Masakit ag makasueobo gid kon mamatyan ka it pinalangga. Ngani ginatawag it Biblia ro kamatayon nga kaaway. (1 Corinto 15:26) Hatun-an mo sa Leksyon 27 nga pirdihon ni Jehova rayang kaaway. Pero ano ro matabo sa mga tawo nga patay eon? Sa rayang leksyon, matun-an mo pa gid ro sangka manami pa nga promisa ni Jehova—buhion na it uman ro binilyon nga tawo agud mangin masadya sanda sa owa’t katapusan. Banhawon na sanda! Matabo gid baea ron? Banhawon baea sanda agud mag-estar sa eangit o sa eugta?

1. Ano ro gustong obrahon ni Jehova para sa mga pinalangga natong namatay?

Gusto gid ni Jehova nga buhion it uman ro mga namatay. Sigurado gid ro matutom nga tawo nga si Job nga indi imaw kalipatan it Dyos kon mamatay imaw. Ginhambae na sa Dyos: “Magatawag ka, ag magasabat ako [halin sa Eubnganan].”—Basaha ro Job 14:13-15.

2. Paano naton nasayran nga banhawon ro mga patay?

Kat iya si Jesus sa eugta gintaw-an imaw it gahum ku Dyos agud magbuhi it mga patay. Ginbanhaw ni Jesus ro 12 anyos nga bayi ag unga it sangka baeo. (Marcos 5:41, 42; Lucas 7:12-15) Ku ulihi, namatay ro amigo ni Jesus nga si Lazaro. Maskin ap-at nga adlaw eon nga patay ag nakaeubong si Lazaro, ginbanhaw imaw ni Jesus. Pagkatapos na magpangamuyo sa Dyos, nagsinggit si Jesus: “Lazaro, gumuwa ka!” Ag “ro namatay nga tawo nagguwa”—nga buhi! (Juan 11:43, 44) Imadyina ro kasadya it pamilya ag mga amigo ni Lazaro!

3. Ano ro pag-eaum para sa ing namatay nga pinalangga?

Nagpromisa ro Biblia: “Pagabanhawon it Dyos halin sa mga minatay ro tanan nga mga tawo.” (Binuhatan 24:15) Ratong mga ginbuhi ni Jesus ku una hay owa man nag-agto sa eangit. (Juan 3:13) Masadya sanda nga ginbuhi it uman iya sa eugta. Ruyon man ro maeapit eon nga obrahon ni Jesus. Banhawon na ro binilyon nga tawo agud mangin masadya sanda sa owa’t katapusan sa paraiso nga eugta. Ginhambae na nga ro tanan nga una sa memorya it Dyos hay banhawon maskin pa nalipatan eon sanda it mga tawo.—Juan 5:28, 29.

 TUN-I PA GID

4. Ginpamatud-an ni Jesus nga kaya nang banhawon ro mga patay

Tun-i pa gid kon ano ro gin-obra ni Jesus para sa amigo nang si Lazaro. Basaha ro Juan 11:14, 38-44, ag talakaya rayon rayang mga pangutana:

• Paano naton nasayran nga namatay gid man si Lazaro?—Tan-awa ro bersikulo 39.

• Kon kimo, buhion pa baea imaw ni Jesus iya sa eugta kon igto eon imaw sa eangit?

Tan-awa ro VIDEO.

5. Abu ro banhawon!

Basaha ro Salmo 37:29, ag talakaya rayon rayang pangutana:

• Siin maestar ro binilyon nga banhawon?

Banhawon ni Jesus bukon eang ro mga nagasimba kay Jehova kundi pati ro iba pa. Basaha ro Binuhatan 24:15, ag talakaya rayon rayang pangutana:

• Sin-o ing gustong makita sa mga banhawon?

• Paano nagatao it paumpaw ro pag-eaum nga pagkabanhaw sa ginikanan ni Phelicity?

 SUMARYO

Ginapromisa it Biblia nga banhawon ro binilyon nga namatay. Gusto ni Jehova nga mabuhi sanda it uman, ag gintaw-an na si Jesus it gahum agud banhawon sanda.

Review

• Ano ro ginabatyag ni Jehova ag ni Jesus parti sa pagkabanhaw?

• Siin maestar ro binilyon nga banhawon, sa eangit o sa eugta? Ham-an ruyon ing sabat?

• Ham-an kumbinsido ka gid nga banhawon it uman ing pinalangga nga namatay?