Grabeng kulog saka kamunduan an dara kan kagadanan. Iyan an dahilan kaya inaapod kan Bibliya an kagadanan na sarong kaiwal. (1 Corinto 15:26) Sa Leksiyon 27, nanudan mo na hahalion ni Jehova an kaiwal na iyan. Pero paano man su mga nagadan na? Sa leksiyon na ini, maaaraman mo an saro pang magayunon na pangako ni Jehova—bubuhayon niya giraray an bilyon-bilyon na tawo! Asin may paglaom sindang mabuhay nin daing katapusan. Posible daw talaga iyan? Bubuhayon daw liwat sinda para mag-istar sa langit o sa daga?

1. Ano an gustong gibuhon ni Jehova para sa mga mahal ta sa buhay na nagadan na?

Gustong-gusto nang buhayon ni Jehova an mga gadan. Kumbinsido si Job, sarong lalaking may makusog na pagtubod, na dai siya lilingawan kan Diyos pag nagadan siya. Sinabi niya sa Diyos: “Maapod ka, asin masimbag ako [hali sa Lubungan].”—Basahon an Job 14:13-15.

2. Paano ta naaraman na mabubuhay pa giraray an mga gadan?

Kan nasa daga si Jesus, tinawan siya nin Diyos nin kapangyarihan na magbuhay nin mga gadan. Binuhay giraray ni Jesus an sarong 12 anyos na babayi saka an aking lalaki nin sarong babaying balo. (Marcos 5:41, 42; Lucas 7:12-15) Nagadan man an amigo ni Jesus na si Lazaro. Dawa ngani apat na aldaw nang nasa lubungan si Lazaro, binuhay giraray siya ni Jesus. Pagkatapos mamibi sa Diyos, sinabi ni Jesus: “Lazaro, lumuwas ka!” Asin “an tawong nagadan nagluwas”—buhay na giraray! (Juan 11:43, 44) Isipa na sana kun gurano kaugma kan mga kapamilya saka mga amigo ni Lazaro!

3. Ano an paglaom para sa mga mahal mo sa buhay na nagadan na?

Nangangako an Bibliya na “bubuhayon liwat nin Diyos an mga [gadan].” (Gibo 24:15) An mga binuhay kaidto ni Jesus dai man nagpalangit. (Juan 3:13) Maugma sinda na binuhay liwat sinda digdi mismo sa daga. Dai na mahahaloy, bilyon-bilyon man an bubuhayon ni Jesus para mabuhay nin maugma sagkod pa man sa paraisong daga. Sinabi niya na “an gabos na yaon sa mga lulubngan na girumduman”—dawa idtong mga tawo na garo baga nalingawan na pero nasa memorya nin Diyos—bubuhayon.—Juan 5:28, 29.

 ARAMON PA

4. Pinatunayan ni Jesus na kaya niyang buhayon an mga gadan

Aramon kun ano pa an ginibo ni Jesus para sa amigo niyang si Lazaro. Basahon an Juan 11:14, 38-44, dangan pag-ulayan an mga hapot na ini:

• Paano ta naaraman na talagang nagadan si Lazaro?—Hilingon an bersikulo 39.

• Kun yaon na sa langit si Lazaro pagkagadan niya, sa hiling mo bubuhayon pa daw siya ni Jesus digdi sa daga?

I-play an VIDEO.

5. Dakul na tawo an bubuhayon giraray!

Basahon an Salmo 37:29, dangan pag-ulayan an hapot na ini:

• Sain maistar an bilyon-bilyon na tawong bubuhayon liwat?

Apuwera sa mga nagsasamba ki Jehova, dakul pang iba an bubuhayon liwat ni Jesus. Basahon an Gibo 24:15, dangan pag-ulayan an hapot na ini:

• Siisay an gusto mong mahiling na mabuhay giraray?

• Paano an paglaom na pagkabuhay liwat nakaranga asin nakapakusog sa mga magurang ni Phelicity?

 SUMARYO

Nangangako an Bibliya na bilyon-bilyon na nagadan an bubuhayon giraray. Gusto ni Jehova na mabuhay giraray sinda, asin tinawan niya si Jesus nin kapangyarihan para buhayon sinda.

Rebyu

• Ano an namamati ni Jehova asin ni Jesus sa pagbuhay giraray nin mga gadan?

• Sain maistar an bilyon-bilyon na tawong bubuhayon liwat—sa langit o sa daga? Paano mo nasabi iyan?

• Taano ta kumbinsido ka na puwedeng mabuhay giraray an mga mahal mo sa buhay?