LIKE SUANLƐ 30
?E sran nga be wuli’n be kwla sa be sin nguan ekun?
Kɛ e sran kpa wie wu’n, e awlɛn kpɛ e klun. I sɔ’n ti’n, Biblu’n se kɛ wie’n ti e kpɔfuɛ. (1 Korɛntifuɛ Mun 15:26) Like suanlɛ 27 nun’n, e wunnin kɛ Zoova wá núnnún e kpɔfuɛ sɔ’n. ?Sanngɛ be nga b’a dun mmua b’a wu’n be li? ?Be liɛ yó sɛ? Like suanlɛ nga nun’n, é wá wún kɛ Zoova tali nda kɛ sran miliaa kpanngban bé wá sá be sin nguan nun ekun. Yɛ bé trán nguan nun tititi. Ɔ́ wá cɛ́n sran sɔ mun. ?E kwla lafi su kɛ sa sɔ’n jú sakpa? ?Be nga bé wá cɛ́n be’n, nin yɛ bé trán-ɔn? ?Bé kó trán Ɲanmiɛn su lɔ, annzɛ asiɛ’n su wa?
1. ?Ngue yɛ Zoova kunndɛ kɛ ɔ́ yó mán e sran nga be wuli’n mun-ɔn?
Zoova kunndɛ kpa kɛ ɔ́ cɛ́n be nga be wuli’n mun. Ɲanmiɛn i sufuɛ kpa kun mɔ be flɛ i kɛ Zɔbu’n lafili su kɛ sɛ ɔ wu’n, Ɲanmiɛn i wla su fimɛn i. Ɔ seli Ɲanmiɛn kɛ: “Á wá flɛ́ min, yɛ [kɛ n wo Ndia’n nun lɔ’n] ń sró.”—Kanngan Zɔbu 14:13-15 nun.
2. ?Ngue ti yɛ e kwla se kɛ be nga be wuli’n be kwla sa be sin nguan nun ekun-ɔn?
I nun mɔ Zezi o asiɛ’n su wa’n, Ɲanmiɛn i fanngan nun’n, ɔ kwla cɛnnin sran wie mun. I wie yɛle kɛ ɔ cɛnnin ba bla kun m’ɔ le afuɛ 12, ɔ nin angbeti bla kun i wa yasua’n. (Marki 5:41, 42; Liki 7:12-15) I sin’n, Zezi i janvuɛ Lazaa wuli. Kannzɛ bɔbɔ kɛ ɔ wuli’n ɔ dili cɛn ba nnan’n, sanngɛ Zezi cɛnnin i. Kɛ Zezi srɛli Ɲanmiɛn wieli’n, ɔ kpan seli kɛ: “Lazaa, fite!” Kpɛkun “bian m’ɔ wuli’n fiteli.” (Zan 11:43, 44) Blɛ sɔ’n nun’n, aklunjɔɛ nga Lazaa nin i osufuɛ mun ɔ nin i janvuɛ’m be dili’n, bu i akunndan kan nian!
3. ?Be nga be wuli’n be liɛ w’a wie mlɔnmlɔn?
Biblu’n se kɛ: ‘Ɲanmiɛn wá cɛ́n be nga be wuli’n mun.’ (Sa Nga Be Yoli’n 24:15) Be nga Zezi cɛnnin be laa’n, be nun wie fi w’a ɔman ɲanmiɛn su. (Zan 3:13) Kɛ ɔ cɛnnin be’n, ɔ yoli be fɛ. I wafa kunngba’n, ɔ cɛ kan’n Zezi wá cɛ́n sran kpanngban, yɛ bé trán nguan nun tititi asiɛ’n su wa. Biblu’n se kɛ: “Be kwlaa nga be o ndia’m be nun’n,” Zoova wá cɛ́n be. Kannzɛ bɔbɔ sran’m be wla kwla fi be su’n, sanngɛ Ɲanmiɛn liɛ’n i wla fiman be.—Zan 5:28, 29.
SI NDƐ’N NUN KPA EKUN
Maan e fa e ɲin e sie i Biblu’n nun ndɛ mma wie mɔ be kle kɛ be nga be wuli’n bé wá sá be sin nguan nun ekun’n be su. I sin’n, é wá wún wafa nga sran cɛnlɛ’n i su ndɛ’n kwla fɔnvɔ wɔ’n.
4. Zezi kleli kɛ ɔ kwla cɛn be nga be wuli mun
Maan e kan like nga Zezi yo mɛnnin i janvuɛ Lazaa’n i ndɛ kan ekun. An kanngan Zan 11:14, 38-44 nun. I sin’n, an koko kosan yɛ’m be su yalɛ:
-
?Ngue ti yɛ e si kɛ Lazaa wuli sakpa-ɔ? —Nian ndɛ mma 39 nun.
