DUNGU 30
¡Tami pu layelu huiñomongetuabüingün!
Müna cutrancaquiiñ ca hueñancüquiiñ layüm quiñe che. Beimu Biblia mu lan dungu quiñe caiñe pingi (1 Corintios 15:26). Dungu 27 mu quimpoiñ Chau Jehová ñi apümcaabel lan dungu, huelu ¿chem upaai com pu layelu mu? Jehová eipicünoi ñi huiñomongeltuabel bentren che tañi abquenochi mongen nieal engün, huelu ¿beingepi mai ñi huiñomongeltungeal pu layelu? Ca ¿cheu huiñomongeltungeaingün? ¿Huenu mu cam Mapu mu? Tübamu peabiiñ.
1. Chau Jehová, ¿chumabi taiñ piuqueyenelchi che lalu?
Jehová ayüni tañi huiñomongeltuabel pu layelu. Quiñe huentru Job pingebülu, müna maneluucülebüi Chau Ngünechen mu, quidu quimnebüi Chau Dio tañi ngoimanoatu rüngaltuculebüle ume. Beimu Job eipibi: “Eimi ngütrümaimi, iñche lloudunguayu” (papiltunge Job 14:13-15).
2. ¿Chem dungu pengeleiñmu ñi huiñomongeltungeal pu layelu?
Jesús miyaupalu Mapu mu, Chau Ngünechen elubi tañi nehuen ñi huiñomongeltuabel pu layelu. Beimu Jesús pepi huiñomongeltubi quiñe püchü malen 12 tripantu nielu ca quiñe lantu domüche tañi püñeñ (Marcos 5:41, 42; Lucas 7:12-15). Upalu antü Jesús tañi hueni, Lázaro pingebülu, lai. Beimu meli antü tañi rüngalconcülebel, Jesús huiñomongeltueyu. Beichi mu Jesús ngillatubilu hula Chau Ngünechen huirarün mu eipi: “¡Lázaro, tripapatunge!”. Beimu “bei ti labülu tripapatui”, Lázaro huiñomongetui (Juan 11:43, 44). Raquiduamnge ñi bente ayüucülebün Lázaro tañi pu che ca tañi pu hueni.
3. Tami piuqueyenelchi che lalu, ¿huiñomongepetuaingün mai?
Biblia eipicünoi “tañi huiñomongetol” pu che (Hechos 24:15). Jesús mülepalu Mapu mu huiñomongeltubi quiñeque che. Huelu tüba engün amulaingün huenu mapu mu, beimu Jesús huiñomongeltubilu engün, ayühun mu huiñomongetuingün Mapu mu (Juan 3:13). Püchüñma mu, Jesús huiñomongeltuabi bentren che ñi ayühun-ngechi mongen nieal huengetule Mapu. Jesús eipi com pu che mülelu Chau Ngünechen tañi raquiduam mu huiñomongelngetuaingün (Juan 5:28, 29).
DOI CÜME QUIMNGE
Quimaiñ Biblia mu chemu maneluhuabüiñ ñi huiñomongetol pu la. Ca quimaiñ bente taiñ yabültucuquetu maneluucüleal ñi huiñomongelngetol pu la.
4. Jesús pengeli tañi nien nehuen tañi huiñomongeltobel che
Doi quimabiiñ chumngechi Jesús huiñomongeltubi tañi hueni Lázaro. Papiltoiñ Juan 11:14, 38-44. Papiltungele hula ngütramcaabiiñ tübachi epu ramtun:
-
¿Chumngechi quimiiñ Lázaro tañi rüb lalen? (Pebinge Juan 11:39).
-
Lázaro amubüle huenu mu, ¿cümelcangepeabüi mai ñi huiñomongeltungeal Mapu mu?
5. Bentren che huiñomongelngetoi
Papiltoiñ Salmo 37:29. Papiltungele hula ngütramcaabiiñ tübachi ramtun:
-
Bentren che huiñomongeltungele, ¿cheu mongeletoingün?
Jesús huiñomongeltuabi pu huenupüramquebilu Jehová. Huelu cabei huiñomongeltuabi caquelu che. Papiltoiñ Hechos 24:15. Papiltungele hula ngütramcaabiiñ tübachi ramtun:
-
Huiñomongelngetule pu che, ¿iñi ayüabüimi tami huiño petobel?
Raquiduamnge tübachi dungu mu: quiñe chau matu trepeltobüi tañi püchüche, ca bemngechi Jesús matu huiñomongeltobüi pu layelu.
6. Tati huiñomongetun yabültucuqueiñmu
Biblia ñi eipin Jairo tañi ñahue mu, müna yabültucubi bentren che lale quiñe tañi pu che cam hueni. Taiñ rüb quimal Jairo tañi upan, papiltoiñ Lucas 8:40-42, 49-56.
Jesús petu ñi huiñomongeltunobel Jairo ñi ñahue, Jesús eipibi Jairo: “Llücaquilnge. Maneluunge müten” (pebinge Lucas 8:50).
-
Lale quiñe tami pu che, ¿chumngechi quelluabeimu (incaabeimu) maneluucüleal ñi huiñomongetol pu la?
-
Upalmi quiñe cuñihun-ngechi dungu tami mongen mu, ¿chumngechi quelluabeimu maneluucüleal ñi huiñomongetol che?
Quintulbe tati VIDEO. Quintulngele hula ngütramcaabiiñ tübachi ramtun:
-
Phelicity tañi chau ca ñuque, ¿chumngechi nehuentucuqueyu pu che tañi huiñomongetol?
QUIÑEQUE CHE EIPIQUI: “Nehue mupituquelan ñi huiñomongelngetol che Mapu mu”.
-
¿Chem piabüimi?
-
Tami quimelelabel che ñi rübngen pu la tañi huiñomongelngetol, ¿chem huirin tripalu Biblia mu pengelelabüimi?
CHEM PEIÑ TÜBAMU
Biblia eipi bentren che tañi huiñomongetol. Jehová elubi nehuen Jesús tañi huiñomongeltuabel pu che.
Chem quimeleleiñmu tüba
-
¿Chemu eipiabüiñ Jehová, Jesús engu ayüni tañi huiñomongeltuabel pu che?
-
Bentren che huiñomongetualu, ¿cheu müleaingün: huenu mu cam Mapu mu? ¿Chemu bemngechi raquiduamquimi?
-
¿Chemu maneluuquimi ñi huiñomongetol tami pu layelu?
DOI QUIMABÜIMI
Quimnge quiñeque ngülam tami doi cüme duamcüleal lan dungu mu upalelmi.
“Manelbalchi ngülam pu upalelu lan dungu mu” (¡Tami quimabel! num. 3 2018)
Biblia ñi ngülam, ¿quellupeabüi mai pu che upalelu lan dungu mu?
¿Chumngechi quelluabüimi quiñe püchüche lale quiñe tañi pu che?
¿Iñi huiñomongelngetoi huenu mu? Ca ¿iñi engün huiñomongelngetulaai?
Peabüimi ka bemngechi dungu:
BILLKE RAMTUN
¿Chumngechi quimelquiiñ Biblia?
Quimeltungelmi quiñe Dunguquelu, papiltuabüimi chem traducción Biblia mu niimi ume. Mangelabüimi com tami pu che, tami pu hueni, ca iñi ume ayüabüimi.
