ISAMBILILO 30
Balupwa Lwenu ne Fibusa Abafwa Kuti Baba no Mweo na Kabili!
Imfwa ilalenga twaumfwa ububi no kuba no bulanda sana. E mulandu wine Baibolo ilandila ukuti imfwa mulwani. (1 Abena Korinti 15:26) Mwi Sambililo 27, mwalisambilile ukuti Yehova akafumyapo imfwa. Nomba finshi fikacitika ku bantu abafwa kale? Muli lino isambililo, mwalasambilila na fimbi pa fyo Yehova alaya ukuti akabuusha abantu abengi nga nshi pa kuti bakabe ne nsansa umuyayaya. Bushe ifi kuti fyacitika? Kabili bushe abakabuuka bakalaikala ku muulu nelyo pano isonde?
1. Finshi Yehova afwaya ukucitila balupwa lwesu ne fibusa abafwa?
Yehova alafwaisha ukubuusha abafwa. Umwaume wa citetekelo Yobo taletwishika ukuti Lesa ali no kumwibukisha nga afwa. Aebele Lesa ati: “Muketa, na ine nkaasuka [ukufuma mu nshiishi].”—Belengeni Yobo 14:13-15.
2. Twaishiba shani ukuti abafwa kuti babuuka?
Ilyo Yesu ali pano isonde, Lesa alimupeele amaka ya kubuusha abantu. Yesu alibuushishe umukashana uwa myaka 12 e lyo no mulumendo umwana wa kwa mukamfwilwa. (Marko 5:41, 42; Luka 7:12-15) Pa numa, ilyo cibusa wakwe Lasaro afwile, Yesu alimubuushishe nangu ca kuti palipitile inshiku 4 ukufuma apo bamushikile. Ilyo Yesu aile ku nshiishi, alipepele kuli Lesa no kubilikisha ishiwi ilikalamba ati: “We Lasaro, fuma!” Awe “Uwafwile alifumine ku nse” uwa mweo. (Yohane 11:43, 44) Elenganyeni ifyo balupwa lwa kwa Lasaro ne fibusa batemenwe!
3. Finshi fikacitika kuli balupwa lwenu ne fibusa abafwa?
Baibolo yalaya ukuti: “Kukaba ukubuuka.” (Imilimo 24:15) Abo Yesu abuushishe ilyo ali pano isonde tabaile ku muulu. (Yohane 3:13) Lelo babuukile pano pene pe sonde kabili bali ne nsansa. Nga filya fine acitile, nomba line fye Yesu ali no kubuusha abantu abengi nga nshi pa kuti bakabe ne nsansa umuyayaya mu paradaise pano pene pe sonde. Yesu atile “bonse ababa mu nshiishi” bakabuuka, ukubikako fye na bo abantunse bashibukisha.—Yohane 5:28, 29.
SAMBILILENI NA FIMBI
Sambilileni na fimbi ifyaba mu Baibolo ifilanga ukuti abafwa kuti babuuka kabili bakabuuka. Moneni ne fyo ukwishiba ukuti abafwa bakabuuka kwingamusansamusha no kulenga mwaba ne subilo.
4. Yesu alilangile ukutila kuti abuusha abafwa
Sambilileni na fimbi pa fyo Yesu acitiile cibusa wakwe Lasaro. Belengeni Yohane 11:14, 38-44, lyena lanshanyeni aya mepusho:
-
Twaishiba shani ukuti ca cine Lasaro alifwile?—Moneni icikomo 39.
-
Nga ca kuti Lasaro aliile ku muulu ilyo afwile, bushe muletontonkanya ukuti Yesu nga amubuushishe pe sonde?
5. Abantu abengi bakabuushiwa!
Belengeni Amalumbo 37:29, lyena lanshanyeni ici cipusho:
-
Bushe abantu abengi abakabuuka bakalaikala kwi?
Yesu takabuushe fye abantu abalepepa Yehova. Belengeni Imilimo 24:15, lyena lanshanyeni ici cipusho:
-
Ni bani mufwaya ukuti bakabuushiwe?
Tontonkanyeni pali ici: Yesu kuti abuusha umuntu uwafwa nga filya fine umufyashi umwaume engabuusha umwana wakwe uuli mu tulo
6. Ukwishiba ukuti abafwa bakabuuka kuti kwamusansamusha kabili kuti kwalenga mwaba ne subilo
Ilyashi lya mu Baibolo ililanda pa mwana umwanakashi uwa kwa Yairo uwabuushiwe, lilasansamusha abengi abaleloosha kabili lilabakoselesha. Ili ilyashi lya cine. Belengeni Luka 8:40-42, 49-56.
Ilyo Yesu ashilabuusha umwana wa kwa Yairo umukashana, aebele Yairo ati: “Witiina, tetekela fye.” (Moneni icikomo 50.) Bushe isubilo lya kuti abafwa bakabuuka kuti lyamwafwa shani . . .
-
nga lupwa lwenu nelyo cibusa afwa?
-
ubumi bwenu nga buli mu kapoosa mweo?
Tambeni VIDIO, lyena lanshanyeni icipusho cakonkapo.
-
Bushe isubilo lya kuti abafwa bakabuuka lyasansamwishe shani abafyashi ba kwa Phelicity no kubakoselesha?
ABANTU BAMO BATILA: “Abafwa nga babuushiwa bakalaikala ku muulu, te pano isonde.”
-
Imwe muletipo shani?
-
Lilembo nshi mwingabomfya pa kulondolola ukuti abakabuuka bakalaikala pe sonde?
IFYO MUSAMBILILE
Baibolo yalilaya ukuti abantu abengi nga nshi abafwa bakabuuka. Yehova afwaya abafwa bakabe no mweo na kabili. Kabili alipeela Yesu amaka ya kubabuusha.
Ukupitulukamo
-
Twaishiba shani ukuti Yehova na Yesu balafwaisha ukubuusha abafwa?
-
Bushe abafwa abengi nga nshi abakabuushiwa bakalaikala ku muulu nelyo pano isonde? Cinshi mwa-asukila ifyo?
-
Cinshi calenga mushininkishe ukuti balupwa lwenu ne fibusa abafwa kuti baba no mweo na kabili?
ISHIBILENIPO NA FIMBI
Belengeni ifingamwafwa ukukanaba sana no bulanda nga ca kuti lupwa lwenu nelyo cibusa afwa.
Bushe amashinte ya mafunde ya mu Baibolo kuti ya-afwa umuntu uufwililwe?
Finshi fingasansamusha abana nga ca kuti lupwa lwabo nelyo cibusa afwa?
Bushe kukabako abakabuuka abakalaikala ku muulu? Ni bani bashakabuushiwe?
Nalimo Kuti Mwatemwako ne fi
AMEPUSHO ABANTU BEPUSHA SANA
Bushe Isambililo lya Baibolo E Cinshi?
Amasuko ku mepusho pe sambililo lya Baibolo ilyabula ukulipilisha.