-
?Sɛ ɔ ti kɛ Lazaa ɔli ɲanmiɛn su’n nn a bu i kɛ Zezi cɛ́n i nguan naan ɔ sɛ i sin asiɛ’n su wa ekun?
5. Sran kpanngban bé wá sá be sin nguan nun ekun
An kanngan Jue Mun 37:29 nun. I sin’n, an koko kosan yɛ’n i su yalɛ:
-
?Nin yɛ sran kpanngban nga bé wá cɛ́n be’n bé trán-ɔn?
Nán be nga be su Zoova’n be ngunmin yɛ Zezi cɛ́n be-ɔ. An kanngan Sa Nga Be Yoli’n 24:15 nun. I sin’n, an koko kosan yɛ’n i su yalɛ:
-
?Wan yɛ a kunndɛ kpa kɛ be cɛn i-ɔ?
Bu ndɛ nga i akunndan kan nian: Wafa nga siɛ kun kwla tinnge i wa mʼɔ su lafi’n, i kunngba’n Zezi kwla cɛn be nga be wuli mun.
6. Sran cɛnlɛ’n i su ndɛ’n kwla fɔnvɔ wɔ
Zairisi i wa bla’n i cɛnlɛ’n i su ndɛ’n ɔ fɔnvɔli sran kpanngban mɔ be awlɛn su sran wuli’n. An kɛnngɛn i su ndɛ m’ɔ o Liki 8:40-42, 49-56 nun. Sa sɔ’n juli sakpa.
Ka naan Zezi w’a cɛn Zairisi i wa bla’n, ɔ seli i si kɛ: “Nán srɛ kun wɔ. Ɔ li lafi min su.” (Nian ndɛ mma 50 nun.) ?Wafa sɛ yɛ sran cɛnlɛ’n i su ndɛ’n kwla uka e sa nga’m be nun-ɔn?
-
Kɛ e awlɛn su sran kun wu’n.
-
Kɛ e nguan’n wo wie nuan’n.
An bo VIDEO’N. I sin’n, an koko kosan yɛ’n i su yalɛ.
-
?Wafa sɛ yɛ sran cɛnlɛ’n i su ndɛ’n ɔ ukali Felisite i si nin i nin-ɔn?
SRAN WIE’M BE WAAN: “N lafiman su kɛ be nga be wuli’n be kwla sa be sin nguan nun ekun.”
-
?A bu i sɛ?
-
?Biblu’n nun ndɛ mma benin yɛ a kwla fa kle kɛ be nga be wuli’n be kwla sa be sin nguan nun ekun-ɔn?
NDƐ’N I KPƆLƐ BOLƐ
Biblu’n se kɛ sran miliaa kpanngban bé wá sá be sin nguan nun ekun. Zoova kunndɛ kɛ ɔ́ cɛ́n be. Yɛ ɔ mannin Zezi i tinmin kɛ ɔ yo sɔ.
Ndɛ’n i nun flanlɛ
-
?Ngue yɛ Zoova nin Zezi be kunndɛ kpa kɛ bé yó mán be nga be wuli’n mun-ɔn?
-
?Be nga bé wá cɛ́n be’n, nin yɛ bé trán-ɔn? ?Bé kó trán ɲanmiɛn su lɔ annzɛ asiɛ’n su wa? ?Ngue ti yɛ a se sɔ-ɔ?
-
?Ngue ti yɛ a lafi su kɛ ɔ sran nga be wuli’n be kwla sa be sin nguan nun ekun-ɔn?
NDƐ WIE MUN EKUN
Kɛ e awlɛn su sran wie wu’n, like nga e kwla yo’n.
“Like ng’ɔ kwla uka be nga be sran w’a wu’n” (An Tinnge!, afuɛ 2018, No. 3)
?Biblu’n nun ndɛ’n kwla uka sran kun mɔ i sran wie w’a wu’n?
Kɛ ba kanngan’m be sran wie wu’n like ng’ɔ kwla uka be’n.
?Bé wá cɛ́n sran wie mun naan be wɔ ɲanmiɛn su? ?Wan mun yɛ be su cɛnman be wie-ɔ?
Ninnge wie mɔ be kwla yo ɔ fɛ ekun'n
KOSAN NGA SRAN’M BE TA BE USA’N
?Ngue yɛle Biblu’n nun like mɔ Zoova i Lalofuɛ’m be nin sran’m be suan’n?
A kwla fa Biblu’n nga a klo’n naan Zoova i Lalofuɛ kun w’a kle ɔ like. Ɔ osufuɛ mun nin ɔ janvuɛ’m be kwla tran like suanlɛ’n i bo wie. Be deman sika.
