) Aɣinzi yi, Gyisɛsɩ yɩ ɔhɔnwʋ Lazʋlɔsʋ iwuli. Ɩávalɩ nwʋmɔ kɛɛ nɩ Lazʋlɔsʋ iwu ma beziye yɩ ma ili aɣile anla nɩ, Gyisɛsɩ ɩmanlɩ izialɩ ɩɣalɩ nnwʋanlɩ nu. Gyisɛsɩ ɩwɔlɩ Nyamɩnlɩ mpayɩ iwieli nɩ, ɩdɩnyɩanlɩ nu wɔ siye yɩ zʋ ɩhanlɩ kɛɛ: “Lazʋlɔsʋ, ɔzʋ̃ ɛkɛnɩ finde!” Na “ɛkɛnɩ la Lazʋlɔsʋ ivindenli”—ɩɣalɩ nnwʋanlɩ nu! (Dwɔɔnʋ 11:43, 44) Wʋzawʋ kila kezimɔ Lazʋlɔsʋ yɩ mmusunwamaa nɩɩ yɩ ɔhɔnwʋmmɔ bɛ anyɩ ikele!

3. Mɩnla anyɩnlɩlazʋ yɛ ɩwɔ ɛkɛnɩ ɩma wʋ alɔvʋlɔ mɔɔ bowuwu nɩ a?

Bayɩbʋlʋ yɩ ɩbɔ anʋhʋba kɛɛ: ‘Bɛbadunwo mmenii wɔ owulo nu bɛkɛɣa nnwʋanlɩ nu.’ (Egyima 24:15) Bɛzabɛ mɔɔ Gyisɛsɩ idunwonli bɛ mmɩlɩ mɔ ɩwɔ azɩlɛ yɩ zʋ nɩ, nɩ béni sʋlɔ. (Dwɔɔnʋ 3:13) Bɛ anyɩ ileli kɛɛ bodunwonli bɛ ma bɛɣalɩ nnwʋanlɩ nu wɔ azɩlɛ yɩ zʋ dɔkʋ̃. Ɔzɔ sʋ̃ la yɛ ɩlɛ́kyɛ, Gyisɛsɩ ibadunwo mmenii abʋmɩ abʋmɩ sʋ̃maa ma bɛkɛɣa bɔkɔwʋwa azɩ daabaa wɔ paladayɩsɩ azɩlɛ yɩ zʋ a. Ɩhanlɩ kɛɛ bɛzabɛ mɔɔ bɔwɔ “bɛ siye nɩ nu” mɔɔ Nyamɩnlɩ ɩkakɛ bɛ nɩ munwatĩĩ ikodunwo bɛ. Mmenii mɔɔ yɛáhakɛ po kɛɛ bɔwʋwa azɩ kyɩ̃ nɩ kɩnla nwʋ.—Dwɔɔnʋ 5:28, 29.

 SUMÁ SƲ̃MAA

4. Gyisɛsɩ ɩlalɩ yɩ ali kɛɛ ɩkɔhʋla ikodunwo awuvʋlɔ

Sumá sʋ̃maa falɩ mɔɔ Gyisɛsɩ ɩyɛlɩ ɩmanlɩ yɩ ɔhɔnwʋ Lazʋlɔsʋ nɩ nwʋ. Kɩnga Dwɔɔnʋ 11:14, 38-44, na akʋ̃ bozunzú ndwokɔɣizialɛ eyimmɔ nwʋ:

• Kɛ ɩyɛ mɔɔ yɛnwʋ kɛɛ Lazʋlɔsʋ iwuli amba?—Kilá nkyɩkyɛmi 39.

• Sɛ nɩ Lazʋlɔsʋ ɩhɔ sʋlɔ a, ekila a ankɩ Gyisɛsɩ ikezia ɩkɛma ɩkɛɣa ɩkɔwʋwa azɩlɛ yɩ zʋ dɔkʋ̃ a?

Yɩ́ VIDIYO nɩ.

5. Bokodunwo mmenii sʋ̃maa!

Kɩnga Ndwomi 37:29, na akʋ̃ bozunzú odwokɔɣizialɛ eyi nwʋ:

• Ɛhɩnla dɩka yɛ mmenii abʋmɩ abʋmɩ sʋ̃maa mɔɔ bokodunwo bɛ nɩ bɔkɔwʋwa a?

Sɛ yɛyɩ mmenii mɔɔ bɔzʋ̃mɩnlɩ Gyehova nɩ yesiye ahanlɩ a, Gyisɛsɩ ikodunwo mmenii sʋ̃maa sʋ̃ ɩkɛhɩnla nwʋmɔ. Kɩnga Egyima 24:15, na akʋ̃ bozunzú odwokɔɣizialɛ eyi nwʋ:

• Aninyia yɛ ɛkɛbɛ kɛɛ ɔkɔnwʋ kɛɛ bodunwo yɩ bɛɣa nnwʋanlɩ nu a?

• Mɩnla ɔhʋanɩ zʋ yɛ awudunwolɩyɛ nwʋ anyɩnlɩlazʋ nɩ, ɩyɩkyɩ Phelicity yɩ maamɩ yɩ ɛɣɛɛlɛ a?

 YƖ DƆKƆWƆLƐ

Bayɩbʋlʋ yɩ ɩbɔ anʋhʋba kɛɛ bokodunwo mmenii abʋmɩ abʋmɩ sʋ̃maa mɔɔ bowuwu nɩ. Gyehova ɩpɛ kɛɛ bɔbʋwa azɩ dɔkʋ̃, na ɩma Gyisɛsɩ tumi kɛɛ ɩva idunwo bɛ.

Kɛ Okowuwa Ekeze a?

• Mɩnla yɛ Gyehova nɩɩ Gyisɛsɩ bɛpɛ kɛɛ bɛyɛ bɛma mmenii mɔɔ bowuwu nɩ a?

• Ɛhɩnla dɩka yɛ mmenii abʋmɩ abʋmɩ sʋ̃maa mɔɔ bokodunwo bɛ nɩ bɔkɔwʋwa a, ɩdɩ sʋlɔ anzɛnyɩɩ azɩlɛ yɩ zʋ? Mɩnla ti mɔɔ ɛkãã ɔzɔ a?

• Mɩnla yɛ ɩma ede edi kɛɛ wʋ alɔvʋlɔ mɔɔ bowu nɩ kɛɣa nnwʋanlɩ nu dɔkʋ̃ a?