Nyemb i nlona ngandak ndutu ni njôghe. Inyu hala nyen Bibel i nsébél nyemb le ñoo. (1 Korintô 15:26) I pes 27, di nigil le Yéhôva a ga mélés nyemb. Ndi kii y’a bôña inyu bôt bobasôna ba ba bi wo? Munu yigil ini, di ga nigil ngandak mam inyu loñge mbônga umpe Yéhôva a mbôn bés. Mbônga u, u yé le Yéhôva a ga tugul didun di didun di bôt inyu boñ le ba niñ i boga ni boga! Baa hala a ga bôña toi? I bôt ba, ba ga tuglana inyu niñ i ngii tole ’isi?

1. Sômbôl Yéhôva inyu bôt bés ba ba bi wo i yé le kii?

Yéhôva a nyamnda ni ngôñ i lona bawoga i niñ. Mut hémle wada le Hiôb a bé nkwook nkaa le Djob a ga hôya bé nye i ngéda a ga wo. A bi kal Djob le: “U ga sébél, me neebe we.”—Añ Hiôb 14:13-15.

2. Kii i nkwés bés nkaa le bawoga ba ga témb i niñ?

I ngéda Yésu a bé hana ’isi, Djob a bi ti nye ngui i tugul bôt. Yésu a bi tugul hingonda hiada hi hi bééna 12 nwii, a tugul yak lok i yik muda yada. (Markô 5:41, 42; Lukas 7:12-15) I mbus ngéda, liwanda jé Lasarô a wo. Tolakii hala a bé dilo di-na le Lasarô a bi wo, ba jo ki nye, Yésu a bi tugul nye. Yésu a bi soohe Isañ, i mbus a kal le: “A Lasarô pam!” Ha nyen ‘i mut a bé nwok, a bi pam’ (Yôhanes 11:43, 44) Noode le hégda maséé lihaa li Lasarô ni mawanda mé ba bi nôgda!

3. Imbe botñem i yé inyu bôt boñ ba ba bi wo?

Bibel i mbôn le: “Bitugne bi ga ba.” (Minson mi baôma 24:15) I bôt Yésu a bi tugul i ngéda a bé hana ’isi, ba bi ke bé i ngii. (Yôhanes 3:13) Ba bi nok maséé le ba ntémb ba lo i niñ hana ’isi. Ndék ngéda, Yésu a ga tugul didun di didun di bôt inyu niñ hana ’isi i boga ni boga i paradis. A bi kal le i “bôt bobasôna ba yé ikété soñ mbigda,” yak i bôt ba bi wo behee, ba Djob a ngi hoñlak, ba ga tuglana.—Yôhanes 5:28, 29.

 KÔNDE TÉM

4. Yésu a bi unda le a gwé ngui i tugul bawoga

Béñge i jam Yésu a bi boñ inyu liwanda jé Lasarô. Añ Yôhanes 11:14, 38-44, i mbus ni kwélél mambadga mana:

• Kii i nyis bés Lasarô a bi wo toi?—Béñge nlôñ 39.

• Ibale Lasarô a ke i ngii, baa u nhoñol le ki Yésu a bi témbna nye i niñ hana isi?

Tuk VIDÉÔ.

5. Ngandak bôt y’a lo bitugne!

Añ Tjémbi 37:29, i mbus ni kwélél mbadga ini:

• Didun di didun di bôt di di ga lo bitugne di ga niñ numbe homa?

Yésu a ga tugul ndik bé i bôt ba ngwélél Yéhôva. Añ Minson mi baôma 24:15, i mbus ni kwélél mbadga ini:

• Numbe mut we u nsômbôl le a loo bitugne?

• Lelaa botñem i bitugne i bi hôgbaha bagwal ba Phelicity?

 I SEM KWEP

Bibel i mbôn le didun di didun di bôt di di bi wo, di ga tuge. Yéhôva a nyamnda ni ngôñ i témna bo i niñ, a bi ti Yésu ngui i boñ hala.

Mambadga ma mbigda

• Baa Yéhôva bo Yésu ba gwé toi ngôñ i tugul i bôt ba bi wo?

• Didun di didun di bôt di ga tuge di ga niñ numbe homa, i ngii tole hisi? Inyuki u nkal hala?

• Kii nkwés we nkaa le bôt boñ ba ba bi wo ba ga tuge?