Maynejj jiwjje ukhajj wal llakistanjja, chuymasajj wal usurakistu. Bibliarjamajja jiwañajj mä enemigompi sasiwa (1 Corintios 15:26). Ukhamarus Jehová Diosaw uka enemigorojj chhaqtayani sasaw 27 yatichäwin yateqtanjja. Ukampis ¿kunas jiwjjapjje uka jaqenakampejj jutïrin pasani? Aka yatichäwinjja, Jehová Diosan yaqha musparkañ promesapatwa yateqaskañäni: jupajj walja millón jaqenakaruw wiñay jakasipjjañapatak jaktayani. ¡Jiwatanakajj jaktanipjjaniwa! ¿Cheqpachapunit ukajj paspachäni? ¿Jupanakajj alajjpachanti jan ukajj aka oraqencha jaktapjjpachäni?

1. ¿Kunsa Jehová Diosajj munat familiaranakam laykusa amigonakam laykus lurañ muni?

Jehová Diosajj jiwatanakarojj walpun jaktayañ muni. Job chachajj Jehová Diosar wal confiyäna, nayajj jiwjjasin ‘Sepulturankjjä’ ukhajj Diosaw jaktayitani sasaw confiyarakïna. Ukatwa Diosarojj akham säna: “Jumajj jawsitätawa, nayasti jaysarakïmawa” sasa (Job 14:13-15 liytʼäta).

2. ¿Kunatsa jiwatanakajj jaktanipjjaniwa sasin sistanjja?

Jesusajj aka oraqenkkäna ukhajja, Diosaw jiwatanakar jaktayañatakejj chʼam churäna. Ukatwa 12 marani mä imill wawampiru, mä viuda warmin sapa yoqapampir jaktayäna (Marcos 5:41, 42; Lucas 7:12-15). Qhepatsti Lázaro amigopaw jiwjjarakïna. Lazarojj pusi urunak jiwatäjjänwa, sepulturar imatäjjarakïnwa, ukhamäkchïnsa Jesusajj jupar jaktayänwa. Diosar orasisajja Jesusajj “¡Lázaro mistunim!” sasaw säna, ukatsti “jiwatäkäna uka jaqejj mistunïnwa”. ¡Lazarojj jiwatatwa jaktäna! (Juan 11:43, 44). ¿Lazaron familiaranakapasa amigonakapasa kunja kusisitäpjjänsa uk amuyasmati?

3. ¿Munat familiaranakamas amigonakamas jaktanipjjaniti?

Biblian promesaparjamajja, jiwatanakajj “jaktanipjjapuniniwa” (Hechos 24:15). Jesusajj jaktaykäna uka jaqenakajj janiw alajjpachar sarapkänti (Juan 3:13). Taqe khitinakatï jaktapkäna ukanakajj aka oraqen jaktasajj kusisitäpjjänwa. Kunjamtï Jesusajj jaqenakar jaktaykänjja, ukhamarakiw akat mä jukʼa tiemporojj walja millón jaqenakarojj jaktayani, ukhamat jupanakajj paraisor tukuyata aka oraqen wiñay jakasipjjañapataki. “Taqe khitinakatï amtat sepulturankapki”, mä arunjja Diosan amtapankapki ukanakajj jaktanipjjaniwa sasaw Jesusajj säna. Jaqenakan jan amtatäjjapjje ukanakas jaktanipjjaniwa (Juan 5:28, 29, nota).

 JUKʼAMP YATJJATAÑÄNI

4. Jesusajj jiwatanakar jaktayañatak chʼamanïtapwa uñachtʼayäna

Lázaro amigoparojj kunjamsa Jesusajj jaktayäna uk jukʼamp yatjjatañäni. Juan 11:14, 38-44 liytʼasajja aka toqetwa parltʼapjjäta:

• ¿Lazarojj jiwatäskapunïnwa sasajj kunatsa sissna? (Juan 11:39 uñjjattʼapjjäta).

• Lazarotï alajjpachar sarjjchïna ukhajja, ¿aka oraqen mayamp jakañapatak kuttʼayanisat Jesusajj jupar mä favor luräna?

VIDEO uñtapjjäta.

5. Waljaniw jaktanipjjani

Salmo 37:29 liytʼasajja aka toqetwa parltʼapjjäta:

• Walja millón jaqenakaw jaktanipjjani, ¿jupanakajj kawkinsa jakapjjani?

Jesusajj janiw Jehová Diosaruk adorapkäna ukanakaruk jaktaykaniti, jan ukasti walja jaqenakampiruw jaktayani. Hechos 24:15 liytʼasajja aka toqetwa parltʼapjjäta:

• Jiwatanakajj jaktanipkani ukhajja, ¿khitirus jumajj uñjañ wal munta?

• Jiwatanakan jaktanipjjañap yatiñajja, ¿kunjamsa Phelicity jiskʼa imill wawan tataparusa mamaparus yanaptʼäna, chuymachtʼarakïna?

 ¿KUNSA YATEQAWAYTAN?

Bibliajja walja millón jaqenakaw jaktanipjjani sasaw yatichi. Jehová Diosajja jiwatanakan jaktanipjjañap wal muni, Jesusaw Diosan chʼamapampejj jiwatanakar jaktayani.

Amtañataki

• Jehová Diosampi Jesusampejj jiwatanakar jaktayañ wal munapjje sasajj ¿kunatsa sistanjja?

• ¿Jaktanirinakajj alajjpachanti jakapjjani jan ukajj aka oraqencha? ¿Kunatsa ukham amuyta?

• Munat familiaranakamajj jaktanipjjaniw sasin confiyañatakejj ¿kunas yanaptʼtamjja?